Hatutan.com, (09 Fevereiru 2023), Díli—Prezidente Repúblika (PR), José Ramos-Horta haksolok hodi simu Livia dos Santos iha Palásiu Prezidensiál, hafoin iha tempu naruk nia laran ba hala’o tratamentu saúde iha ospitál MRCC Siloam Hospitals Semangi Jakarta Indonézia no fila hikas mai Timor-Leste (TL).

Livia dos Santos ne’ebé rekopera hosi kankru hamutuk ho nia aman no inan Julião dos Santos Gonçalves ho Delfina dos Santos hosi Suku Lauhata, Postu Administrativu Bazartete, Munisípiu Liquiça, agradese ba Prezidente Repúblika, José Ramos-Horta, Kinta (09/02/2023). Foto/Média PR.

Lídia dos Santos tinan 11 ne’ebé sofre kankru iha ain parte karuk, ba hala’o tratamentu iha ospitál MRCC Siloam Hospitals Semangi Jakarta Indonézia, hafoin hetan apoiu hosi Prezidente Repúblika, José Ramos-Horta liu hosi Gabinete apoiu sosiedade sivil ne’ebé hala’o identifikasaun ba Livia dos Santos iha nia hela fatin Suku Lauhata, Postu Administrativu Bazartete, Munisípiu Liquiça.

Lee Mós: Família Saudozu Komandante “Galimoruk” no Ramos-Horta Agradese Komunidade-Governu Harii Monumentu bá Erói Sira

Hosi apoiu ne’e, kosege halo tratamentu bá dokumentu sira no iha loron 19 Agostu 2022, Lídia dos Santos arranka ba Indonézia ne’ebé hala’o duni operasaun ba kankru ain ho susesu.

“Istória furak ne’ebé halo ha’u laran haksolok, kosok oan Livia dos Santos fila hosi Jakarta ho isin di’ak,” Prezidente Repúblika,José Ramos-Horta hateten iha komunikadu, Kinta (09/02/2023).

Antes ne’e Livia dos Santos ain-tuur bubu boot, la halo tratamentu loloos, tanba hetan kankru. Iha Jakarta médiku sira haree Livia ho domin.

Doutor sira hateten tenki halo amputasaun ka tesi sai tiha hosi ain-tuur. Situasaun ne’e halo Livia nia inan no aman triste loos.

“Livia dos Santos fila ona mai rai doben Timor-Leste. Ohin mai vizita Prezidénsia Repúblika. Nia  kontente loos, apa no ama mos kontente. Fulan Abril tenki fila dala ida tan. Tratamentu kumpletu mak ita haree tau Livia iha eskola espesiál,” Ramos-Horta hateten.

Xefe Estadu mós husu nafatin  atu assesór Sosiedade Sivil Palásiu Prezidensiál Quintiliano Moniz Carvalho ho funsionáriu Prezidénsia Repúblika ajuda trata nafatin hodi kompleta dokumentus Livia ho nia inan aman nian.

Julião dos Santos Gonçalves aman hosi Livia dos Santos agradese Prezidente Repúblika José Ramos-Horta tanba ho domin boot tau-matan ba Livia dos Santos nia moras ne’ebé sofre durante tinan rua liu ikus mai hetan isin diak.

“Durante ami halao tratamentu iha Hospital iha Jakarta hetan apoiu másimu husi Prezidénsia Repúblika liu-liu fasilita orsamentu ba tratamentu no trasporte nian hodi kontinua halo check-up hafoin de operasaun no mós tulun hosi Ministériu Saúde liu-liu alimentasaun ka hahan durante iha Jakarta,” Julião dos Santos Gonçalves hateten.

Livia dos Santos hateten hafoin hetan tratamentu nia hakarak kontinua eskola nafatin hodi atinze nia mehi iha futuru.

“Há’u sei estuda makas atu sai doutora iha futuru,” Livia dos Santos hateten.

Asesór Apoiu Sosiedade Sívil Prezidénsia Repúblika, Quintiliano Moniz Carvalho hateten, Livia dos Santos nia moras Prezidente Repúblika rasik hatene liu hosi média tanba ne’e orienta kedan gabinete atu ba iha terrenu hodi buka hatene no haree direita nia kondisaun nune’e bele halo prepasaun no buka kondisaun ba halo tratamentu iha liur.

Hafoin haree tiha Livia dos Santos nia kondisaun buka kedan ajuda, trata dokumentu hamutuk ho Ministériu Saúde, hodi lori sira ba to’o Indonézia hodi halo tratamentu.

Atu fo hanoin katak Livia dos Santos antes ba halo tratamentu iha ospitál MRCC Siloam Hospitals Semangi iha Jakarta Indonézia, Livia dos Santos frekuenta hela nia estudu iha eskola Bázika Katólika Aipelu, ho 4 klase.

Livia  dos Santos oan hosi Julião dos Santos Gonçalves no Delfina dos Santos no daudaun ne’e hela iha Suku Lauhata, Postu Administrativu Bazartete, Munisípiu Liquiça.

Jornalista: Vito Salvadór