Hatutan.com, (10 Fevereiru 2023), Díli—Igreja Katólika Timor-Leste liu hosi Conferência Episcopal Timorense (CET), tau millaun $3-resin, hodi konstrui edifísiu foun CET nian iha laletek Debu Meta Dare atu bele fasilita di’ak liután servisu servi públiku liu-liu sarani sira.

Conferência Episcopal Timorense (CET) tau fatuk inan ba konstrusaun edifísiu foun CET iha Debu Meta Dare, Sesta (10/02/2023).

Prezidente CET no Bispu Dioseze Maliana, Dom Norberto do Amaral hateten, iha laletek Debu Meta Dare ida-ne’e, ohin marka istória ida iha Igreja Katólika Timor-Leste nia naran.

Lee Mós: CET Estabelese Tribunál Ekleziástiku Interdiosezanu Baucau no Maliana

Hotu-hotu halibur iha ne’e ho objetivu ida, atu halo lansamentu fatuk dahuluk ba edifísiu Conferência Episcopal Timorense nian.

Advertisement

Lansamentu fatuk ida-ne’e mak CET hala’o ba dala uluk hodi harii edifísiu ba CET duni no empreza Holgapa mak sei kaer konstrusaun, hein katak empreza konstrutór sei lori ida-ne’e ho didi’ak tuir ema hotu nia espetativa.

“Edifísiu ne’e iha andar rua ho forma manu pombu ne’ebé semo hodi hamahon ita ne’ebé iha sidade Díli atu iha nia mahon ho didi’ak,” Dom Norberto do Amaral hateten hafoin tau fatuk inan ba konstrusaun edifísiu foun CET iha Debu Meta Dare, Sesta (10/02/2023).

Konstrusaun edifísiu ne’e sei la’o durante tinan tolu no fonte ba orsamentu rasik mai hosi subsídiu governu ne’ebé atribui ba Igreja Katólika Timor-Leste.

“Ha’u husu ba empreza Holgapa ne’ebé sei kaer obra ne’e atu kaer didi’ak obra ne’e, lori didi’ak no hala’o didi’ak nune’e bele finaliza tuir tempu markadu,” Dom Norberto do Amaral fó-hanoin.

Conferência Episcopal Timorense (CET) tau fatuk inan ba konstrusaun edifísiu foun CET iha Debu Meta Dare, Sesta (10/02/2023).

Dom Norberto agradese bá Maromak, obrigadu ba hotu-hotu nia prezensa,  ba eminência Dom Virgílio Cardeal do Carmo da Silva, Monseñor Marco Sprizi, ba reprezentante Governu, Ministru Finansas no Ministru Obras Públikas, komandante PNTL munisípiu Díli no reprezentante F-FDTL inklui hotu-hotu ne’ebé ohin sai sasin kona-bá eventu ida ne’ebé marka tebe-tebes iha istória Igreja nian.

Na’in ba empreza Holgapa, Faustino Godinho Gonçalves da Costa hateten, iha kompromisu atu finaliza obra ne’e ho di’ak no sei garante nia kualidade tuir dezeñu ne’ebé iha.

Advertisement

“Ha’u garante no promete atu finaliza tuir tempu tanba ne’e hanesan primeira vez mak ha’u manán tenderizasaun ba konstrusaun ne’ebé Igreja Katólika iha. Tanba ne’e ha’u garante sei halo hotu tuir kontratu ho kualidade,” nia promete.

Tuir kontratu ho Igreja Katólika liu hosi CET, konstrusaun ba edifísiu ho pezu andar rua ne’e sei termina iha 2026.

Jornalista: Vito Salvadór

Advertisement