Hatutan.com, (18 Novembru 2022), Díli—Emprezáriu Timoroan Jorge Manuel de Araujo Serrano eleitu nu’udár Prezidente Câmara de Comércio e Industria Timor Leste (CCI-TL) períudu 2022-2026, iha Assembleia Jerál CCI-TL ne’ebé hala’o iha Otél Novo Turismo, Sesta (18/11/2022).

Prezidente Eleitu CCI-TL, Jorge Serrano.

Jorge Serrano eleitu hafoin halakon Lourenço de Oliveira iha eleisaun ba órgaun ezekutivu Câmara de Comércio e Industria Timor Leste (CCI-TL ho totál delegadu ne’ebé rejista hamutuk 264 no delegadu ne’ebé tuir votasaun hamutuk 260.

Lee Mós: Istória Konflitu iha CCI-TL To’o Hamosu CNT, Jorge Serrano Vs Julio Alfaro

Rezultadu votasaun, Jorge Serrano hetan votus 151 no Lourenço Oliveira hetan votus 109.

Kandidatu Jorge Serrano iha Pakote A no hetan apoiu hosi proponente sira hosi munisipiu 9 no asosiasaun membru hamutuk 14, enkuantu kandidatu Lourenço Oliveira iha Pakote B no Propoin hosi munisípiu 8 no asosiasaun membru 6.

Haree ba lista kandidatura ne’ebé proponente sira aprezenta, ekipa jurídiku halo verifikasaun no halo aprovasaun bazeia ba Artigo 27 nú 3 husi estatutu CCI-TL ne’ebé hateten, kandidatu ba prezidente CCI-TL tenke apresenta no assina husi minimu membru 10, asosiasaun fundador 5 no CCI munisípiu no RAEOA 3, ne’ebé partisipa iha Asembleia Jerál.

Antes ne’e iha kampaña ba eleisaun, Jorge Serrano hateten iha CCI-TL kada tinan haat membru sira sempre hasoru-malu iha Asembleia Jerál, tanba ne’e servisu iha negósiu hanesan responsabilidade boot ida tanba ne’e motiva nia atu kandidata an hodi hatán ba nesesidade organizasaun nian no instituisaun nia presiza.

Nia kandidatura la reprezenta nia pessoál maibé membru hotu-hotu ne’ebé asosiadu iha CCI-TL, tamba desizaun iha CCI-TL ne’e koletiva membru hotu nian.

“Iha kongresu ida ne’e ha’u mai ho konseitu ida katak se lakon ita hotu lakon no manan ita hotu manan, maibé ha’u hakarak kongresu ne’e hotu, kongresu ida ne’ebé halo ita hotu solidu, CCI ida de’it, CCI ba hotu-hotu no la esklui ema ida tanba ha’u nia objetivu prinsipál mak CCI-TL tenke forte, reprezentativu no mós akumulativu,” Jorge Serrano hateten.

Nia misaun importante maka atu haforsa CCI-TL liu hosi organizasaun tuir lema ne’ebé hateten organizar para desenvolver.

Tanba ne’e emprezáriu nasionál ne’e mós promete atu hahú organiza hikas CCI-TL hahu hosi asosiasaun membru sira ba to’o iha CCI munisipiu atu nune’e funsionamentu CCI-TL hanesan organizasaun no instituisaun bele funsiona ho di’ak hodi garante moris di’ak CCI-TL nian.

“Ha’u nia planu atu iha fulan neen dahuluk ne’e bele konsolida CCI-TL katak aktualiza CCI-TL tuir situasaun real ne’ebé agora hotu-hotu simu no enfrenta hela problema nune’e konsolida hahu hosi akait, ha’u hakarak asosiasaun membru hotu-hotu nia bandeira iha akait,” nia tenik.

Sede sentral CCI-TL Akait tenke sai fatin ida ba emprezáriu hotu-hotu atu iha diálogu, fahe informasaun, halo advokasia no promove vida emprezariál.

Emprezáriu nasionál ne’e mós promete bainhira eleitu sei instala baze de dadus ida CCI-TL nian atu bele iha kontrolu ba servisu no aktividade hotu husi membru sira nian nudar meius ida atu rejista forsa CCI-TL nian.

Baze de dadus ne’e mós nia objetivu mak atu hatene totál empreza iha munisipiu hira hahú hosi pequena empreza, media emprezas no grande empreza hira no sira nia servisu kobre deit iha area saída.

“Ita polítikamente tama ona ASEAN tamba ne’e ita tenke prepara an iha seitor hotu-hotu iha area Peska, pekuária, agrikultura hodi prepara sertifikadu kualidade de produtu hodi hatan ba merkadu internasionál liu hosi exportasaun, tanba ne’e Akait tenke sai klube ba emprezáriu sira atu deskute no dignifika emprezáriu hotu-hotu,” nia dehan.

Jornalista: Vito Salvadór