Hatutan.com, (𝟎𝟗 M𝐚𝐢𝐮 𝟐𝟎𝟐𝟑), Díli –Primeiru-Ministru (PM) Taur Matan Ruak ho delegasaun to’o ona iha Labuan Bajo, Provínsia NTT-Indonézia ho Aviaun marka Bandeira Timor-Leste (Aero Dili).

PM Taur Matan Ruak to’o ona iha Labuan Bajo hodi partisipa simeira ASEAN bá dala-42. Foto/Média GPM

Primeiru-Ministru Taur Matan Ruak  sei partisipa iha Simeira ASEAN bá dala-42 ne’ebé sei realiza hosi loron 09 to’o loron 11 fulan-Maiu 2023 ne’ebé lidera hosi Indonézia.

“Simeira ASEAN bá dala-42 ne’e sei partisipa hosi lider na’in-ualu (8) inklui Sekretáriu Jerál ASEAN nian ho  Primeiru-Ministru Timor Leste,” Retno Marsudi hateten liuhosi konferénsia imprensa ne’ebé hala’o iha Edifísiu Ministériu Negósiu Estranjeiru Repúblika Indonézia iha Jakarta, Sesta (5/5/2023).

Sita hosi detiknews katak haktuir bá desizaun tuir desizaun lideransa sira ASEAN nian sei la konvida Myanmar nia partisipasaun iha Simeira ASEAN bá dala-42 iha Labuan Bajo.

Hosi sorin seluk, Primeiru-Ministru Tailándia nian mós konfirma la partisipa iha Simeira ASEAN iha Labuan Bajo relasiona ho eleisaun jerál Tailándia nian ne’ebé sei hala’o iha loron 14 fulan-Maiu ne’e.

Relasiona ho delegasaun sira Simeira ASEAN bá dala-42, Ministra  Retno konfirma katak to’o oras ne’e rejistu ona ema hamutuk 776 mak sei partisipa no jornalista hosi mídia nasionál Indonézia nian ho jornalista sira internasionál hamutuk na’in-400.

Delegasaun sira hosi nasaun sira ne’ebé partisipa iha Simeira ASEAN bá dala-42  iha Labuan Bajo ne’e, mak hanesan delegasaun hosi Indonézia rasik hanesan uma-na’in, delegasaun Brunei Darussalam, Kamdia, Laos, Malayzia, Filipina, Singapura ho Vietnam.
Ajenda sira Simeira ASEAN bá dala-42 mak hanesan tuir mai ne’e;

Iha loron 8 fulan-Maiu: Enkontru CPR (korpu diplomátiku sira ASEAN) +SOM
Iha loron 9 fulan-Maiu: Enkontru Ministru Negósiu Estranjeiru ASEAN nian

Iha loron 10 ho loron 11 fulan-Maiu, Simeira  ASEAN bá dala- 42

Jornalista : Vito Salvadór