Hatutan.com, (24 Marsu 2023), Díli—Tuir planu hosi Ministériu Defeza (MD) nian, iha tinan 2023 kada membru FALINTIL Forsa Defeza Timor Leste (F-FDTL) kaer kilat boot ida, tanba durante ne’e kilat boot ida ema na’in-rua to’o tolu mak kaer troka-malu.

Ministru Defeza, Filomeno da Paixão de Jesus. Foto/GPR.

“Tinan ne’e ita halo akizisaun kompletu bá Forsa Armadas ema ida kilat ida. Tanba durante ne’e ema na’in-rua to’o tolu kaer troka malu kilat ida. Agora, la’e. Ida-idak kaer nia kilat, kilat di’ak ka aat ida-idak resposnábiliza,” Ministru Defeza, Filomeno da Paixão de Jesus hateten iha Ministériu Finansa, Ai-tarak Laran, Díli, Sesta (24/03/2023).

Lee Mós: Prezidente Repúblika Husu Ministériu Defeza Kontínua Tau Matan bá Sustentabilidade F-FDTL

Tuir planu, akizasaun bá kilat sira ne’e sei hatama duni iha tinan ida-ne’e no sosa iha Estadus Unidus Amérika (EUA) tanba kualidade no orijinál liu.

Advertisement

“Kuandu na’in rua ka tolu kaer kilat ida ne’e la di’ak. Ne’e hanesan karreta ida xofer na’in tolu ita haree problema. Sempre ida sama embrazen oin seluk, sama rem oin seluk, ladun di’ak. Alende ne’e, ita hola mós metralladora, la’ós la’o mesak de’it. Kilat ho metralladoras. Ida-ne’e mak buat di’ak ida ne’ebé ita halo,” Ministru Filomeno Paixão hateten tán.

Bainhira husu kona-bá totál kilat ne’ebé Ministériu Defeza sei sosa, Filomeno da Paixão hateten, ne’e segreddu ne’ebé la presiza atu públiku hatene, maibé planu ne’e sei sosa duni ba kuantidade forsa armada.

Jornalista: Rogério Pereira Cárceres

Advertisement