Hatutan.com, (13 Fevereiru 2023), Díli-Partidu polítiku sira ne’ebé hetan lejitimidade hosi Tribunál Rekursu, daudaun ne’e, tuun bá baze halo konsolidasaun maka’as atu hetan konfiansa hosi povu ka eleitór sira iha eleisaun parlamentár ne’ebé sei halo loron 21 fulan-Maiu 2023.

Kandidata PR 2022-2027, Armanda Berta dos Santos akompaña husi Konselleiru Másimu Partidu KHUNTO, José dos Santos “Naimori” ensera kampaña iha Kampu Alor, Dili, 16 Marsu 2022. Foto/Dok.Hatutan.com

Tátika polítika no retórika oioin partidu sira halo daudaun iha povu nia leet sira atu bele hetan votu hodi fila bá tuur iha Parlamentu Nasionál no forma Governu foun bá periodu 2023-2028.

Iha ámbitu dalan bá eleisaun parlamentár ne’e, teki-teki mosu novidade katak akontese daudaun konflitu iha internal Partidu Kmanek Haburas Unidade Nasionál Timoroan (KHUNTO) nia laran.

Sekretáriu Jerál Partidu KHUNTO atuál Ministru Transporte no Komunikasaun (MTK), José Agustinho da Silva, halo ‘karta aberta ida  hodi expressa no halo apelu bá kuadru, militante no simpatizante sira KHUNTO nian iha teritóriu tTimor-Leste kona-ba nia lamentasaun no insatisfasaun bá situasaun sira iha internal partidu KHUNTO nia laran.

“Durante ne’e ha’u nonok hodi akompaña, maibé tempu to’o ona ha’u atu deklara katak uainhira partidu KHUNTO hetan asentu iha parlamentu nasionál, partidu hetan subvensaun, maibé durante ne’e ha’u nu’udár Sekjer asina cheque  no asina relatóriu submete bá CNE, maibé ezekusaun bá osan ha’u laiha koiñesimentu,” sita karta aberta José Agostinho da Silva nian ne’ebé Hatutan.com asesu, Segunda (13/2/2023).

José Agostinho dehan, nu’udár Sekjer iha inísiu kedas nia hakarak osan subvensaun partidu nian ne’e, transfere bá konta bankária kada munisípiu atu nune’e bele jere rasik atividade sira.

“Maibé buat hirak ne’e ha’u koalia, ha’u mak sala fali. KHUNTO sai buras tanba kontribuisaun ema barak nian, maibé ohin loron Partidu KHUNTO nia lala’ok oin seluk hodi la konsidera ha’u nu’udár Sekjer,” José Agostinho kestiona.

La’os ne’e de’it, José Agostinho da Silva rona ona mós katak, lider supremu no prezidente partidu KHUNTO, nomeia ona Sekjer Interina to’o realiza kongresu extra-ordináriu hodi hili Sekjer foun. Maibé, José Agostinho dehan, ninia lejitimidade, delegadu sira mak fó liuhosi kongresu nasionál, tanba ne’e nia sei nafatin hola pozisaun nu’udár Sekjer iha Partidu KHUNTO.

“Sekretáriu Jerál Interina ha’u konsidera ilegál ho nune’e dokumentu relatóriu ezekusaun orsamentu subvensaun ne’ebé Sekjer Interina asina ilegál mós,” José Agustinho da Silva afirma.

Sede Nasionál Partidu KHUNTO. Foto/Hatutan.com

Ho problema barak ne’ebé mak akontese iha partidu KHUNTO, tuir José Agostinho, la hatudu transparánsia ezekusaun orsamentu ne’ebé hetan hosi Estadu bá Partidu Polítiku hotu.

“Liuhosi biban ne’e ha’u hakarak alerta bá kuadru sira Partidu KHUNTO hosi Nasional to’o baze katak partidu KHUNTO uluk ho agora la hanesan,”  José Agustinho hateten.

José Agostinho hatutan, nu’udár Sekretáriu Jerál bá partidu, nia hatene katak Partidu KHUNTO iha osan barak hodi apoiu orsamentu bá  realiza atividade konsolidasaun, kampaña no tama uma sai uma hodi hasoru eleisaun 2023, no mós osan selu ba fiskál  sira iha Sentru Votasaun.

“Uainhira laiha apoiu ruma hosi nasional di’ak liu para tanba agora la’ós tempu atu husu ezmola sumbangan. Hatutan ha’u nia mensajen ne’e bá ema hotu. Obrigadu,” José Agostinho tenik iha nia karta aberta ne’e.

