Hatutan.com, (14 Abríl 2023), Díli- Prezidente Repúblika (PR), José Ramos-Horta, husu atu membru FALINTIL-Forsa Defeza Timor-Leste (F-FDTL) labele involve iha atividade polítika durante kampaña to’o eleisaun parlamentár 2023.

Lee Mós : Luta Hamutuk Kestiona Atitude Pesoál Membru F-FDTL-PNTL Sadik Malu iha Diskoteka Sira

PR José Ramos-Horta transmite mensajen ne’e direitamente bá Xefe Estadu Maior Jenerál F-FDTL, Tenente Jenerál Domingos Raul “Falur Rate Laek”, liuhosi sorumutuk regular ne’ebé hala’o iha Palásiu Prezidensiál, Díli, Sesta (14/4/2023).

Xefe Estadu Maior Jenerál F-FDTL, Tenente Jenerál Domingos Raul Falur Rate Laek. Foto/Elio dos Santos da Costa

Xefe Estadu husu atu F-FDTL  kontribui no apoiu  bá iha seguransa nian atu asegura eleisaun parlamentár tinan ne’e lao ho susesu.

“Prezidente Repúblika José Ramos Horta nia instrusaun ne’ebé ohin fó bá F-FDTL mak forsa tenke preparadu atu partisipa no asegura ho másimu eleisaun parlamentár 2023, membru F-FDTL labele envolve iha atividade polítika, tenke implementa disiplina, militár labele bá mete problema tun-sa’e no halo arbiru hasoru sidadaun,” Tenente Jenerál  Falur Rate Laek haktuir bá jornalista sira.

Kuartel  Jenerál F-FDTL simu ona diretiva polítika kona-bá oinsá mak FF-FDTL bele apoiu seguransa bá eleisaun parlamentár hamutuk ho PNTL,  tanba ne’e sei komunika ho kada Komandu atu haree ida ne’e atu forsa bele partisipa iha seguransa ho forma ida diak.

Kona-bá lojístika bá membru F-FDTL sira ne’ebé sei apoiu seguransa durante kampaña no eleisaun parlamentár, Tenente Jenerál Falur Rate Laek dehan, parte lojístika sei prepara hanesan transporte, komunikasaun, ai-moruk, no ekipamentu sira seluk ne’ebé tenke preparadu no ida ne’e presija planu ida integradu.

Sei Simu Aplikante bá Rekrutamentu Espesiál

Tenente Jenerál Falur Rate Laek afirma komandu Jerál  F-FDTL sei halo rekrutamentu espesiál bá membru F-FDTL ne’ebé ho nivél mestradu (S2), hahú daudaun ona no despaxu iha tiha ona, no komisaun rekrutamentu forma ona no la kleur tan sei hahú simu kandidatu sira ne’ebé hakarak aplika.

“Iha rekrutamentu espesiál ne’e, sei tau liu prioridade bá kandidatu sira ne’ebé hasai espesialidade iha kursu jornálistika, hakerek istoriadór no área espesialista ne’ebé komandu nesesita,” Falur Rate Laek afirma.

Jornalista: Vito Salvadór