Hatutan.com, (07 Marsu 2023), Díli—Comissão Anti Corrupção (CAC), iha Tersa 07 Marsu 2023, bolu ona Pessoál ida ne’ebé deskonfia halo kobransa ilegál iha serbisu fatin Hospitál Nacional Guido Valadáres (HNGV), Bidau, Díli, hodi presta deklarasaun iha investigadór sira.

Diretór Investigasaun CAC, José Verdiál.

Iha Tersa dadeer ne’e, ekipa investigadór CAC tun direta iha HNGV Bidau Dili, hodi bolu no foti pessoál saúde ne’e mai halo prosesu identifikasaun durante oras 12 nia laran, kona-bá aktu ‘subornu’ ne’ebé pessoál saúde ne’e komete.

Diretór Investigasaun CAC, José Verdiál dehan, CAC hanesan órgaun polisiál kriminál espesializada, tuir Lei númeru 8 bá iha kriasaun CAC ninian, iha artigu kintu fó kompeténsia bá CAC atu bele halo identifkasaun no detesaun hodi hatán bá informasaun sira ne’ebé espalla liga ho kazu pessoál saúde ne’e.

“Relasiona ho médiku ne’e, liga ho subornu ne’ebé mak akontese ida virál loos iha média, entaun bazeia bá kompeténsia ida-ne’e no hatán bá iha informasaun sira ne’ebé mak espalla, CAC bá iha HNGV hasoru ita-nia maluk ne’ebé deskonfia pratika aktu ida-ne’e, lori mai halo identifikasaun,” José Verdial hateten iha kna’ar fatin Faról Díli, Tersa (07/03/2023).

Advertisement

Comissão Anti Corrupção (CAC), iha Tersa 07 Marsu 2023, bolu ona Pessoál ida ne’ebé deskonfia halo kobransa ilegál iha serbisu fatin Hospitál Nacional Guido Valadáres (HNGV), Bidau, Díli, hodi presta deklarasaun iha investigadór sira.

Tuir lei, polisia iha tempu oras 12 nia laran atu bele halo identifikasaun bá sidadaun sé de’it mak CAC suspeita bá iha prosesu.

“Agora dadaun halo hela identifikasaun. Prosesu identifikasaun remata mak ita hatene loloos,” José Verdial esplika.

Prosesu identifikasaun la’o hela, tanba ne’e Diretór Investigasaun, José Verdial  seidauk bele pronúnsia  maibé, iha aktu sira hanesan ne’e bele konsidera nia iha krime korrupsaun passiva, tanba simu osan hosi ema seluk, iha tempu ne’ebé nia hala’o hela nia kna’ar profisionál iha institusaun públiku.

Bainhira iha rezultadu identifikasaun ne’e maka ekipa investigadór sira hetan prova ruma sufisiente, CAC sei halo kedan detensaun durante oras 24, hafoin submete bá Ministériu Públiku (MP) ka Prokudoria Jerál Repúblika.

Antes ne’e pessoál saúde ida hanesan funsionáriu HNGV iha área medikál kontrolu saúde nian, ne’ebé toman konta kona-bá atendimentu produsaun atestadu médiku bá serbisu iha rai liur, deskonfia halo kobransa illegál.

Ho aktu ne’e, iha pessoál balun mós aproveita hodi halo gravasaun uza telephone no publika to’o virál iha mundu virtuál facebook.

Advertisement

Jornalista: Rogério Pereira Cárceres