Hatutan.com, (06 Abríl 2023), Díli-Polísia Nasionál Timor-Leste (PNTL) liuhosi Komandu Munisípiu Díli detein ona suspeitu ida ho inisial AdCS (tinan 40) tanba deskonfia atu na’ok labarik ida iha área Lemocari, Suku Manleuana, Postu Administrativu Dom Aleixo, Munisípiu Díli.

Komandante PNTL Munisípiu Díli, Superintendente Xefe Polísia, Natércia Eufrasia Martins Soares informa, iha Kuarta (05/04/2023), haleu tuku 18:00 Otl, Polísia simu informasaun hosi komunidade sira hosi Suku Maneluana katak, deskonfia individu ida tenta na’ok labarik ida ho idade tinan rua.

Komandante PNTL Munisípiu Díli, Superintendente Xefe Polísia, Natércia Eufrasia Martins Soares. Foto/Elio dos Santos da Costa

“Atu tau bá iha karon, depois mak nia inan haree hodi hakilar, depois mak komunidade sira mós hamriik hotu kaer ema ne’e no horkalan, entrega ona bá iha polísia hale’u tuku 20:00 Otl. Agora dadaun, Polísia asegura hela iha ne’e. Ami loke ona prosesu bá nia no iha tempu oras  72 nia laran kumpre detensaun hodi  submete bá iha prosesu,” Komandante Natércia Eufrasia Martins Soares informa bá jornalista sira iha nia servisu fatin, Kinta (06/04/2023).

Hatán kona-bá informasaun katak, suspeitu ne’e ho kondisaun moras mentál, Komandante Natércia dehan, Polísia konsidera informasaun sira ne’e no  horkalan mós sira halo cross check kedan ho Komandu PNTL Munisípiu Ainaro katak, suspeitu AdCS ne’e oríjen duni hosi Suku Aituto, Postu Administrativu Maubisse, Munusípiu Ainaro.

“Komandante hosi Ainaro dehan katak, ema ne’e iha duni moras mentál, no mós família sira mós ohin dadeersan komunika mai, dehan katak, nia moras mentál. Maibé, hanesan autoridade, iha responsábilidade atu bele asegura ema ne’ebé maka tuir informasaun dehan katak, kria ka halo  aktus krime,” nia hateten.

Komandante Natércia hatutan, maske informasaun dehan suspeitu AdCS ho kondisaun saúde moras mentál, maibé ho nia aktus ne’e mak nia halo bele tau risku mós bá nia aan no mós bá ema seluk. Tanba ne’e, polísia iha autoridade atu bele asegura sasán sira.

PNTL mós sei komunika fali ho Organizasaun La’ós Govermu nian (ONG-sigla portugés) PRADET, atu halo ezame médiku no rezultadu hosi ezame ne’e mak identifika no prova dehan katak, ema ne’e moras mentál duni, atu nune’e, liuhosi ida ne’e, PRADET  bele rekomenda fatin ne’ebé maka justu ka loloos hodi asegura  suspeitu ne’e bá tratamentu.

Bainhira Polísia husik suspeitu lívre ho hahalok sira hanesan ne’e, tuir Komandante Natércia, bele fó risku bá nini-aan no mós bele fó risku bá ema seluk. Tanba polísia mós simu informasaun hosi komunidade sira katak, molok hetan kapturasaun suspeitu ne’e mós koko tiha ona tama komunidade balu nia uma no haree labarik ki’ik-oan sira atu kaer no na’ok.

“Polísia simu mós informasaun, konunidade sira kaer nia, entrega mai polísia iha semana hirak bá kotuk liubá, nia na’ok ema nia sasán. Entaun, nia iha tiha ona kazu ida, uainhira ita foti nia, ita verifika sistema baze  dadus ne’e, nia identidade iha tiha ona laran, anterior ne’e, nia komete tiha ona iha kazu balu. Entaun, ho informasaun sira ne’e, ita tau hamutuk, ita sei hola desizaun tuir lei haruka,” Komandante Natércia hateten.

Jornalista: Rogério Pereira Cárceres