Hatutan.com, (26 Janeiru 2023), Díli- Assosiasun Difisiénsia Timor-Leste (ADTL), husu Sekretáriadu Tékniku Administrasaun Estatal (STAE) ho Komisaun Nasionál Elisaun (CNE, sigla portugés), atu produz boletim votu bá eleisaun parlamentár 2023 tenke asesibel nune’e ema ho defisiénsia bele asesu no ezerse sira-nia direitu ho di’ak.

Maneger Programa ADTL, Veronica Tilman. Foto/Elio dos Santos da Costa

Maneger Programa ADTL, Veronica Tilman hateten, daudauk ne’e servisu hamutuk ho parte STAE-CNE oinsá atu haree kona-bá produsaun boletim  votu ne’ebé asesibel iha eleisaun parlamentár 2023.

“Ami mós tau ona iha planu sira bá oin ami haree maka’as bá asuntu ida ne’e tenke prioritiza duni tanba ema ho difisiensia kada tinan lima sira tenke asesu bá iha votasaun, sira mós hakarak tenke vota ida ne’ebé segredu lakohi atu ema seluk apoiu sira, sira tenke ezerse sira nia direitu ne’ebé sekretu iha momentu ida ne’e,” Veronica Tilman bá jornalista sira iha Palásiu Prezidensiál, Kinta (26/01/2023).

Asesór Prezidente Repúblika bá asuntu Sosiál no Inkluzaun, Gaspar Afonso haktuir, iha tinan kotuk ho ekipa kiik oan ida hosi UNDP fasilita fundus hosi STAE-CNE halo vizita ida ba Indonézia, tanba eleisaun kada períodu tinan lima ema ho defisiénsia matan ka tilun vota ne’e eleisaun asesibel.

CNE sira haree ho matan akompaña direita katak ema ho difisiensia matan sira bele vota mesak sem akompaña hosi ninia família, kolega ka brigada STAE.  Sira  bá vota mesak tanba iha fasilidade ida ne’ebé fasilita nia mak templat brille.

UNDP ho STAE rasik enkontru ho CNE, CNE mós mai relata ba Prezidente Repúblika, atu husu katak tinan 2023 mais menus bele realiza mehi ida ne’e katak eleisaun parlamentár 2023 ema ho difisiensia matan sira ne’ebé hatene ona lee letra braille, no hakerek sira bele útiliza tempel braille hodi bá vota.

“Atu aplika ida ne’e, fila fali ba ministru relevante atu lori ba Konsellu Ministru fó espasu ba ema ho difisiensia iha lei eleitorál ne’e, tanba daudaun ne’e sira dehan lei eleitorál ne’e mak l’a fó dalan, ita husu ba ministru relevante nune’e lori ita nia asuntu ne’e diksute iha Kosnellu Ministru no lori ba Parlamentu Nasionál,” Gaspar Afonso hateten.

Totál ema ho defisiénsia iha territóriu timor laran tomak 38.118 no ema ho difisiensia matan hamutuk 1414.000.

Jornalista: Vito Salvadór