Hatutan.com, (05 Abríl 2023), Díli- Órgaun eleitorál Sekretáriadu Tékniku Administrasaun Estatal (STAE), Comissão Nasionál das Eleições (CNE) hamutuk ho partidu polítiku (ParPol) sira, Kuarta (5/4/2023),  iha Salaun Lalini Lariguto, Díli, halo ona validasaun boletín  votu bá eleisaun parlamentár (ElPar) 2023.

Lee Mós : CNE Sei Organiza Semináriu Nasionál Fasilita ParPol Hato’o Vizaun Polítika ho Programa

CNE, STAE ho reprezentante ParPol sira halo validasuan bá boletín votu iha Salaun Lalini Lariguto, CNE, Díli, Kuarta (5/4/2023). Foto/Elio dos Santos da Costa

Iha validasaun ne’e maioria ParPol sira konkorda ho modelu boletín votu ne’ebé STAE aprezanta tuir proposta hosi kada partidu  tuir lei eleisaun parlamentár, hafoin hetan konkordánsia no aprovasaun hosi Komisáriu sira CNE nian.

Órgaun eleitorál sira hamutuk ho ParPol hotu halo kedas asinatura validasaun nian bá iha dokumentu ne’ebé CNE prepara hanaran “Aprovasaun modelu boletín votu bá eleisaun parlamentár 2023”

Prezidente CNE, José Agustinho Belo bá jornalista sira iha salaun Lalini CNE, Colmera, hateten iha boletín votu ne’ebé STAE prepara iha modelu rua; katak iha boletín votu ida uza númeru sorteu ne’ebé dada iha Tribunál Rekursu no ida seluk la uza númeru sorteu, maibé maioria Parpol ne’ebé atu konkorre iha ElPar 21 fulan-Maiu 2023, konkorda ho boletín votu ne’ebé uza númeru sorteu.

“Há’u hanoin validasaun bá boletín  votu maioria ParPol konkorda no konsta deit ho saida mak partidu sira hakarak, no konteúdu iha boletín votu nafatin tuir saida mak partidu ida-idak apresenta no lao tuir regras ka lei ne’ebé iha,” Prezidente CNE José Agustinho Belo esplika.

Prezidente CNE sublina katak iha emblema ParPol sira nian iha boletín votu bele iha foto lideransa partidu nian iha laran, la problema tamba foto ne’e dehan ida ne’ebé  kaer hodi les ne mak dehan foto mais ida ne’ebé iha boletín  votu ne’e emblema.

Prezidente STAE, Acilino Manuel Branco hato’o obrigadu uain tamba bele hasoru malu tán ho reprezentante ParPol  sira hotu hodi fó apresiasaun no sai mós hanesan testamuña bá aprovasaun bá matéria sira importante bá eleisaun ninian hanesan iha semana kotuk halo ona bá tinta no ohin haree espesífiku liubá iha modelu boletín votu.

Kona-bá modelu boletín votu rasik prosesu ida ne’ebé lao tuir lei, no bainhira Tribunál Rekursu halo tiha sorteu orgaun eleitorál sira komunika kedas ho ParPol sira hotu tuir lei eleisaun parlamentár nian iha ne’ebá defini mós STAE nia kompeténsia atu simu deit saida mak partidu ida-idak hato’o bá iha STAE no sei ajusta bá iha modelu ne’ebé STAE rasik prepara tiha ona.

“Tuir lei ami halo tuir deit saida mak defini tuir lei eleisaun parlamentár nian iha artigu 39 lei númeru 6/2016 no bá kuarta alterasaun lei númeru 9/2017 rasik. Iha modelu boletín votu ne’e rasik hateten momos kona-bá saida mak hateten iha lei. Hanesan proposta ida tuir lei 39 ne’e rasik atribui kompeténsia bá iha CNE atu aprova modelu boletín votu ne’ebé mak STAE apresenta,” Acilino Manuel Branco hateten.

CNE, STAE ho reprezentante ParPol sira halo validasuan bá boletín votu iha Salaun Lalini Lariguto, CNE, Díli, Kuarta (5/4/2023). Foto/Elio dos Santos da Costa

Diretor jerál STAE ne’e hatutan iha konteúdu prinsipál husi boletín votu sei kontempla logo tipu RDTL no mós STAE nian ho títulu Eleisaun Parlamentár ho lingua tétum, no tuir mai iha mos Eleisaun Parlamentár iha lian portugés.

Tuir artigu 39 lei eleisaun parlamentár hateten mós katak elementu ne’ebé kontempla iha boletín votu iha parte importante tolu ida mak denominasaun katak partidu polítiku sira nia naran tuir notifikasaun hosi Tribunal Rekursu bá STAE no CNE, maibé liu-liu liga ho ida ne’ebé maka submete hosi partidu polítiku ida-idak no ida tuir fali mak sigla ne’ebé ho letra kapital no bandeira ka emblema partidu polítiku sira ida-idak nian no ikus mak kuadradu ida bá eleitor sira hodi fó sira nia eskolla.

Nia sekuénsia iha boletín votu tuir ordenamentu sorteu ne’ebé iha no kualidade surat tahan tuir artigu 39 katak surat tahan ne’ebé la transparante, ho kualidade 80 grau, ho nia tamañu ka luan 20 no naruk 60 (20×60) no sei bele akomoda ho diak tebes elementu sira ne’ebé ohin temi iha leten.

“Kona-bá naran partidu, emblema no sigla partidu nian ami tau konkretamente saida mak ami simu hosi ita bo’ot sira, ami laiha kompeténsia atu hamenus virgula ka pontu ida, tamba STAE laiha kompeténsia atu halo ida-ne’e,” Nia informa.

Hafoin validasaun ne’ebé halo iha salaun Lalini Larigutu CNE, orgaun eleitorál sira hanesan STAE no CNE hamutuk ho partidu polítiku sira hotu bá direitamente iha fatin produsaun boletín votu iha Grafika Nasionál atu halo obsevasaun no direitamente haree prosesu produsaun bá boletín votu.

Jornalista: Vito Salvadór