Hatutan.com, (06 Dezembru 2022), Díli—Komunidade Suku Comoro, postu administrativu Dom Aleixo  ho komunidade suku Camea, postu administrativu Cristo Rei, munisípiu Díli, hahú simu subsídiu fim do ano $200.

Vise-Primeiru Ministru no Ministru Ordenamentu Teritóriu, José Maria dos Reis lansa subsidiu $200 iha Suku Comoro, Tersa (06/12/2022). Foto/Elio dos Santos da Costa.

Distribuisaun iha Suku Comoro lansa direta hosi Vise-Primeiru Ministru no Ministru Ordenamentu Teritóriu, José Maria dos Reis no iha Suku Camea lansa hosi Vise-Primeira Ministra no Ministra Solidariedade Sosiál no Inkluzaun, Armanda Berta dos Santos.

Lee Mós: Subsídiu “Fim do Ano”, CAC ho PDHJ Preokupa Númeru Uma-Kain Boot Tebes

Perante komunidade Comoro, José Reis hateten subsídiu ne’e governu fó de’it ba família sira ne’ebé laiha rendimentu no sira ne’ebé mensalmente rendimentu menus hosi $500.

Subsídiu ne’e ho intensaun atu apoia ekonomia família ne’ebé vulnerável bele iha kbiit natón atu kompleta nesesidade.

“Subsídiu $200 ne’ebé governu oferese ba família sira liuliu ba sira ne’ebé vulnerável mai ho intensaun atu tulun no apoia ekonomia família sira nian,” nia hateten iha Comoro, Tersa (06/12/2022).

Nune’e mós Juvinal da Costa hosi aldeia 30 de Agostu,  Suku Comoro hateten konsidera  subsídiu $200 sei tulun ninia família atu bele utiliza ba nesesidade uma laran nian inklui utiliza ba serimónia Natal ho tinan foun.

“Osan ne’e sei utiliza atu sosa buat ne’ebé ami presiza liuliu nesesidade família. Se bele governu kontinua fahe osan ba ami iha fim do ano,” Juvinál da Costa hateten.

Komunidade Suku Comoro simu subsidiu $200, Tersa (06/12/2022). Foto/Elio dos Santos da Costa.

Iha fatin hanesan Xefe Suku Comoro, Eurico da Costa de Jesus hateten autoridade lokál foti ona osan iha BNCTL atu mai iha suku hodi kontinua halo pagamentu ba komunidade.

“Autoridade lokál ami servisu hamutuk ho ministériu sira, autoridade seguransa, no ami garante sei halo pagamentu ho di’ak tuir oráriu ne’ebé iha,” Eurico da Costa de Jesus hateten.

Autoridade lokál sei orienta família ne’ebé reprezenta hosi xefe família ka enkarregadu familiár sei prienxe deklarasaun ne’ebé suku prepara atu garante katak, sidadaun ne’e nia saláriu mensál menus hosi $500 no ida seluk atu fó garantia ba suku katak família refere sei la ba simu tán subsídiu iha fatin seluk hodi fó prezuizu ba Estadu.

Lansamentu subsidiu uma kain iha postu administrativu Dom Aleixo, munisípiu Díli kompostu husi suku hitu (7) mak hanesan Suku Comoro totál uma ka’in 10.054 ho orsamentu $2,010,800, suku Kampung Alor totál uma-ka’in 1.322 ho orsamentu $264,400, Suku Manleuana totál uma-ka’in 3.499 ho orsamentu $699,800, Suku Bebonuk totál uma-ka’in 2.948  ho orsamentu $589,600, Suku Madohi totál uma-ka’in 4.578 ho orsamentu $915,600, Suku Fatuhada totál uma-ka’in 3.111 ho orsamentu $622,200 no Suku Bairru-Pité totál uma-ka’in 6.770 ho orsamentu $1.354,000.

Armanda Berta Husu Priexe Deklarasaun

Vise-Primeira Ministra no Ministra Solidariedade Sosiál no Inkluzaun, Armanda Berta dos Santos lansa subsidiu $200 iha suku Camea, Tersa (06/12/2022). Foto/MSSI.

Nune’e mós Vise-Primeira Ministra no Ministra Solidariedade Sosiál no Inkluzaun, Armanda Berta dos Santos bainhira hala’o lansamentu ba programa Subsídiu fim do ano iha Suku Camea husu ba komunidade atu prienxe uluk deklarasaun molok forma ba simu osan.

Nia hateten, Governu bele atribui osan $200 ba uma-ka’in sei atribui tinan ida dala ida no Governu la iha buat barak atu fornese ba família sira maibé ida ne’e mak kbi’it Governu nian atu fó ba komunidade iha fim do ano.

“Osan ne’e fó ba uma-ka’in ne’ebé ho rendimentu $500 mai karaik. Ba sira ne’ebé rendimentu $500 ba leten sei la simu. Bainhira benefisiáriu sira atu simu tenke prienxe deklarasaun nune’e husu ba sira ne’ebé ho rendimentu bo’ot liu $500 bele fó oportunidade ba sira ne’ebé ho rendimentu ki’ik,” nia hateten.

Xefe Suku Camea, Matos da Costa agradese ba Governu, ne’ebé hili ona Suku Camea hanesan fatin ba lansamentu pagamentu subsídiu fim do ano ba uma-ka’in.

Suku Camea iha uma-ka’in 3.310 mai hosi hosi aldeia 13 ho ninia orsamentu $662.000, nune’e sei halo esforsu tomak hodi hala’o pagamentu ho di’ak no tuir kalendáriu ne’ebé mak iha.

Totál dadus benefisiáriu Munisípiu Díli hamutuk 67.542 ho ninia orsamentu $13.508.400.

Jornalista: Vito Salvadór