Hatutan.com, (22 Janeiru 2024), Díli— Hahú hosi fulan Janeiru to’o Dezembru tinan 2023, Autoridade Rejionál Provínsia Bali liu hosi Servisu Imigrasaun nian rejista totál vizitante hosi Timor-Leste (TL) hanesan turista iha Bali hamutuk 32.276.

Bali International Airport. Foto: Guilherme Barros, 11 Janeiru 2024.

Dadus ne’e fó-sai hosi Sekretáriu Rejionál Provínsia Bali, Dewa Made Indra iha ámbitu inaugurasaun edifísiu foun Konsul Jerál Repúblika Demokratica de Timor-Leste (RDTL) iha Provínsia Bali, ne’ebé partisipa mós hosi Primeiru-Ministru (PM), Kay Rala Xanana Gusmão, Sábadu (19/01/2024).

Lee Mós: Xanana ho Autoridade Indonézia Inaugura Edifísiu Foun Konsul Jerál TL iha Bali

“Tuir relatóriu imigrasaun nian iha tinan 2023, turista hamutuk 32.276 nu’udár turista hosi Timor-Leste. Númeru sempre aumenta kada tinan. Ida-ne’e hadutu katak, povu Timor-Leste ho Indonézia iha istória di’ak,” Hatutan.com sita relatóriu imigrasaun Bali nian ne’ebe fo-sai hosi   Dewa Made Indra iha komunikadu.

Relatóriu imigrasaun Bali nian mós rejista turista TL nian ne’ebé vizita Bali iha tinan 2022 hamutuk 15.943.

Iha oportunidade ida-ne’e, nia reprezenta autoridade Indonézia nian agradese tebes bá Primeiru-Ministru Xanana Gusmão ne’ebé partisipa iha serimónia ne’e hanesan forsa no korazen ida atu hametin liu tán kooperasaun entre TL ho Indonézia liu-liu Bali.

Nia iha esperansa boot katak, serimónia inuagurasaun bá ezisténsia edifísiu foun Konsúl Jerál TL iha Bali ne’e sei hametin liu tán kooperasaun iha área edukasaun, saúde, turizmu no área prioridade seluk tán.

Oras ne’e daudaun Konsul Jerál TL iha Bali iha funsionáriu mai hosi ekipa reprezentante linã ministériu sira mak hanesan, Asistente Adidu Migrasaun Ajente Xefe, Grigório Soares Pinto, Asistente Adidu Edukasaun, José Maria Gonçalves, Adidu Saúde ho Asistente, ekipa protokolu no funsionáriu hamutuk na’in-23 kompostu hosi sidadaun Indonézia na’in 16 servisu iha área administrasaun, motorista, seguransa no jardineiru.

Jornalista: Rogério Pereira Cárceres