Naimori Dehan José Agostinho La Ativu

Iha sorin seluk, Konselleiru másimu no  lider supremu partidu KHUNTO, José dos Santos Bucar “Naimori” hatán katak, tuir loloos ezekusaun bá subvensaun partidu nian ne’e, sekretáriu jerál mak hatene liu serbisu ida ne’e. Maibé, tanba la ativu, nune’e ‘nia labele asina’.

Sekretariu Jerál Partidu KHUNTO, José Agustinho da Silva. Foto/Hatutan.com

“Buat ne’e, tuir loloos, nia mak tenke halo servisu. Nia mak ema dehan pengerak partidu nian ne’e, sekretáriu jerál. Primeiru, tuir loloos, nia mak hatene liu, nia mak tenke ativu haree orsamentu ida ne’e. Nia la ativu ne’e, halo nusá mak assina. Segundu, kuandu nia hatene mak, nia lori assina. Sé nia lahatene, labele assina,” José dos Santos Bucar “Naimori”, hateten bá Hatutan.com iha via-telefónika.

Konselleiru másimu bá partidu KHNTO ne’e dehan, durante ne’e, Sekjer José Agostinho sempre bá assina. Signifika, nia hatene, nia labele dun bá sé. Hosi ne’ebá kedas, nia mak assina hela de’it, halo nusá mak nia lahetene fali.

“Ne’ebé hanesan ne’e de’it, ami seidauk iha komentáriu bá ida ne’e,” Naimori hatete ho hamnasa.

Kona-bá José Agostinho nia rekomendasaun bá estrutura partidu KHUNTO ne’ebé husu atu labele halo kobransa ka ezmola bá militante sira hodi hala’o atividade partidu, tanba partidu rasik iha osan, Naimori hatán katak, durante ne’e seidauk iha ema ida halo kobransa ka halo ezmola ba militante sira.

“Durante ne’e, orientasaun ida halo kobransa osan ne’e, seidauk iha ida. Nia mak halo karik, mais iha ne’e, nunka mais, seidauk,” Naimori rejeita.

Kona-bá kuadru partidu balu ho inisial LS ho Prezidente KHUNTO ne’ebé planea ona atu hili fali sekretáriu jerál foun, Naimori konfirma katak, ida ne’e laloos, tanba to’o agora sira seidauk iha hanoin atu troka ka hasai ema ruma iha estrutura ezekutivu partidu nian.

“Ne’e bosok. Agora ita seidauk koalia. Ita seidauk koalia, tanba ne’e ida seidauk.., nia koalia ida ne’e, bazeia bá saida mak nia koalia hanesan ne’e. loos ka lae. Ne’ebé, ita seidauk koalia ida ne’e, depois ita sei haree katak, ida ne’ebé maka assina relatóriu ohin hatete dehan ilegál ne’e, ema ne’e iha ne’ebá ne’e, ita tau, la’os sekretáriu jerál interinu, lae. Ne’e tanba adjuntu sekretáriu jerál. Entaun, ida ne’e, laiha relasaun ho nia (Jos’e Agostinho),” Naimori afirma.

Konselleiru másimu bá partidu KHUNTO ne’e dehan, intermu partidu nia, ‘problema’ ida ne’e, seidauk sai bá liur ida. Ida ne’e sei uma-laran nian, partidu nian. Tanba ne’e, Naimori dehan, nia seidauk bele atu fó komentáriu bá ida ne’e.

“Tanba agora ami seidauk koalia atu hasai sé-sé, seidauk. Tanba agora ami sei halo preparasaun haree servisu bá partidu nian. Ida ne’e, ne’ebé seidauk iha ne’e dehan katak, hosi konselleiru ka prezidente atu hasai ema ida. Ne’e seidauk iha,” nia hateten.

Ikus liu, Naimori husu bá Hututan.com, atu konfirma direta kestaun ida ne’e Sekretáriu Ezekutivu KHUNTO nian, tanba nia mak hatene liu, no nia bele responde bá ida ne’e.

Olinda Guterres: La iha Problema

Hosi sorin seluk, fundadora partidu KHUNTO atuál membru Parlamentu Nasionál, Olinda Guterres, konfirma katak  to’o oras ne’e partidu KHUNTO nia laran  seidauk iha problema.

“Problema ne’e uma-laran, la’ós problema boot entre Sekretáriu Jerál ho Konselleiru Superiór. Nee sira na’in-rua problema. Ida karta aberta ne’e. ema seluk mak espalla, la’ós Sekretáriu Jerál, José  Agostinho da Silva,” Olinda Guterres hateten.

Nia afirma tan ida-ne’e ema soe isu no ema fabrika isu baratu besik eleisaun parlamentár. Atu dehan de’it katak, partidu KHUNTO unidade nafatin.

Jornalista: Rogério Pereira Cárceres