Hatutan.com, (18 Novembru 2022), Díli—Tribunál Ditritál Díli (TDD), iha Sesta 18 Novembru 2022, liuhosi despaixu ikus bá Primeiru Interrogatóriu, aplika medida koasaun Termu Identidade Rezidénsia (TIR) bá arguidu na’in-11 nu’udár manifestante hosi Grupu Aliansa Maubere Nasionál (AMN).

Arguidu na’in-11 nu’udár manifestante hosi Grupu Aliansa Maubere Nasionál (AMN) hetan Termu Identidade Rezidénsia (TIR) iha Tribunál Ditritál Díli (TDD), Sesta 18 Novembru 2022.

Iha Primeiru Interrogatóriu ne’e, Ministériu Públiku (MP) liu hosi Prokuradora Ivónia promove arguidu sira ho krime tolu mak hanesan, Obstrusaun bá Autoridade Públika, Dezobediénsia no Danu Agravadu.

Lee Mós: Laiha Provas, Tribunál Liberta Manifestante Na’in-26

Nune’e iha alegasaun, MP solisíta bá Tribunál atu aplika medida koasaun Aprezentasaun Periódika (AP) bá arguidu sira. Maibé, parte Defeza arguidu nian husu Tribunál atu aplika de’it medida koasaun Termu Identidade Rezidénsia (TIR), tanba maioria manifestante sira ne’e estudante. Tanba ne’e, ikus mai Tribunál entende katak medida koasaun TIR mak nesesáriu liu.

“Iha prosesu Primeiru Interrogatóriu ne’e, kuaze MP la fundamenta krime ne’ebé nia promove katak laiha faktus, tanba ne’e nú-fin Tribunál mantein aplika TIR, bazeia bá deklarasaun hosi arguidu sira nian, hatudu katak laiha indísius forte atu dudu Tribunál aplika krime tolu  ne’e,” Advogadu Privadu  Aquino Dias da Silva, hateten iha TDD, Sesta (18/11/2022).

Prosesu Primeiru Interrogatóriu ne’e, prezide hosi Juiz Titulár  Alváro Maria Freitas, MP Reprezenta hosi Prokuradora Ivónia no arguidu sira hetan asisténsia legál hosi Advogadu Privadu Aquino Dias da Silva.

Arguidu na’in-11 nu’udár manifestante hosi Grupu Aliansa Maubere Nasionál (AMN) hetan Termu Identidade Rezidénsia (TIR) iha Tribunál Ditritál Díli (TDD), Sesta 18 Novembru 2022.

Iha Kuarta (16/11/2022), PNTL kaptura manifestante sira tanba  deskonfia la obedese bá regra sira manifestasaun nian, ne’ebé previstu iha lei demostrasaun númeru 5/2006, kona-bá halo manifestasaun tenke dook hosi edifisiu públiku ho metru atus-ida (100).

La’ós ne’e de’it, durante asaun manifestasaun kontra membru PN, iha resintu Kampus Sentrál UNTL ne’e, deskonfia mós katak, manifestante sira harahun vidru odamatan no janela universidade nian.

Tanba ne’e maka PNTL kaptura manifestante sira ne’e no detein mós iha Sela Detensaun Komandu Munisipiu Dili durante oras 72, hodi submete bá TDD.

Jornalista: Rogério Pereira Cárceresa