Hatutan.com, (08 Abríl 2023), Díli—Polísia Nasionál Timor-Leste (PNTL), liu hosi Servisu Informasaun Polísia Nasionál (SIPN) hamutuk ho Task Force SIPN, asegura joven mane na’in-rua iha Suku Maneluana, tanba involve krime jerál ba kazu hadau telefone ida hosi joven na’in-rua ne’ebé kondús hela motór iha área Bebonuk iha loron 04 Marsu 2023.

Polísia Nasionál Timor-Leste (PNTL), liu hosi Servisu Informasaun Polísia Nasionál (SIPN) hamutuk ho Task Force SIPN, asegura joven mane na’in-rua iha Suku Maneluana, tanba involve krime jerál ba kazu hadau telefone ida hosi joven na’in-rua ne’ebé kondús hela motór iha área Bebonuk iha loron 04 Marsu 2023. Foto/PNTL (repro).

Suspeitu na’in-rua ne’e ho inisiál JCS tinan 19 hosi Munisipiu Ermera, hela iha Tasi Tolu, Suku Madohi, Postu-Administrativu Dom Aleixo, Munisipiu Dili.

Lee Mós: Sai Hosi Prizaun, Joven FdF Na’ok Tán Motór 14 Iha Díli Laran

Suspeitu ida seluk ho inisiál AJS alias (A) tinan 22, hosi Munisipiu Ermera, hela Tasi Tolu, Suku Madohi, Postu-Administrativu Dom Aleixo, Munisipiu Dili.

Suspeitu AJS nu’udár eis prizioneru tanba antes ne’e komete krime ba kazu sona membru F-FDTL iha Tasi Tolu ne’ebé foin sai hosi prizaun.

“Hafoin rekolla informasaun, ekipa SIPN Oeste junta ho Task Force SIP no-mós Ekipa Buska, halo idetifikasaun ba suspeitu na’in-rua no sira kolabora ho di’ak hodi entrega fali telefone ho marka Iphone 6 kor mutin inklui telefone rua seluk ne’ebé sira hadau hosi vitima seluk iha área Ailok Laran no Palásiu Governu nia oin,” Hatutan.com sita komunikadu.

Vítima José Jeca de Jesus Carvalho haktuir bá Autoridade Serviço Relações Públicas katak, iha loron 04 fulan Abril 2023 oras 1:00 Otl nia sai vítima bá ema hirak ne’e.

“Sira uza ID falsu feto nian ho naran Celeste da Costa hodi bosok ha’u, entaun ha’u mós bolu ha’u nia kolega Remo Luis Asis Filipe sai ba hein iha kedan eskola Primária Bebonuk oin atu hasoru-malu. Maibé sira na’in-rua mak mai ko’alia ho ami dehan alin imi hein se. Nune’e sira mós la’o besik mai hada’u ha’u nia telefone no halai kedan. Ami hakilar, duni moos la toman,” Hatutan.com sita deklarasaun vítima José iha komunikadu.

Vitima na’in-rua ne’e mós agradese ba PNTL tanba halo servisu extraordinária iha loron ida de’it buka hetan suspeitu hamutuk kedan ho sira nia telefone ne’ebé ema hada’u.

Komunikadu ne’e mós hateten katak, suspeitu AJS rekoñese nia ho suspeitu JCS iha loron 04 abril 2023 oras 1:00 otl kalan sira ho motór maka hada’u duni telefone Iphone 6 ne’e.

“Loos duni ami na’in-rua mak hada’u telefone iphone ne’e iha Bebonuk, horbairua iha tuku 10 kalan ami hada’u mós Oppo kor azul hosi mana ida ho nia oan ho motór Scoopy liu iha dalan Manleuana no iha semana kotuk tuku 8 dader hada’u mós samsung ida hosi mana na’in-rua ho motór beat iha Palásiu Governu nia oin,” suspeitu AJS deklara.

Durante ne’e nia na’ok de’it mak asu iha dalan, na’ok ikan iha kolam no ikus liu maka na’ok telfone.

Tuir informasaun hosi AJS katak nia prontu koopera no husu ba PNTL atu buka tuir mós suspeitu seluk ne’ebé involve iha sira nia grupu laran hodi halo asaun hada’u ema nia sasan iha dalan no mós na’ok motór.

Hafoin halo identifikasaun, Xefi Ekipa SIPN entrega diretamente suspeitu na’in-rua hamutuk ho evidénsia telefone 3 ba Departamentu Investigasaun Kriminál Nasionál hodi halo prosesu investigasaun kle’an.

Jornalista: Rogério Pereira Cárceres