Hatutan.com, (08 Fevereiru 2023), Díli– Ministériu Públiku (MP) deside arkiva parsiál  kazu Krime Violasaun bá Segredu Justisa ne’ebé envolve jornalista  Raimundos Oki ho Fernado Egidio Amaral.

Lee Mós : Jornalista Raimundos Oki Sai Arguidu Bá Kazu Violasaun Segredu Justisa

Jornalista Raimundos Oki hamriik iha arredores Edífisiu PCIC. Foto/Hatutan.com

Liuhosi karta Mandadu Notifikasaun Ministériu Públiku nian ne’ebé dirize bá  arguido Raimundos Oki no arguido Fernando Egido Amaral  bá kazu Violasaun bá Segredu Justisa, katak iha loron 30 fulan-Janeiru 2023, Ministériu Públiku hatún despaxu arkivamentu hasoru arguido na’in-rua nia kazu ne’e.  

Ministériu Públiku mós deklara ensera inkéritu bá prosesu kazu ho Númeru Úniku Kriminál  (NUC, sigla portugés) 0054/21.PGGCC.

Liuhosi dokumentu notifikasaun Ministériu Públiku  nian bá arguido na’in-rua ne’ebé Hatutan.com asesu relata, iha autos hatudu katak  laiha prova ka indísiu ruma bá verifikasaun krime inkéritu hodi indika arguido Ramundos Oki no Fernando Egidio Amaral la’ós nu’udár partisipante prosesuál, tanba ne’e, determina arkivamentu parsiál relasiona ho krime Violasaun bá  Segredu Justisa, haktuir artigu 235 númeru 1 a1 a)hosi K.P.P (Kódigu Prosesu Penal).

Bainhira iha elementu foun ne’ebé mak relevánsia bá investigasaun krime Violasaun bá Segredu Justisa, ofisiozamente ka tuir rekerimentu sei re-abertura prosesu ida-ne’e tuir artigu 235 númeru 3 hosi K.P.P.

Raimundos Oki, jornalista no Xefe Redasaun mídia online The Oekusi Post (TOP) ne’ebé sai arguido bá kazu Violasaun bá Segredu Justisa  ne’e bainhira Hatutan.com konfirma  kona-bá prosesu ne’e hateten, nia simu ona notifikasaun hosi Ministériu Públiku kona-bá arkivamentu parsiál bá kazu ne’e.

Jornalista, xefe redasaun no na’in bá mídia online  The Oekusi Post (TOP), Raimundos Oki, sai arguidu bá kazu Violasaun bá Segredu Justisa relasiona ho publikasaun notísia  sira kona-bá kazu Topu Honis iha Rejiaun Administrativa Espesiál Oé-Cusse Ambeno (RAEOA).

Iha loron 30 fulan-Juñu 2022 Raimundos Oki, presta deklarasaun iha Policia Ciêntífica e de Investigação Criminal (PCIC).

Notifikasaun bá inkéritu hosi PCIC bá jornalista Raimundo Oki ne’e tanba simu delegasaun kompeténsia hosi Prokuradoria Jerál Repúblika (PGR-sigla Portugés) ka Ministériu Públiku (MP) ho NUC. 0054/21.PGGCC.

Jornalista no na’in bá média online The Oekusi Post (TOP) ne’e hateten, hanesan sidadaun nia sempre no kontinua koopera ho justisa.

Jornalista: Rogério Pereira Cárceres