Hatutan.com, (19 Abríl 2023), Ainaro—Partidu Kmanek Haburas Unidade Nasional Timoroan (KHUNTO), Kuarta (19/4/2023), hala’o abertura kampaña polítika iha Munisípiu Ainaro.

Lee Mós : CASDT Hakarak Konsentra iha Setór Agrikultura

Partidu KHUNTO halo abertura kampaña iha Munisípiu Ainaro, Kuarta (19/4/2023). Foto/Joaquim de Fátima Coutinho

Perante militante, apoiante no simpatizante sira nia oin, prezidente partidu KHUNTO, Armanda Berta dos Santos, afirma programa prioridade tolu ho lema “Lori Moris Di’ak bá Povu” bainhira povu fó fiar bá partidu KHUNTO atu ukun iha períodu 2023-2028.

Programa prioridade tolu ne’ebé Armanda Berta dos Santos haklaken mak, hanesan hadi’a kualidade setor edukasaun,   lori saúde hakbesik bá povu no hadi’a infraestrutura iha territóriu nasionál.

“Se povu fó fiar bá Partidu KHUNTO sei halo programa sira ne’ebé maka elabora ona no ita fahe ona ba koordenadór hatu husi munisípiu. Ita haree bá paz,  estabilidade  no mós afirma ita-nia relasaun bilateral ho nasaun sira iha mundu,” Armanda Berta hateten.

Iha fatin hanesan lider supremu Partidu KHUNTO, Jose dos Santos Naimori  Bucar, apela bá kuadru partidu KHUNTO, militante sira no simpatizante hotu atu fó fiar nafatin bá KHUNTO bá kaer ukun dala ida tán tanba Partidu KHUNTO, tuir Naimori, símbolu unidade nasional no KHUNTO maka hadomi ema hotu.

Lider supremu Partidu KHUNTO, Jose dos Santos Naimori  Bucar. Foto/Joaquim de Fátima Coutinho

“KHUNTO la’ós halo polítika  de’it, maibé hanorin ema atu respeita malu,” Jose dos Santos Naimori Bucar hateten.

Kampaña partidu KHUNTO iha Munisípiu Ainaro  la’o ho di’ak to’o remata no hetan supervizaun hosi CNE, seguransa hosi Polísia Nasionál Timor-Leste (PNTL) ho FALINTIL-Forsa Defeza Timor-Leste.

Kontribuidór : Moises da Silva Magno