Hatutan.com, (03 Maiu 2023), Díli—Governu Timor-Leste (TL) hamutuk ho parseiru dezenvolvimentu United Nation Development Program (UNDP) no Governu Korea du Súl halo mobilizasaun fundus hamutuk millaun $8 ba implementasaun Projetu Youth Employment and Entrepreneurship Skills (YEES), ne’ebé foka liu ba dezenvolve kapasidade joven timorense iha área negósiu.

SEJD, Abrão Saldanha hala’o asinatura MoU ho reprezentante UNDP kona ba implementasaun Projetu Youth Employment and Entrepreneurship Skills (YEES), iha edifísiu SEJD Lecidere, Kuarta (03/05/2023). Foto/Elio dos Santso da Costa.

Sekretáriu Estadu Juventude no Desportu (SEJD), Abrão Saldanha hateten, Projetu YEES ne’e UNDP hamutuk ho Ministériu Turizmu Komérsiu no Indústria (MTKI), Institutu Apoiu Dezenvolvimentu Emprezariál (IADE) ho SEJD inklui Sekretáriu Estadu Formasaun Profisionál no Empregu (SEFOPE), servisu hamutuk bá foin-sa’e sira.

Lee Mós: UNDP Kontinua Tulun MS Kompras Fasilidade Médika

SEJD sei disponibiliza sentru juventude haat ne’ebé sei tau plataforma projetu YEES nian iha ne’ebá hodi bele ajuda foin-sa’e sira.

Sentru juventude haat ne’ebé SEJD identifika no disponibiliza mak hanesan sentru juventude Comoro, Ermera, Liquiça no Baucau.

“Iha kooperasaun ne’e sei kobre área sira hanesan formasaun ba foin-sa’e sira, akonsellamentu ba foin-sa’e sira oinsa buka servisu, Edukasaun finanseira ba foin-sa’e sira atu oinsa hatene uza kapitál ida bá negósiu, apoiu inisiativa negósiu sira liu hosi finansiamentu ka apoiu materiál atu bele hahú negósiu, apoiu mos foin-sa’e sira rejista sira nia empreza no programa sira ne’e mak sei kobre iha kooperasaun ida-ne’e,” Abrão Saldanha hateten hafoin asinatura MoU ho UNDP iha edifísiu SEJD Lecidere, Kuarta (03/05/2023).

Finansiamentu ne’e mistu, katak kofinansiamentu hamutuk governu Timor-Leste ho governu Korea Súl ho hamutuk millaun $8 ne’ebé sei implementa iha teritóriu laran tomak.

Reprezentante UNDP iha Timor-Leste, Munkhtuya Altangerel hateten iha tinan haat sempre buka hadi’a servisu sira ho objetivu atu iha involvimentu no parseria ne’ebé besik liu ho Sekretária Estadu Juventude no Desportu.

“Agradese tebes ba ita-boot sira-nia lideransa tanba hahú kedan hosi tempu ne’ebé di’ak no iha tempu rekuperasaun Covid–19,” nia agradese.

Bainhira Projetu Youth Employment and Entrepreneurship Skills (YEES) ne’e hahú iha tinan kotuk, SEJD mak fó apoiu no parseiru prinsipál ida.

Tan ne’e mak ohin loron UNDP iha oportunidade espesiál tebes atu selebra Memorando dé entendimento (MoU) ho SEJD, ho kompromisu ida ba tempu naruk.

Tanba ne’e, iha ámbitu nota entendimentu ne’e nian, parte sira sei servisu hamutuk no uza fasilidade no eskritóriu sira Estadu nian, Sekretaria Estadu Juventude no Desportu atu hala’o formasaun ba treinadór sira kona-bá abilidade mamar ba joven sira.

UNDP ho parseiru sira apoiu programa YEES no sei fornese ekipamentu ICT nian balun hanesan komputadór, Internét no ICT servisu oin-oin ba infraestrutura sira ne’ebé iha Sekretaria Estadu no tipu mobiliariu oin-oin ne’ebé karik presiza no fó Koordenadór kampu sira atu servisu hamutuk ho Sentru Juventude hirak-nee atu nune’e sira bele sai la’ós de’it ekipa rua ne’ebé diferente, maibé ekipa ida-ne’ebé koordenadu.

Jornalista: Vito Salvadór