Hatutan.com, (12 Janeiru 2023), Dili-Xefe Estadu Maiór FALINTIL-Forsa Defeza Timor-Leste (F-FDTL), Tenente Jenerál Domingos Raúl “Falur Rate Laek”, deklara F-FDTL sei la intervein servisu sira Polísia Nasionál Timor-Leste (PNTL) nian kona-bá seguransa interna.

Lee Mós : Orgullu ho Dezenvolvimentu Komponente Navál

FALINTIL-Forsa Defeza Timor-Leste (F-FDTL). Foto/Elio dos Santos da Costa

“Ha’u hatete bá ita-boot sira, ida seguransa interna, ami sei la halo. Lei mak hanorin ami, regulamentu, regra empeñamentu mak hanorin ami,” Tenente Jenerál “Falur Rate Laek” hateten bá jornalista sira hafoin seremónia aniversáriu Komponente Navál iha baze Navál-Hera, Kinta (12/01/2023).

Falur dehan, iha operasaun konjunta entre F-FDTL ho PNTL, foin lalais, tanba bazeia bá diretiva polítika ida ne’ebé nia rasik ho Segundu KomandanteJjerál PNTL, Komisáriu Polisia Mateus Fernandes halo, hodi empeña sira-nia forsa rua, liu-liu bá Servisu sira informasaun nian Polisia Militár (PM). Maibé depois ida-ne’e, Komandu Jenerál F-FDTL estuda no avalia fali rezultadu sira-ne’e, ladi’ak, durante situasaun ne’ebé mak foin mosu. Tanba ida ne’e maka, ho situasaun sira ikus-ikus ne’e mosu, Falur lakohi nia membru sira halo fali servisu bá seguransa interna nian.

“Ha’u dehan lae, ami nian, hamoos uluk ha’u nia uma-laran, hadi’a uluk ha’u nia uma-laran, Polisia Militár ne’e, lei ho ordém bá militar sira. Ne’ebé, militar sira ne’ebé envolve iha problema sira, sira bá aborda. Sira ne’ebé tun iha terrenu mak laiha lisensa pasaporte fim de semana, sira aborda. Sira ne’ebé uniforme la diak iha públiku, sira bá aborda,” Falur Rate Laek afirma.

Jornalista: Rogério Pereira Cárceres