Hatutan.com, (18 Janeiru 2023), Díli—Arsebispu Metropolitana Díli, Sua Eminênsia Dom Virgílio Kardeál do Carmo da Silva, SDB, nomeia Padre Graciano Santos Barros nu’udár Vigáriu Jerál bá Arkedioseze Díli, iha loron 17 Janeiru 2023 iha Kaza Padre sira nian Fatumeta, Díli.

Arsebispu Metropolitana Díli, Sua Eminênsia Dom Virgílio Kardeál do Carmo da Silva, SDB, fó pose bá Padre Graciano Santos Barros nu’udár Vigáriu Jerál bá Arkedioseze Díli, iha loron 17 Janeiru 2023 iha Kaza Padre sira nian Fatumeta, Díli. Foto/Arkedioseze Díli.

Nomeasaun ne’e Dom Virgílio halo hodi susbstitui Matebian Monseñor José António da Costa tanba  depois de Nia mate Arkedioseze Dili laiha Vigáriu Jerál.

Lee Mós: Mgr. José António da Costa Remata Peregrinasaun iha Mundu

Tanba ne’e, tuir Diretu Kanóniku, devér dioseze ida nian maka, Bispu temke substitui duni Vigáriu Jerál ida tuir Kanóniku hateten.

“Tanba nesessidade Urjênsia ho intensaun bele orienta no minimiza governativa jerál Hitu Arkedioseze ninian no Ha’u halo Ona konsulta ho amu-lulik balun no haree ba dedikasaun servisu nian maka ha’u deside hodi hili Ona Reverendo Padre Graciano Santos Barros nu’udár Vigáriu Jerál ba Arkedioseze Díli nian,” Dom Virgílio lee despaixu iha serimonia pose.

Dom Virgílio husu ba sarani sira hamutuk atu fó apoiu ba Vigáriu Jerál foun no reza tulun ba nia, harohan da’et atu nia bele sai kolaboradór di’ak bá servisu sira Maromak Nian iha Arkedioseze Díli.

Fo hanoin katak, desde tinan 2016 Monseñor José António da Costa mak assume kargu hanesan Vigáriu Jerál Arkedioseze Díli nian to’o iis kotu iha Hospital Nasional Guido Valadares (HNGV) iha Kuarta (28/12/2022) tuku 02:00 madrugada.

Oras-ne’e daudaun, Vigáriu Jerál foun maka Padre Graciano Santos Barros hanesan mós Vigáriu Judisiál Tribunál Ekleziástika Arkedioseze Metropolitana Díli.

Jornalista: Vito Salvadór