Hatutan.com, (04 Dezembru 2022), Díli—Líder istóriku, Kay Rala Xanana Gusmão hala’o viazen ba Kapitál Alemaña, Berlin Akolle hodi partisipa konferénsia Europeia ba Apoiu no Soliedaridade ba povu Sahara Osidentál (EUCOCO sigla Inglés) ba dala 46 ne’ebé realiza iha loron 2 to’o 3 Dezembru fulan ne’e.

Líder istóriku, Kay Rala Xanana Gusmão ko’alia iha konferénsia Europeia ba Apoiu no Soliedaridade ba povu Sahara Osidentál (EUCOCO sigla Inglés) ba dala 46 ne’ebé realiza iha Kapitál Alemaña, Berlin Akolle, iha loron 2 to’o 3 Dezembru fulan ne’e. Foto/Espesiál.

“Konferénsia ne’e ho tema ‘Bá Sahara Osiddentál no Auto Determinasaun’, partisipa hosi delegasaun nasaun oin-oin, maioria parte hosi nasaun Europeia, no konvidadu de honra Kay Rala Xanana Gusmão ho delegasaun hosi Parlamentu Timor-Leste,” Hatutan.com sita komunikadu.

Lee Mós: Xanana Partisipa Simeira Internasionál Kona-bá Edukasaun Iha ONU

Hosi Parlamentu Nasionál deputadu Partidu CNRT Adérito Hugo mak xefia delegasaun ne’ebé kompostu hosi deputadu hosi FRETILIN Agostinho Sequeira Somotxo, KHUNTO reprezenta hosi Luis Roberto no Isabel Ximenes hosi Frente mudansa.

Konferénsia anuál ne’e partisipa hosi nasaun ne’ebé rekoñese independénsia Sahara Osidentál, instituisaun nasionál, Europeia, organizasaun polítika, sindikatu traballadór assosiasaun soliedaridade ba povu Sahara Osidentál, sosiedade sivíl, autór

jurídiku no kulturál.

Embaixadór Sahara ba Europa, Oubbi Bushraya Al-Bashir hateten, konferénsia ne’e foka liu ba Kestaun haat mak hanesan, Polítika no informasaun, Direitus Humanus, Rekursu Naturais no Konsolida Estadu Sahara.

Eventu ne’e sai hanesan sasin ba konferénsia Interparlamentár Bundestag iha Parlamentu Alemaña, Europa, Ázia no Amérika Latina nia oin.

Konferénsia ba Apoiu no Soliedaridade Europa ho Sahara (EUCOCO) realiza kada tinan dezde 1975 ka tinan inisiu konflitu iha Sahara  no kada tinan hili sidade ida iha Europa ba eventu ne’e.

EUCOCO nu’udár plataforma ida ba reflesaun, analize no halo koordenasaun ba desizaun ne’ebé klara atu bele kontribui ba dezenvolvimentu luta povu Sahara, direitu ba auto determinasaun no independénsia ba povu Sahara.

 Jornalista: Vito Salvadór