Hatutan.com, (18 Abríl 2023), Díli—Polísia Nasionál Timor-Leste (PNTL), liuhosi Komandu Munisípiu Ainaro detein ona suspeitu ida ho inisiál JCC iha sela detensaun, tanba uza kro’at oho lia-na’in iha Uma-lisan Berdato ho na’in rua seluk, inklui ida kanek iha aldeia Nunu-moge Lau, Suku Nunu-Moge, Postu Administrativu Hatu-Builico, Munisipiu Ainaro, Segunda (17/04/2023).

Portavós komandu jerál PNTL, Superintendente Xefe Polísia, Arnaldo de Araújo haktuir kronolojia katak kazu ne’e iha tuku-haat dadeersan madrugada, Otl, iha Uma-lisan Berdato.

Lee Mós: Tribunál Kontinua Hala’o Julgamentu ba Kazu Konfrontu iha Ermera

Kazu omesídiu ne’e rezulta ema na’in-rua mate fatin, na’in-ida kanek grave no lori duni bá Ospitál maibé mate iha dalan, na’in-ida labarik ho tinan-tolu kane no oras ne’e dadaun ekipa evakua ona mai iha Hospitál Nasional Guido Valadares (HNGV), Bidau-Dili, hodi hetan tratamentu.

“Sira na’in-tolu ne’ebé mate ho naran Maubuti idade 65, Ana de Oliveira idade 43, Celestino Xavier idade 26. Ida fali Luciano de Araújo tinan 3 kanek, ne’e mak oras oras-ne’e, evakua ona mai HNGV. Suspeitu ne’e ho inisiál JCC,” Superintendente Xefe Polísia Arnaldo de Araújo hateten iha kna’ar fatin Kuartél Jerál Caicoli, Tersa (18/04/2023).

Tuir informasaun ne’ebé Polisia hetan katak, suspeitu JCC hela duni iha área Nunu-Mogelau, ho vítima sira hosi uma-lisan ida de’it mak Berdato.

Momentu ne’ebá, suspeitu toba hela iha uma-lisan laran maibé to’o iha tuku-haat, oras dadeersan, suspeitu atu tama bá na’ok sasán lulik ne’ebé rai hela iha uma-lisan ne’e nia laran. Maske nune’e, vítima sira mós ho hakfodak hadeer mai, esforsu an atu salva nune’e suspeitu labele foti sasán lulik sira ne’e.

Tanba la konsege foti sasán lulik iha uma-lisan ne’e, suspeitu JCC foti sasan kro’at hanesan katana ne’ebé tau iha uma ne’e, hodi ta’a vítima sira to’o na’in-rua mate kedan iha fatin.

Bainhira ho kro’at hakanek tiha vitima sira ne’e, suspeitu haree ema barak mak hamriik no hein iha liur, nune’e suspeitu halai fila bá tama fali iha uma-lisan laran hodi taka no xáve metin odamatan ne’e halo ema mós la brani tama bá laran.

Tanba ne’e, família no viziñu sira kontakta no informa situasaun ne’e bá Komandu PNTL Munisipiu Ainaro, husu atu to’o iha terrenu hodi halo atuasaun hodi bele kaer suspeitu.

La-kleur de’it Polisia mós to’o iha fatin insidente hamutuk ho família viziñu sira, bolu suspeitu to’o dala-barak, infelizmente suspeitu lakohi sai. Ho nune’e, sira deside sobu de’it odamatan ne’e tama bá hodi bele kaer.

“Kaer nia sai mai liur no evakua kedan mai iha PNTL Munisipiu Ainaro. Oras ne’e daudaun, prosesu la’o hela, sei halo identifikasaun bá nia atu bele hatene kle’an liután, motivu oho ema sira ne’e,” Komandante Arnaldo hateten.

Jornalista: Rogério Pereira Cárceres