Hatutan.com, (17 Abríl 2023), Manufahi-Lagoa Welenas hanesan fatin turizmu naturál iha Suku Fatukahi, Postu Administrativu Fatuberliu Munisípiu Manufahi. Distánsia hosi Manufahi parese kilómetru neen (6) no durasaun viajen transporte roda haat (karreta) oras-rua nia laran.

Lagoa Welenas, Postu Administrativu Fatuberliu, Munisípiu Manufahi. Foto/Espesiál

Lagoa Welenas, atrai vizitante barak bá pasa ferias tantu husi Manufahi oan no inklui mós timoroan hosi munisípiu sira seluk.  Objetivu hosi vizitante  sira pasa ferias ho intensaun ida mak atu asiste no haree rasik turizmu natural nia furak, kmo’ok no kapás.

Lagoa ne’e, ai-laran tuan no du’ut we-nian mak hale’u no hadulas hanesan lutu ida. Hosi foho tutun, ita matan baku bá hetan de’it ai-tahan no du’ut matak ne’ebé buras no fresku. Anin foho-tutun hú neineik  kona ai-hun boot, au-fuik no tali-huun boot sira dahan (sanak) no tahan  kona malu lian no tarutu tuir ritmu viola nian. manu-fuik ai-laran tuan mós hananu tuir ritmu ne’ebé merin (merdu) loos halo lekirauk sira ain katar hodi dansa no tebe hosi ai-sanak ida bá ai-sanak seluk. Maibé, koitadu balada fuik bee laran hanesan ikan no lafahek sira haksoit sa’e mai hodi asiste de’it teatru sira-ne’e. Vizitante sira mak asiste rasik teatru no komédia balada fuik ai-laran tuan ne’e sente katak turizmu natural hanesan oda-matan Lalehan mundu nian.

Iha lagoa ne’e kriativu na’in lokál sira mós prepara ona dalan, fatin deskansa (baraka), arku bá tuur no hamriik hodi hasai foto, ponte no jardín domin bá foin-sa’e sira ne’ebé “lanu” hela bá domin.  Bá vizitante sira hosi viajen ne’ebé dook sente ain-kolen, isin-moras, liman to’os, no ulun-fatuk moras, deskansa netik imi isin iha baraka. Sente ona isin-kaman no laran kontente, manda ona imi ain hodi imi isin bá “prega” iha arku foto nian, hanesan fatin favoritu iha era dijitál hodi foto netik hanesan rekordasaun.

Baraka sira ne’ebé prepara bá vizitante sira. Foto/Espesiál

Ida menus hosi lagoa ne’e mak, laiha kioske, kafé ki’ik-oan no laiha restaurante bá vizitante sira atu sosa bee hodi habokon kakorok halo kaben namkari no laran namata/malirin. Laiha mós hahán bá vizitante sira hodi hola bá lamak/han atu habosu kabun no fó forsa bá isin-lolon. Maibé, vizitante sira keta fuan ta’uk no lalika laran taridu tanba sei iha kioske  barak mak besik estrada ibun dalan lori tama bá lagoa Welenas. Imi bele kompras kedas saida mak sai hanesan nesesidade báziku bá imi atu pasa ferias iha lagoa Welenas.     

Mezmu laiha kioske no restaurante, lagoa ne’e sai nafatin fatin úniku bá vizitante sira. Ida úniku hosi fatin ne’e mak  anin-fuik ai-laran tuan bele hamaran imi matan-been. Bee Welenas bele fase imi laran dodook no kura imi fuan moras. Ikus mai imi bele kontente no hamnasa hanesan manu-fuik ai-laran tuan ne’ebé ksolok hodi semo iha ai-sanak no hananu merin la sente kolen no triste.

Bá maluk timoroan sira ne’ebé hakarak bá pasa ferias  iha Munisípiu Manufahi, maibé seidauk bá to’o iha lagoa ne’e signifika imi seidauk bá iha munisipiu refere. Tanba imi bele sama ona ain iha Manufahi maibé seidauk sente turizmu natural Manufahi nian ne’ebé furak, kapás no kmo’ok.  Tan ne’e, bá maluk sira bá pasa ferias iha Manufahi keta haluha mós bá vizita fatin turizmu natural nian hanesan rekordasaun no istória ida hodi hatutan, habelar, no konta lerek bá maluk sira seluk kona-bá riku-soin natureza Manufahi nian.

Imi nia vizita mak ami nia esperansa. Imi nia kontente mak ami kriativu lokál nia susesu.

Kontribuidór : Nelion Ornai Monteiro