Hatutan.com, (20 Marsu 2023), Díli—Prezidente Repúblika (PR), José Ramos-Horta husu ba governu atu prodús Dekretu Lei ida própriu hodi fó apoiu ba empreza Aero Díli atu fasilita atividade ne’ebé Timoroan Lourenço Oliveira hala’o iha konetividade Aero atu bele fasilita Timoroan sira semo ba liur no hosi liur mai rai laran.

Prezidente Repúblika, José Ramos-Horta, hala’o lansamentu voo dahuluk bá aviaun Komersiál Timor Oan nian ho marka Airbus A320 tun ona iha iha Aeroportu Internasionál Prezidente Nicolau Lobato, Comoro, Díli, Segunda (20/03/2023). Foto/Elio dos Santos da Costa.

Prezidente Repúblika, José Ramos-Horta husu ne’e iha serimónia lansamentu no inaugurasaun aviaun Air Bus A320 ne’ebé uza ona Bandeira RDTL iha aeroportu internasionál Nicolau Lobato, Segunda (20/03/2023).

Lee Mós: Pilotu Ida-Ne’e Mak Lori Aviaun Timor Oan Nian

José Ramos-Horta hateten, hanesan ema sempre iha mehi, balun mehi loro-loron, mehi atu halo ida-ne’e, ida ne’ebá no balun mehi de’it la halo, ida-ne’e mós di’ak maibé balun mehi no buka kaer metin hodi realiza mehi ne’e, ida-ne’e mak Lourenço de Oliveira ka Lourenço Ataúro halo ho Aero Díli.

Iha tinan balun liu bá bainhira halo vídeo ida ho grupu balun iha Estadus Unidus Amérika (EUA), deklara hanesan liurai ba lenuk sira iha Ataúro no títulu Liurai ne’e pertense duni ba Lourenço Ataúro.

“Ha’u hakarak dezafia governu liu hosi Ministru Fidelis Leite Magalhães atu lori ba governu no Primeiru-Ministru maibé ha’u la hatene Lei permite atu iha última hora governu bele halo buat ruma ka la’e. Lalika halo Lei tanba bainhira bá Parlamentu Nasionál sira sei ko’alia la para no di’ak liu halo de’it Dekretu Lei ida atu autoriza no apoia didi’ak ba Aero Díli,” Prezidente Repúblika, José Ramos-Horta hateten.

Xefe Estadu mós promete atu halo promulgasaun ba Dekretu Lei kona-bá apoiu empreza Aero Díli bainhira governu iha duni inisiativa atu halo hodi intensiva ka apoiu empreza Aero Díli halo atividade iha área aviasaun sivíl hodi fasilita Timoroan sira ba liur no lori turista mai Timor-Leste.

Iha 21 de Maiu ba oin, VIII governu konstituisionál realiza mehi atu kontinua ukun bele realiza no lae mos hein governu foun mai tenke husu favor kontinua apoiu ba Aero Díli.

“Obrigadu ba BNCTL ne’ebé halo finansiamentu no apoia inisiativa di’ak ida-ne’e, ba parseiru sira hosi Indonézia ne’ebé servisu hamutuk no hola parte iha dezenvolvimentu Aero Díli nian, parabens no obrigadu ba Ministru Transporte no Telekomunikasaun. Dala ida tán parabéns ba na’in ba Aero Díli Lourenço Oliveira no nia senhora ne’ebé sempre tane no apoia iha prosesu tomak mai to’o lansamentu ida ne’e,” Xefe Estadu Subliña.

Kona-bá ne’e, Ministru Transporte no Komunikasaun (MTK), José Agustinho da Silva hateten, Governu sei haree no tetu atu bele iha desizaun ruma.

“Governu iha vontade tomak atu bele kumpri orientasaun hosi Prezidente Repúblika atu bele apoia atividade ne’ebé Empreza Aero Díli halo,” José Agustinho da Silva hateten.

Iha fatin hanesan na’in ba Empreza Aero Díli, Lourenço Oliveira sente onradu tebes hodi halibur ema hotu iha Aeroportu Internasionál Nicolau Lobato hodi sai sasin ba loron ne’ebé markante tebes iha istória moris nian ba inagurasaun no lansamentu aviaun Aero Díli. Loron ohin sai mos loron importante ba ema barak, liu-liu ba rai doben Timor-Leste.

Aaviaun ne’ebé oras ne’e para iha aeroportu internasionál Nicolau Lobato hanesan realizasaun hosi prosesu ne’ebé mak naruk no interesante tebes, motivadu hosi nesesidade ida atu hari rasik empreza Aero ne’ebé Timoroan rasik mak sei kaer.

“Durante tinan 20 nia laran, ha’u haree, aprende no involve an mós iha indústria aviasaun no observa kle’an oinsa empreza Aero hosi nasaun rua ka tolu halo operasaun iha Timor-Leste. Hosi esperiénsia sira ne’e halo ha’u sente katak tempu to’o ona atu kria oportunidade hodi hatudu katak Timoroan mós bele,” Lourenço Oliveira hateten.

Hosi kuriozidade ne’ebé iha, na’in ba empreza Aero Díli ne’e deside atu hahu ho operasaun ba aviaun ki’ik, ho motivu atu loron ida bele expanda ba aviaun bo’ot.

Durante tinan lima nia laran, Aero Díli ho esforsu tomak investe, servisu makas no aprende barak atu bele hatan ba pergunta tambasa mak Timoroan labele. Resposta hotu hetan tuir dalan no resposta ida bo’ot liu mak investimentu ba iha rekursu umanu.

Ho dezafiu oin-oin Aero Díli kontinua enfrenta no konjuga malu ho apoiu hosi parseiru no tékniku sira durante fulan sanulu resin neen (16) ikus mai hodi halo preparasaun hotu ba operasaun aviaun bo’ot no ho ksolok ttebes ba kooperasaun no koordenasaun sira durante ne’e hetan susesu boot maske hasoru obstaklu barak, maibé ho espíritu reziliénsia Timoroan nian sempre domina hodi labele para de’it iha dalan klaran maibé kontinua to’o loron ohin iha serimónia inagurasaun ida ne’e.

“Husu ba Prezidente Repúblika no Governu atu kontinua proteze no apoia nafatin Aero Díli, atu ami kontinua laran metin nafatin hodi oferese servisu ne’ebé mak di’ak liu ba rai doben Timor-Leste,” nia husu.

Na’in ba empreza Aero Díli mós agradese ba Prezidente Repúblika José Ramos-Horta ba apoiu ne’ebé valiozu sira ne’ebé fó, ba VIII governu Konstituisionál, liu-liu ba Primeiru-Ministru Taur Matan Ruak, ne’ebé iha tempu naruk nia laran akompaña ho atensaun tebes ba progresu ne’ebé Aero Díli iha, ba ministru Transporte no Komunikasaun, José Agustinho da Silva hamutuk ho instituisaun sira tutela ba apoiu no kolaborasaun inkredível sira.

Jornalista: Vito Salvadór