Hatutan.com, (31 Janeiru 2023), Díli—Nasaun Bulgária sei tulun Timor-Leste (TL) liu hosi oferese formasaun oioin atu bele prepara hodi apoia adezaun TL bá Asosiation of Southeast Asian Nation (ASEAN).

Embaixadór Bulgária, Peter Andonov hasoru-malu ho Prezidente Repúblika, José Ramos-Horta iha Palásiu Prezidensiál Nicolau Lobato Bairru-Pité, Tersa (31/01/2022). Foto/Média PR.

“Ha’u-nia rai-Bulgaria suporta TL atu sai membru iha ASEAN. Ami gosta tebes ajuda Timor-Leste hodi prepara didi’ak no prepara nanis atu sai membru ba ASEAN,” Embaixadór Bulgária, Peter Andonov hateten iha Palásiu Prezidensiál Nicolau Lobato Bairru-Pité, Tersa (01/02/2022).

Lee Mós: Estadu TL Kondekora Embaixadór Xina ho Medalla Méritu

Iha loron 21 fulan-janeiru tinan ida-ne’e, Bulgária ho TL marka aniversáriu ba da-20 kona-bá estabelesimentu relasaun diplomátika entre rai-rua, no diplomata ne’e konsidera hanesan momentu ida-ne’ebé di’ak tebes, atu hametin liu tán realasaun bilaterál.

Iha okaziaun ne’e Bulgária bele fahe esperiénsia tanba antes ne’e Bulgaria mós kobre kritériu barak iha prosessi atu sai membru Uniaun Europeia, no konsege sai membru iha tinan 2007.

Tanba ne’e, ho vontade tomak Bulgária hakarak duni atu oferese formasaun ba rekursu umanu TL nian inklui hakarak atu hahú relasaun bilaterál ne’ebé ativu tebes iha futuru ba Komérsiu no kooperasaun ekonómika inklui área edukasaun nian hodi lori estudante Timoroan sira mai estuda iha Universidade Lian Inglés iha Bulgaria.

Nia mós hato’o mensajen hosi Prezidente Repúblika Bulgária nian katak, buat ne’ebé importante tebes maka  Kooperasaun, iha diálogu polítiku, investimentu Komérsiu, kooperasaun ekonómika, no Edukasaun.

Jornalista: Vito Salvadór