Hatutan.com, (02 Dezembru 2022), Díli—Relasaun Polísia Nasionál Timor-Leste (PNTL), liuhosi Unidade Patrullamentu Fronteira (UPF) ho FALINTIL Forsa Defeza Timor-Leste (F-FDTL)  hamutuk ho Tentara Nasionál Indonézia (TNI), to’o oras-ne’e metin bá beibeik hodi asegura fronteira terreste entre nasaun rua.

Komandante UPF, Superintendente Polísia Euclídes da Costa Belo hasoru-malu ho líder sira TNI nian ne’ebé destakadu iha liña fronteira, diskute kona-bá kooperasaun hodi garante ema hotu iha fronteira moris iah ambiente seguru. Foto/PNTL.

Iha Kuarta (30/11/2022) Komandante UPF, Superintendente Polísia Euclídes da Costa Belo hasoru-malu ho líder sira TNI nian ne’ebé destakadu iha liña fronteira, diskute kona-bá kooperasaun hodi garante ema hotu iha fronteira moris iha ambiente seguru.

Lee Mós: SNI-UPF Halo Apreensaun ba Atributu Arte Marsiál Tama Ilegál iha Fronteira

“Ha’u hasoru-malu ho TNI, liu-liu DAN SATGAS hanesan parseiru di’ak ho UPF no Tenente Koronel Yudin, inklui eis Dandim Belu ami hasoru malu iha área sira nian hodi husu, koordena, apoiu serbisu, atu bele halo vizilánsia koordenada entre parte rua.  Ita sei garante di’ak liután sidadaun sira iha liña fronteira,” Superintendente Polísia, Euclídes da Costa Belo hateten hafoin partisipa iha serimónia tomada-de-pose bá  Ofisiál Superiór na’in-haat, iha Salaun Kuartél Jerál Caicoli, Kinta (01/12/2022).

Euclídes Belo dehan, kna’ar ne’ebé nia hala’o hamutuk ho membru sira, garante seguransa bá fronteira, liuhosi patrullamentu, vizilánsia ne’ebé mak halo, en-koordenasaun ho autoridade sira seluk, internalmente ho Alfándega, Migrasaun, Karantina, hotu-hotu la’o di’ak, inklui autoridade lokál sira.

Distánsia iha fronteira Terrestre ninia luan la’ós metru ida ka metru rua, maibé luan tebes. Tanba ne’e maka bainhira UPF halo operasaun, sempre kaptura sidadaun ne’ebé seidauk hatene lei no hatama sigaru inklui fugetes.

“Iha mós lubuk ida mak ami prende, liuhosi operasaun patrullamentu, vizilánsia, nune’e mós liuhosi barrajen estrada, pasa revista ne’ebé mak ami halo iha área Nuu-Badak. Ami UPF ninia moto ida katak, Leão Fronteira. Leão nonook, mais movimentu la’o nafatin, atu garante liña fronteira hakmatek,”nia hateten.

Komandante UPF, Superintendente Polísia Euclídes da Costa Belo hasoru-malu ho líder sira TNI nian ne’ebé destakadu iha liña fronteira, diskute kona-bá kooperasaun hodi garante ema hotu iha fronteira moris iah ambiente seguru. Foto/PNTL.

Iha fronteira la’ós UPF serbisu mesak, maibé oras-ne’e sira iha ona ligasaun pozitivu hamutuk ho autoridade lokál sira, komunidade no mós joventude ne’ebé iha liña fronteira, inklui universitáriu sira hosi UNTL ne’ebé mak hala’o estájiu iha Maliana.

“Sira mós apoia, koolabora másimu ho operasaun ne’ebé mak ita hala’o, liuhosi edukasaun sívika bá ita nia komunidade, liuhosi semináriu ne’ebé mak sira rasik diríje, organiza no konvida mós ho UPF hodi sai hanesan oradór, hodi partilla informasaun kona-bá misaun, vizaun koordenasaun serbisu ho autoridade lokál iha rai-laran, nomós rai-liur, ne’ebé ita partilla mós bá ita nia estudante sira,” Euclídes Belo, hateten.

Komandante UPF ne’e husu bá komunidade iha área fronteira rai-maran atu kontinua koolabora nafatin ho autoridade seguransa no labele ultrapasa ho dalan ilegál.

Sasán saida mak hakarak lori tama no sai bá mai nasaun rua, tenke liuhosi dalan ne’ebé legál. Maske sasán sira ne’ebé halo transaksaun ne’e iha hela dokumentu válidu, maibé bainhira la lori liuhosi dalan legál maka UPF sei kaptura, nomós sei prosesa tuir lei ne’ebé mak iha Estadu RDTL.

Jornalista: Rogério Pereira Cárceres