Hatutan.com, (21 Fevereiru 2023), Díli— Lei Funsaun Públika númeru 08/2004, bandu funsionáriu públiku atu hala’o propaganda polítika durante iha serbisu fatin.

Komisáriu CFP bá Asuntu Dixiplinár, Faústo Freitas da Silva.

“Ne’e Lei mak dehan. Lei ne’e mosu iha lei númeru 08/2004, kona-bá Estatutu Funsaun Públika, ne’ebé dehan, funsionáriu públiku labele hala’o propaganda politika iha serbisu fatin,” Komisáriu CFP bá Asuntu Dixiplinár, Faústo Freitas da Silva hateten iha diskursu serimónia asina termu aseitasaun ho funsionáriu foun MNEK, iha Salaun Nobre, Praia dos Coqueiros Dili, Tersa (21/02/2023).

Bainhira funsionáriu públiku hala’o propaganda politika iha serbisu fatin, oinsá mak bele serbí bá Estadu ida-ne’e, liuhosi instituisaun ne’ebé sira haknaar-aan bá. Tanba ne’e maka, funsionáriu sira tenke define katak, saida mak politiku, saida mak serbidór.

Politiku signifika, maluk Timoroan sira ne’ebé mak konsidera hanesan uluk boot ka hanesan patraun Estadu nian.

Tinan lima-lima, sira sa’e bá ko’alia iha palku politika, depois manán, sira mai troka, hodi bá serbí hanesan iha ministériu ida-idak tuir Lei ne’ebé mak haruka.

Maibé funsionáriu públiku, la’e, tanba dezde tama hahú serbisu ho idade 17 bá to’o tinan 60 mak bele reforma ka mate mak foin bele para hosi sira-ninia serbisu profisionál.

“Tanba ne’e politiku tenke politiku, buat ne’ebé servidór Estadu tenke sai servidór bá Estadu. Sé, mai mak halo politika, entaun serbisu komesa la la’o ona, interesse politiku ida-ne’e, ida ne’ebá, entaun, komesa kodok mós, serbisu la la’o. Tanba ne’e maka, Lei hateten bá ita hotu, sé mak sai funsionáriu públiku serbí loloos de’it bá Estadu,” Komisáriu Fasúto Freitas da Silva hateten.

Maske nune’e, Lei Funsaun Públika mós la bandu atu funsionáriu sira ko’alia politika, bainhira sees hosi fatin no oras serbisu nian, sira bele bá partisipa iha atividade politika no laiha buat ida.

Lei Funsaun Públika nian ida-ne’e, bandu mós funsionáriu hirak ne’ebé mak mai ho apointmentu politika, labele hanorin fali funsionáiru sira ne’ebé serbisu no kleur, atu tenke tuir fali politiku sira ninia dalan.

Bainhira CFP deteta irregularidade ida ne’e hosi funsionáriu públiku sira, maka CFP sei aplika sei loke prosesu hodi aplika sasaun bá sira. Funsionárou sé de’’it mak halo ida ne’e, sei loke hotu prosesu.

“Ministériu kuandu keixar bá ha’u, tenke investiga ó, tama prosesu no fó sansaun. Sansaun ne’e dala-ruma Represaun pur-eskritu, bele dehan katak, demisaun, ka bele suspensaun, ka bele dehan inatividade. Ne’e lei mak haruka. Durante ita deteta duni, no ha’u mak komisáriu kona-bá asuntu ida ne’e. Ne’ebé sé de’it, ha’u la haree bá partidu, kuandu sala, mai, lei mak manda,” komisáriu CFP, Faústo Freitas da Silva, hateten.

Komisaun funsaun públika husu sidadaun sé de’it mak hakna’ar ona iha instituisaun públiku sira Estadu nian, atu hala’o de’it serbisu ho profesionál, tane aas prinsípiu no liu-liu atu kumpri devér sira ne’ebé hatuur ona iha estatutu CFP nian katak, serbisu ho imparsiál, labele halís bá hamosu favóritizmu ne’ebé haree hosi politika, ka klase sosial no seluk tán.

Jornalista: Rogério Pereira Cárceres