Hatutan.com, (05 Janeiru 2023), Díli- Diretór Empreza BANIR LEMA UNIP.LDA, Domingos Sequeira hateten, konstrusaun bá edifísiu ‘provizóriu’ Rádiu Televizaun Timor-Leste, Empreza Públiku (RTTL,E.P) la’o tuir prosedimentu tékniku no halo esforsu atu garante nia kualidade.  Nune’e, husu atu extende tan kontratu servisu bá fulan-neen (6) tan.

Lee Mós : Konstrusaun Edifísiu RTTL,E.P Atrazu

Empreza BANIR LEMA UNIP.LDA halo hela servisu bá konstrusaun edifísiu RTTL,E.P. Foto/Elio dos Santos da Costa

Empreza BANIR LEMA UNIP.LDA asina kontratu ho Ministru Asuntu Parlamentár no Komunikasaun Sosiál (MAPKOMS),  Francisco Martins da Costa Pereira Jerónimo, iha loron 29 fulan-Juñu 2022 no finaliza serbisu iha fulan-neen (6) nia laran, to’o loron 29 fulan-Outubru 2022. Maibé to’o ona loron 05 fulan-Janeiru 2023, obra ho valor orsamentu millaun $1-resin ne’e seidauk finaliza tuir tempu kontratu.

Bainhira hahú asina kontratu, Empreza BANIR LEMA UNIP.LDA  lori nia material bá teste iha laboratóriu, projetu ne’e emerjénsia maibé nia prosesu hotu la’o normal, hafoin foti rezultadu iha laboratóriu lori bá hatama iha obras públika, Ajénsia Ddezenvolvimentu Nasionál  (ADN) no MAPKOMS foin mak empreza hahú servisu.

Domingos Sequeira  hateten, bainhira empreza atu hahú servisu iha impedimentu ho ai-riin eletrisidade ne’ebé liga bá RTTL ho komandu Polísia Munisípiu Díli, tamba ne’e empreza tenke hein hodi hatama karta bá obras públika, MAPKOMS no RTTL hodi hein prosesu halo mudansa bá riin eletrisidade han tempu kuaze fulan-ida.

Iha loron 26 fulan-Jullu 2022, EDTL-E.P foin muda no empreza hahú sukat maibé tambá site plan laiha nune’e enjeñeiru empreza nian halo fali karta bá iha obras públika iha ne’ebé han tempu kuaze semana ida resin no iha fulan-Agostu 2022 nia klaran mak empreza hahú servisu hodi ke’e tun metru rua no cor okos ne’ebé ho mahar sentímetru  60.

Hafoin cor kuaze fulan-ida labele halo servisu tamba tenke tuir prosedimentu sira ne’ebé iha no liu tiha ne’e cor fali penahan no rins sira labele servisu kuaze fulan-ida tamba tenke hein too prosesu sira ne’e la’o normal mak bele kontinua servisu atu garante nia kualidade.

“Ita sura hamutuk de’it prosesu inísiu husi impedimentu ai-riin eletrisidade mai site plan,  hahú ke’e no cor okos no cor penahan inklui ai-riin sira han tiha ona tempu kuaze fulan-haat, tamba empreza hakarak garante kualidade no tuir prosedimentu ne’ebé mai husi obras públika no ADN,” Diretór Empreza BANIR LEMA UNIP.LDA, Domingos Sequeira bá Hatutan.com iha fatin konstrusaun edifísiu RTTL, E.P, Caicoli, Kinta (05/01/2023).

Agora servisu loos kuaze fulan rua nune’e empreza labele halo buat barak no oras ne’e tama ona bá leten, sei fui sinta no slop iha ne’e mós tékniku sira nia ezijénsia atu hosi fulan-ida labele servisu hodi garante nia kualidade.

Empreza BANIR LEMA UNIP.LDA halo hela servisu bá konstrusaun edifísiu RTTL,E.P. Foto/Elio dos Santos da Costa

Nia argumenta projetu ne’e la’ós ki’ik oan no la’ós CNA mak rekomenda empreza BANIR LEMA UNIP.LDA maibé tuir prosesu normal no tuir konkursu públiku  dala-rua no empreza BANIR LEMA UNIP.LDA, manan bazeia ba rekizitu  ne’ebé iha ho valór tékniku di’ak no finansial ki’ik.

Haree bá situasaun sira ne’ebé empreza BANIR LEMA UNIP.LDA, hasoru, Diretór empreza halo ona karta pedidu atu husu estensaun bá obra refere tamba kuaze fulan hirak mak empreza la halo servisu tamba hein de’it prosesu tékniku sira ne’ebé iha hodi garante kualidade obra refere.

“Agora mak ami atu husu atu extende tan fulan-neen (6), maibé fulan-neen (6) ne’e ita haree estrutura sei barak hela, ne’e la’ós uma bai-bain, uma ne’ebé ho durasaun bá tempu naruk tamba ne’e mak ami husu extende tan,” Nia hateten.

Empreza BANIR LEMA UNIP.LDA, la abandona servisu no traballadór sira kontinua servisu maibé tamba iha prosedimentu tékniku balun ne’ebé presiza fó espasu atu bele garante kualidade nune’e empreza laiha atividade hodi hein servisu kontinuasaun.

To’o oras ne’e empreza kontinua servisu hodi hein extensaun kontratu husi MAPKOMS, atu nune’e bele finaliza obra konstrusaun bá edifísiu “provizóriu” RTTL ne’e ho kualidade.

Project Maneger BANIR LEMA UNIP.LDA, Silvério de Carvalho, esplika katak prosesu konstrusaun bá edifísiu RTTL han tempu tamba tenke tuir prosedimentu tékniku ne’ebé iha atu garante kualidade obra refere.

Hahú ho halo mudansa bá ai rin eletrisidade, site plan no halo eskabasaun bá fatin konstrusaun hodi hasai rai no ateru ho rai-henek no remata tiha halo pemadatan no kontinua nahe plástiku, no cor link, nahe besi no rin pedestial hotu nahe ka cor.

“Nahe ka cor ho 30 MPA ne’e nia tempu ne’ebé fó para labele book iha nia leten ne’e loron 28, no iha tempu ida ne’e empreza l ahalo servisu tamba atu garante kualidade tenke tuir prosedura tékniku ne’ebé iha,” Silvério de Carvalho hateten.

Nia hatutan prosesu cor ba moru hale’u ne’ebé nia kapasidade 25 MPA no cor dala-rua nune’e tuir regra estrutura ne’ebé iha liu tiha loron 28 mak foin halo fali kisting ba ain pedestial hodi cor no hafoin ida ne’e kontinua ho ateru no prosesu sira ne’e la’o too ohin loron obra ne’e sei kontinua.

Nia subliña prosesu konstrusaun ne’ebé iha tenke la’o tuir prosedimentu tékniku nune’e kada servisu ne’ebé empreza halo sempre buka atu mantein nia kualidade.

Lee Mós : Konstrusaun Edifísiu “Provizóriu” RTTL,E.P Sei Gasta Millaun $1-resin

Jornalista : Vito Salvadór