Hatutan.com, (5 Maiu 2023), Díli – Ho prezensa reprezentativu husi Embaixada Amérika, Diretór Ezekutivu Fundu Dezenvolvimentu Kapitál Umanu Timor-Leste Cristóvão dos Reis, ohin, asina akordu ida hodi fornese apoia finanseiru adisionál bá bolsa-estudu ensinu superior bá durasaun tempu to’o tinan lima oin mai.

Lee Mós : Xefe Estadu Agradese EUA Ne’ebé Oferese Millaun $4 bá Hadi’a Seguransa Ai-han TL

Serimonia asina akortdu Estadus Unidus ho FDCH, Sesta (5/5/2023). Foto/Lazaro Quefi

Liuhosi Fundu Dezenvolvimentu Kapitál Umanu (FDCH), Timor-Leste sei kompromete maizumenus $150,000 iha tinan 2023 hodi fó apoia bá estudante Timoroan hamutuk na’in-tolu hodi hala’o sira-nia edukasaun bá nivel Mestradu iha Estadus Unidus liuhosi programa Fulbright. Iha esperansa katak fundu ne’e sei aumenta iha tinan haat nia oin mai tanba nasaun rua ne’e kontínua ho esforsu hodi habelar tan fornesimentu ba bolsa-estudu.

“Estadus Unidus sai ona Timor-Leste nia parseiru bá tempu naruk ne’ebé fornese bolsa-estudu bá Timoroan exelente sira hodi hala’o edukasaun no oportunidade bá programa interkámbiu iha Estadus Unidus,” EUA nia Enkarregadu Negósiu Tom Daley hateten.

“Hola parte bá ami nia kompromisu mak atu haburas parseria ida-ne’e, ha’u orgullu ho ita nia esforsu konjunta ida-ne’e bá fornese bolsa-estudu adisionál bá estudante Timoroan sira hodi hala’o edukasaun iha Estadus Unidus. Ami kontínua ho esperansa bá hametin ita-nia kooperasaun bilateral hodi tulun promove Timor-Leste nia Planu Dezenvolvimentu Estratéjiku Nasionál iha tinan hirak oin mai,” Tom Daley haktuir.

 Akordu bolsa-estudu ne’e harii bazeia bá memorandu entendimentu bilateral hodi hametin kooperasaun iha área interkámbiu baáedukasaun ensinu superior ne’ebé asina ona iha fulan-Dezembru tinan 2022 entre Embaixada EUA ho Timor-Leste nia Ministériu Edukasaun Ensinu Superiór, Siénsia no Kultura.

Orsamentu bá bolsa-estudu refere sei jere husi Institute of International education, nu’udar organizasaun globál ida ne’ebé la’ós buka lukru, ne’ebé hala’o serbisu fasilita programa interkámbiu internasionál, inklui ba Programa Fulbright Foreign Student Program. Programa ne’e fó dalan ba estudante graduandu sira husi rai-seluk no foin-sa’e profisionál sira atu hala’o estudu no peskiza iha Estadus Unidus.

Asina akordu kooperasaun Estadus Unidus ho FDCH, Sesta (5/5/2023). Foto/Lazaro Quefi

Iha asina Memorandu Entendimentu iha tinan 2022 liubá, Estadus Unidus anunsia katak sei habelar fornesimentu bolsa-estudu ba Timor-Leste, inklui fó fatin adisionál sia bá estudante Timoroan hodi hala’o edukasaun no peskiza iha Estadus Unidus no EUA nia estudante no bolseiru sira hodi mai hanorin no hala’o peskiza iha Timor-Leste. I

Iha tinan 20 ikus ne’e nia laran, Estadus Unidus fó ona dalan bá povu Timoroan hamutuk 600-resin hodi hala’o edukasaun no tuir oportunidade programa interkámbiu sira, inklui liuhosi bolsa-estudu USTL, Fulbright, (Young Southeast Asian Leaders Iniviative) YSEALI no seluk tan.

Jornalista : Lazaro Pereira Quefi