Hatutan.com, (23 Novembru 2022), Díli—Komissáriu Comissão Anti-Corrupção (CAC), Sérgio Hornai alerta bá kualkér família ne’ebé ho rendimentu kada fulan liu $500 koko hodi simu subsídiu ‘fim do ano’ $200, sei simu konsekuénsia todan tuir Lei.

Komissáriu CAC Sérgio Hornai sai oradór prinsipál iha workshop ba funsionáriu públiku iha munisípiu Manufahi ho tema “Tipu no Forma Korrupsaun sira iha Seitór Públiku”, Tersa (22/11/2022). Foto/CAC.

Komissáriu Sérgio Hornai ko’alia ne’e bainhira sai oradór prinsipál iha workshop ba funsionáriu públiku iha munisípiu Manufahi ne’ebé organiza hosi Provedoria Direitus Humanus no Justisa (PDHJ), bazeia ba Kooperasaun Institusional Quadrilateral entre instituisaun Estadu haat (4) hanesan CAC, PDHJ, CFP no IGE.

Lee Mós: Família Vulnerável no Rendimentu Kiik-liu $500 Sei Simu Subsídiu $200 iha Dezembru

Tema ne’ebé Sérgio Hornai aprezenta maka “Tipu no Forma Korrupsaun sira iha Seitór Públiku” ko’alia ba partisipante sira ne’ebé maioria assume kargu Xefia iha liñas ministeriais iha Munisipiu Manufahi katak direitu no dever tenki balansu.

Advertisement

Líder másimu CAC ne’e foti ezemplu rua ne’ebé sai tópiku sentrál no virál oras-ne’e iha média konvensionál no media sosiál nasionál maka, Programa Cesta Bázika no atribuisaun subsídiu Fim do Ano $200 ba benefisiáriu sira ne’ebé dekretu lei hateten momoos funsionáriu públiku sira ne’ebé ninian saláriu mensál liu $501 laiha direitu simu programa rua ne’e.

Husu Prezidente Munisípiu, Administradór Postu, Xefe Suku no Xefe Aldeia sira, iha responsabilidade boot hodi verifika sertamente lista uma ka’in sira hodi evita funsionáriu públiku no funsionáriu seitór privadu ho saláriu tuir dekretu lei la permite asesu programa Cesta Bázika no atribuisaun subsídiu fim do Ano $200.

“Sira ne’ebé ho saláriu liu $501 mak simu Cesta Bázika no subsídiu fim do ano nian sei simu konsekuénsia todan iha lei nian oin. Laiha direitu tanba funsionáriu seitór públiku no privadu ninian saláriu liu $500,” Hatutan.com sita deklarasaun Sérgio Hornai iha komunikadu, Tersa (22/11/2022).

Atividade via kooperasaun Quadrilateral instituisaun xave haat ne’e ho tema “Prevene no Kombate Korrupsaun hodi Promove Governasaun di’ak no proteje Direitus Humanus iha Servisu Administrasaun Publiku”.

Objetivu prinsipál hosi atividade ne’e atu hasa’e prestasaun servisu, responsabilidade, disiplina, intergidade no dezempeña sira nia funsaun ho loloos no mós kontrolu ho efikás no efisiente hosi funsionáriu públiku liñas ministeriais iha Salaun Administrasaun Munisipiu Manufahi.

Advertisement

Parisipantes iha workshop loron sorin ne’e maka funionáriu liñas ministeriais assume kargu xefia sira ne’ebé haknar an iha Munisipiu Manufahi hanesan; Administrador Munisipiu, Diretór Edukasaun, Diretór Servisu Liñas Sektorais, Diretór Rejionais, Diretores no Xefe Departamentu Saúde sira iha Munisipiu Manufahi.

Lee Mós: Prezidente Repúblika Promulga Dekretu Lei Subsídiu $200

Jornalista: Rogério Pereira Cárceres

Advertisement