Hatutan.com, (12 Dezembru 2022), Díli—Konsellu Ministru (KM) aprova ona alterasaun ba diploma ne’ebé antes ne’e aprova hosi Konsellu Ministru iha sorumutuk hosi loron 09 fulan-novembru tinan 2022 kona-bá pagamentu estraordináriu ba saláriu adisionál fulan ida nian.

Reuniaun Konsellu Ministru (KM). Foto/Elio dos Santos da Costa

Hafoin rona no simu komunikasaun hosi Prezidente Repúblika, José Ramos-Horta, Konsellu Ministru halo alterasaun, ne’ebé mantein nafatin ein jerál diploma inisiál hosi loron 09 fulan-novembru ho prinsipiu universalidade no aumenta tán ho kontratadu sira hotu, la haree ba nasionál ka internasionál.

Lee Mós: Prezidente Repúblika Afavór Bá Saláriu Désimu Terseiru Maibé “La Konkorda” Asesór Sira Mós Simu

Valór pagamentu estraordináriu ekivale ba valór saláriu mensál benefisiáriu nian ba fulan-dezembru tinan 2022.

Maibé hodi uniformiza valór pagamentu estraordináriu entre traballadór sira iha Administrasaun Públika, sei estabelese limite tuir ekiparasaun ba rejime jerál.

Ho nune’e, pagamentu ba traballadór sira Administrasaun Públika nian, nasionál ka estranjeiru, ne’e limitadu ba valór grau no eskalaun másimu tabela salariál kareira rejime jerál nian ka ba valór vensimentu ba ajente administrasaun públika ne’ebé kontrata ba ezersísiu kargu diretór-jerál nian.

Ministru Prezidénsia no Konsellu Ministru (MPKM), Fidelis Manuel Leite Magalhães afirma, saláriu d-esimu-teriseiru “Gaji-13“ ne’e, atribui universalmenta, katak bá funsionáriu hothotu iha direitu bá ida ne’e.

“Ho alterasaun ne’ebé aprova agora pretende universalidade ba pagamentu estraordináriu inklui hotu titulár sira ho kargu politiku no traballadór sira hotu iha Administrasaun Públika, funsionáriu, ajente ka kontratadu sira no mós eis-titulár sira no eis-membru órgaun soberania nian,” Fidelis Magalhães hateten iha Palásiu Governu, Díli, Segunda (12/12/2022).

Jornalista: Rogério Pereira Cárceres