Hatutan.com, (27 Marsu 2023), Díli—Ministériu Públiku (MP) liu husi Prokuradór titulár ne’ebé halo investigasaun ba kazu Amu Abito Brites nia mate deside arkiva parsiál tanba konsidera vítima mate ho asidente.

Padre Abito Brites. Foto/Espesial.

Prokuradór Jerál Repúblika (PJR), Alfonso Lopes hateten, kazu Amu Abito nia mate remata ona, no presiza fó hatene bá públiku katak Ministériu Públiku liu hosi Prokuradór Titulár arkiva ona kazu ne’e.

Lee Mós: Investigasaun bá Padre Abito Nia Mate La’o Namanas Hela

“Arkiva ho kondisaun katak taka ho parsiál tanba evidénsia la forte, tanba rona testamuña hotu-hotu tenke ida testemuña okulár katak tenke haree ho matan iha duni buat ruma ka iha krime ruma ka ema oho ka oinsa atu bele akuza. Maibé, provizoriamente durante fulan hira nia laran, prosedimentu la’o, investigasaun, halibur hotu informasaun, autópsia, análiza hotu kedan provizoriamente laiha indísiu no kazu ne’e taka. Amu Abito nia mate normál, mate tanba asidente,” Alfonso Lopez hateten iha Komandu Unidade Espesiál Polísia (UEP), Bairru-Pité, Segunda (27/03/2023).  

Maski nune’e, Alfonso Lopes esplika kazu Amu Abito nia mate la’ós taka totál, tanba arkiva parsiál kuandu ema ida fó sasin ka iha ema ruma ne’ebé hatene katak iha altura ne’ebá nia mate tanba buat seluk, tanba veneno ka tanba ema oho, no iha ema ruma bele pasa informasaun bá Ministériu Públiku atu konsidera katak iha indisiu foun no hatene katak autór mak ida-ne’e, Ministériu Públiku bele loke hikas prosesu ne’e.

“Atu informa ba públiku katak, iha kazu ne’e presiza ema hotu-hotu tenke kolabora,” nia informa.

Tuir kronolojia, iha Segunda (22/08/2022) maizumenus iha tuku 20:00 Otl, Padre Abito ho sasin moris inisiál MSR hetan asidente tráfegu ka monu ho motór marka Jupiter MX Xapa Matríkula E 8081 iha área Dare, Munisípiu Díli.

Asidente ne’e rezulta Padre Abito mate fatin, enkuantu sasin moris MSR ne’ebé sa’e hamutuk motór ida ho Amu ne’e kondisaun di’ak hela, inklui motorizada mós laiha buat ruma mak aat.

Informasaun inisial ne’ebé molok ne’e, PNTL liuhosi Komandu Munisipiu Dili rekolla hosi sasin moris MSR katak matebian Padre Abito mak kontakta nia liuhosi haruka mensajen, hodi sira na’in-rua konvida-malu atu ba hán kalan iha restaurante ida ne’ebé mak pertense bá área Dare nian.

Maibé, vítima ho MSR la’o to’o iha dalan klaran, haree bá kondisaun rai ne’ebé kalan ona, entaun sira deside tun fila-fali mai Díli, liuhosi dalan foun Dare nian, tun mai liuhosi Mauhoka nian uma leten bá, dala-ruma halai sees, no ikus mai tenke xoke morru protesaun ida iha área ne’ebá no rezulta vítima mate fatin.

Jornalista : Vito Salvadór