Hatutan.com, (04 Maiu 2023), Díli—Kazu tentativa omesídiu ne’ebé akontese iha Suku Cová, Postu Administrativu Balibo, Munisípiu Bobonaro, Domingu (30/04/2023) akontese bainhira vítima fila hosi Atambua tama mai área juridisaun Timor-Leste (TL), maka hetan asalta hosi grupu deskoñesidu iha dalan.

Vitíma ne’ebé ema deskoñesidu taa iha área Suku Cová, Postu Administrativu Balibo, Munisípiu Bobonaro, hala’o hela tratamentu intensivu iha Sentru Saúde Balibo, Domingu (30/4/2023). Foto/Hatutan.com

Polísia Nasionál Timor Leste (PNTL), liu hosi Komandante Departamentu Investigasaun Kriminál (DIK), Superintendente Xefe Polísia, Jorge Monteiro informa kronolójia katak, iha Sábadu (29/042023), Timoroan na’in-tolu ho ilegalmente tama bá iha Atambua, Repúblika Indonézia (RI).

Lee Mós:Polísia Buka Tuir Autór Sira Taa Joven Ida iha Cová

Bainhira sira to’o iha Atambua, iha loron ne’e kedan sira konsege halo kompras bá motorizada rua, maibé, sira deside hodi deskansa kalan ida iha Atambua.

Iha loron tuir mai, Domingu (30/042023) sira na’in-tolu ho motorizada ne’ebé sira sosa, viájen fila- hosi Atambua atu mai TL liuhosi área Munisipiu Bobonaro.

“Sira tama ona iha ita nia área  juridisaun, sira hetan asaltu hosi grupu deskoñesidu iha ema kuaze na’in 20. Hosi asaltu ne’e rezulta vítima ida kanek todan iha parte ulun, nomós kanek iha parte liman,” Jorge Monteiro hateten liuhosi konferénsia imprénsa iha Kuartél Jerál PNTL, Caicoli, Kinta (04/05/2023).

Asaltu ida-ne’e halo sidadaun na’in-tolu ne’e husik hela sira nia motór ne’ebé sira sosa iha Atambua, nomós sira na’in-tolu halai namkari keta-ketak.

Ho akontesimentu ne’e iha loron ne’ebá kedan, Komandu PNTL Munisipiu Bobonaro halo kedan ona investigasaun inísiu no vítima ne’ebé hetan ta’a iha ulun no liman, atualmente hala’o hela tratamentu saúde iha Klínika Atabae.

“Ita foti ona ninia informasaun kompletu, nomós vítima na’in-rua seluk ne’ebé la hetan ta’a no la hetan kanek ita konsege hetan ona. Ita foti ona nia deklarasaun kompletu. Motorizada rua ne’e, atualmente iha ona polísia nia liman,” Jorge Monteiro informa tán.

Finalidade hosi kazu tentativa omesídiu ne’e sira deside hodi nia prosesu no prosedimentu investigasaun, sei asegura iha investigasaun iha nivel nasionál, la’ós iha nível munisipiu.

Kronolojia ne’ebé Hatutan.com halibur hosi komunidade sira Cová, Postu Administrativu Balibo, haktuir, akontesimentu ne’e derrepente de’it, sira haree joven oan ne’ebé nia orijen hosi Aldeia Lotan, Suku Batugade, Postu Administrativu Balibo, mosu mai iha área Cová nian ho ran suli maka’as tanba hetan taa.

Informasaun ne’ebé sirkula iha Suku Cová laran to’o mai Balibo katak, joven ne’e halai mesak mai to’o Cová ho ran sulin maka’as iha isin-lolon no liman. Tuir informasaun katak, nia ho nia maluk joven na’in-rua (2) tan mak bá hala’o tranzasaun sosa motór hosi ema balun iha parte Indonézia nian. Parte sira promete malu atu hasoru malu iha parte tali-laran, Suku Cová nian atu bele entrega osan no simu motór.

Jornalista: Rogério Pereira Cárceres