Hatutan.com, (01 Marsu 2023), MANATUTO—Paróku Parókia São Vicente Ferrer Lacló, Padre Abílio da Costa konsidera atividade desportu hanesan ezersísiu ida bá fíziku no mentál, hodi enfrenta buat hotu-hotu iha moris ne’e.

“Tasa Avó Nana 2023” Futsál iha aldeia Nacaleu, Suku Lakumesak, Postu Administrativu Lacló, Munisipiu Manatuto, Segunda (27/02/2023) ho tema “Hamutuk ho Maun Boot Kay Rala Xanana Gusmão, Ita Promove Talentu Foinsa’e Sira”. Foto/Rogério Pereira Cárceres.

Pároku hato’o konsiderasaun ne’e hafoin serimónia abertura “Tasa Avó Nana 2023” iha aldeia Nacaleu, Suku Lakumesak, Postu Administrativu Lacló, Munisipiu Manatuto, Segunda (27/02/2023) ho tema “Hamutuk ho Maun Boot Kay Rala Xanana Gusmão, Ita Promove Talentu Foinsa’e Sira”.

“Loos duni bainhira halo ona kompetisaun sempre iha lakon ho manán no ne’e presiza mós mentalidade di’ak. Liuhosi jogu desportiva Futsál ne’e, la’ós hatudu de’it talentu, maibé oinsá atu joven sira bele kontrola aan, liu-liu sira nia mentál hasoru buat hotu-hotu,” Pároku ne’e hateten.

Durante iha Laclo, Padre Abílio da Costa akompaña joven sira moris iha ambiente pás no hanesan Bibi-atan, hanesan sira-nia maun no aman iha obrigasaun  atu fó hanoin nafatin bá sira la’ós de’it fó hanoin ho lia-fuan, maibé akompaña sira liuhosi atividade desportu hanesan daudaun halo ne’e tanba liu hosi atividade ne’e halo sira koñese malu di’ak liu tán.

Hanesan Pároku iha Parókia ne’e, Padre Abílio kompromete atu akompaña nafatin joven sira oinsa tulun-malu, organiza buat ruma, liu-liu fó ksolok bá sira-ninia rai Lacló, bá sira-ninia inan-aman no sira-nia maun-alin.

“Ho jogu ida-ne’e joven sira sei hemetin pás bá malu tanba molok jogu ne’e iha mós, sira moris ona iha hakmatek no dame nia laran,” nia hateten tán.

Padre Abílio mós hakarak apela ba joven hotu-hotu iha Manatuto no iha Timor laran tomak atu hametin espíritu unidade hodi moris iha pás.

“Tasa Avó Nana 2023” Futsál iha aldeia Nacaleu, Suku Lakumesak, Postu Administrativu Lacló, Munisipiu Manatuto, Segunda (27/02/2023) ho tema “Hamutuk ho Maun Boot Kay Rala Xanana Gusmão, Ita Promove Talentu Foinsa’e Sira”. Foto/Rogério Pereira Cárceres.

Iha biban hanesan, Tomás do Rosário Cabrál ne’ebé reprezenta líder nasionál Kay Rala Xanana Gusmão hateten, “Tassa Avó Nana” mosu atu kria amizade entre Joven sira iha territóriu nasionál.

Jogu desportivu ho modalidade Futeból Salaun (Futsál) ne’e, Eskola Katólika São João Paulo II mak organiza tanba iha fulan-maiu tinan ne’e, sira atu selebra mós loron Padroiru, nune’e maka sira hola inisiativa rasik hodi organiza no partidu CNRT mai fó de’it apoiu.

“Mensajen hosi maun Boot Xanana Gusmão maka ne’e, husu bá joven sira mantein pás no estabilidade. Ho Xanana CUP ne’e ita hametin fali unidade nasionál iha ita-nia rain,” Tomás Cabral tranzmite mensajen Xanana Gusmão nian.

Arfim Pereira Cárceres nu’udár reprezentante Juventude Lacló-Oan agradese bá lider nasionál Kay Rala Xanana Gusmão tanba ho inisiativa di’ak promove talentu foinsa’e sira nian liuhosi desportu futsál.

Prezidente Komisaun Organizadóra iha Jogu Futsal “Avo Nana CUP” Domingos Baptista Fonseca, agradese bá lider nasionál Kay Rala Xanana Gusmão ne’ebé fó apoiu, hodi organiza no realiza jogu ida-ne’e.

Totál klubu sira ne’ebé rejistadu iha ekipa komisaun organizadora hodi partisipa iha jogu Futsál ne’e hamutuk 16 mai hosi suku Hohorai, Uma-Naruc, Lacumessac, Uma-Caduac, Laicore, mak eziste iha Postu Administrativu Lalcó, inklui klubu ida hosi Sulu Iliheu, Postu Administrativu Manatuto Villa.

Observasaun Hatutan.com, iha abertura jogu futsál ne’e, parte dahuluk Klubu SJP II A manán Ili-Obun ho skore 5-2. Iha parte daruak, Klubu Levanta manán Ribeira Sporting ho skore 4-2.

Tuir oráriu, jogu Futsál ne’e sei hala’o durante fulan ida no planeia ona katak, jogu ne’e sei ensera hosi líder nasionál Kay Rala Xanana Gusmão.

Jornalista: Rogério Pereira Cárceres