Hatutan.com, (07 Novembru 2022), Díli—Movimentu universitáriu Timor-Leste, liuhosi Aliansa Maubere Nasionál (AMN), ezíje bá Parlamentu Nasionál (PN) atu kansela sosa karreta Prado Spot ho Laptop bá deputadu ho deputada sira.

Movimentu universitáriu Timor-Leste, liuhosi Aliansa Maubere Nasionál (AMN), ezíje bá Parlamentu Nasionál (PN) atu kansela sosa karreta Prado Spot ho Laptop bá deputadu ho deputada sira. Ezijénsia hirak ne’e AMN hato’o liuhosi asaun pasífika ne’ebé hala’o iha kampus sentrál Universidade Nasionál Timor-Lorosa’e (UNTL) Caicoli, Segunda (07/11/2022).

Ezijénsia hirak ne’e AMN hato’o liuhosi asaun pasífika ne’ebé hala’o iha kampus sentrál Universidade Nasionál Timor-Lorosa’e (UNTL) Caicoli, Segunda (07/11/2022).

Portavós AMN, Gaspar Maugamu afirma, asaun pasífika ne’e mosu hodi hatán bá desizaun Parlamentu Nasionál nian, kona-bá politika sosa karreta foun ho marka Sport no laptop.

AMN haree katak, Orsamentu Jerál Estadu (OJE) kada tinan ne’ebé PN aprova, la benefisia povu Maubere nia moris, Lei Pensaun Mensál Vitalísia nú 1/2007 no Lei númeru 1/2006, bá impede liberdade manifestasaun.

“Ita rejeita totál ho polítika Parlamentu Nasionál sosa karreta prado sport ho laptop bá membru parlamentu sira,” Portavós AMN, Gaspar Maugamu hateten iha intervensaun durante Asaun Pasífika.

AMN konsidera politika sosa karreta foun ho laptop sai hanesan injustisa boot ida bá povu Timor-Leste, tanba deputadu sira tuir loloos bá ukun atu reprezenta povu, ko’alia povu ninia problema, maibé iha prátika la akontese no pior liu maka ko’alia kona-bá sira nia interese.

“Iha PN ne’ebá, deputadu sira tuur hodi defende de’it sira-nia an, halo lei ba sira nia aan no ignora tiha povu,” Gaspár Maugamu, konsidera.

Observasaun Hatutan.com iha terrenu nota manifestante sira hakerek mós liafuan krítiku oioin iha pamfletu mak hanesan, “Independénsia la’ós atu troka ema kulit mutin ho metan, la’ós atu troka kores Bandeira, eh la’ós atu troka ema iha governasaun. Presiza liu maka destroi no hakotu abut hosi esplorasaun kolónial ne’e”.

Tuir planu, manifestasaun pasífika ne’e AMN sei hala’o durante fulan rua nia laran hahú hosi fulan Novembru to’o Dezembru tinan 2022, no sei realiza semana ida loron tolu hahú hosi Segunda, Tersa no Kuarta.

Jornalista: Rogério Pereira Cárceres