Hatutan.com, (28 Marsu 2023), Díli—Prezidente Repúblika (PR), José Ramos-Horta sei nomeia Artista Ego Lemos hanesan Embaixadór Boa Vontade bá Meiu Ambiente no Kultura, hodi reprezenta Timor Leste iha konferénsia internasionál iha fulan Abríl.

Atuál Diretór Ezekutivu Permatil, Ego Lemos hala’o enkontru ho Prezidente Repúblika, José Ramos-Horta iha Palásiu Prezidensiál Bairru-Pité , Tersa (28/03/2023). Foto/Média PR.

Prezidente Repúblika konsidera Ego Lemos hanesan artísta famozu, ambientalista ne’ebé tinan barak ona hala’o atividade kulturál, múzika no arte hodi kontribui ba promove identidade Timor nian iha mundu inklui sai manán-na’in bá prémiu boot iha Austrália.

“Iha fulan Abríl nia laran, Ego Lemos sei ba Austrália. Antes ba ha’u sei nomeia nia hanesan Embaixadór Boa vontade ba Meiu Ambiente no Kultura. Ha’u nomeia Ego Lemos ho orgullu Timoroan ida ne’ebé tau-matan makas ba meiu ambiente ba ekolojia, ba ‘green economic’, ba dezenvolvimentu komunitáriu liu hosi hametin no rekopera bee-matan,” Hatutan.com sita deklarasaun Ramos-Horta iha komunikadu, Tersa (28/03/2023).

Prezidénsia Repúblika sei hala’o serimónia ofisiál antes Ego Lemos arranka ba Austrália, bazeia ba konvite hosi Austrália.

Atuál Diretór Ezekutivu Permatil, Ego Lemos orgullu ba nomeasaun ne’e hodi sai Embaixadór Boa Vontade ba meiu ambiente no kultura iha konferénsia internasionál Austrália ne’ebé sei hala’o iha fulan abríl tinan ne’e.

Ego Lemos hetan konvite partisipa iha konferénsia permakulturál ne’e, sai hanesan oradór prinsipál no mós lidera korru Lian Timor hodi hala’o tour múzika iha Austrália iha festival 7 ne’ebé halo parte hosi programa diplomasia kultura.

Iha enkontru ne’ebé Ego Lemos akompaña hosi Izu Gembel, entrega mós lívru ho tema ‘The Topical Permaculture Guide Books’, ne’ebé iha nasaun 160 mak asesu ona ba lívru ne’e liu hosi internet.

Jornalista: Vito Salvadór