Hatutan.com, (11 Maiu 2023), Díli—Polísia Nasionál Timor-Leste (PNTL), Komandu Munisipiu Dili, Eskuadra Dom Aleixo, kaptura ona joven na’in-rua, ida hosi Grupu Arte Marsiál (GAM) no ida seluk hosi Grupu Arte Rituál (GAR), durante konfrontu iha área Hudi-laran, Suku Bairru-Pité, Postu Administrativu Dom Aleixo, Munisípiu Díli, Kuarta (11/05/2023). 

Komandante PNTL Munisipiu Dili, Superintendente Xefe Polísia Natércia Eufrásia Martins Soares dehan, bainhira lori bá to’o iha Komandu Caicoli, liuhosi prosesu identifikasaun, ekipa investigasaun nian identifika katak, suspeitu ida mak involve duni iha konfrontu ne’e maibé suspeitu ida seluk, liberta totál, tanba laiha indísiu ruma forte, hodi indika katak nia mós autór bá iha kazu ne’e.

Lee Mós: Konfrontu Iha Mota-Ulun, PNTL Kaer Membru Arte Marsiál Na’in-Haat

“Horkalan ne’e, ita kaer ema na’in-rua iha terrenu. Ida fali ita kaer tanba ita haree nia halo hela aktus kríme. Ne’e prosesu ketak ida. Ita detein nia bá oras 72, depois bá primeiru interrogatóriu. Maibé, ida seluk ne’e ita halo de’it identifikasaun tanba faktus la sufisiente atu ita dehan nia hanesan suspeitu ida. Tenke liberta nia,” Natércia Martins hateten iha Postu Administrativu Verra Crus-Dili, Kinta (11/05/2023).

Iha kazu konfrontu hanesan tuda no asalta ne’e ema barak mak haree no tuir gravasaun video sira ne’ebé gravadu iha CCTV, komandu ho ekipa sei haree fila-fali, depois identifika ema sira ne’e, Polísia sei halo xamada bá sira, tanba gravasaun lubuk ida mak iha ona polísia nia liman.

“Suspeitu na’in-rua ne’e, tuir ha’u nia hatene, ida hosi grupu PSHT ninian. Maibé. Ida fali seluk, ha’u seidauk halo identifikasaun tanba laiha faktus ruma ne’ebé mak bele forte, atu ita bele dehan katak nia sai suspeitu ida,” Komandante Natércia informa tán.

Kona-bá motivu hodi hamosu akontesimentu ne’e, Komandante Nertécia dehan, membru GAM-GAR sira ne’e baibain ona, no ne’e la’ós buat foun iha Timor.

Baibain sira tau sira-ninia solidariedade maka’as bá iha sira-ninian maluk ne’ebé mak hetan susar hanesan mate. Tanba ne’e, sira halibur-malu, sira lori bá missa, depois atu bá haloot, hosi ida ne’e mak mosu konfrontasaun.

Kona-bá ema na’in-hira mak hetan kanek, líder másimu Komandu PNTL Munisipiu Dili ne’e hateten, nia la hetan informasaun kona-bá kanek, maibé kazu sira antes ne’e iha ema na’in-rua mak kanek.

Hosi kazu insidente tuda-malu ne’e, jerálmente sásan sira mak hetan estragus mak hanesan, uma vídru rahun, odamatan, motór, karreta balu vídru rahun tuir keixa hosi vítima sira balun.

Maski antes ne’e líder másimu sira hosi GAM PSHT, Ikatan Kera Sakti (IKS), Kmanek Oan Rai Klaran (KORK) ho GAR Sete-Sete (77), liuhosi Palku Dame, kompromete ona katak, sei kontrola ninia membru sira atu la halo tán kríme. Maibé, realidade prátikamente ema ida rua sei mobiliza malu atu halo asaun sira hanesan ne’e.

Komandante Natércia hatutan, ema sira ne’ebé mak involve iha asaun sira hanesan ne’e, polísia identifika ona laiha motivu politika ruma mak iha ne’ebá. Ida ne’e mai hosi arte marsiais ho arte rituais ne’ebé polísia identifika.

Polísia komunika ona ho Komisaun Reguladóra Arte Marsial (KRAM), oinsá mak atu bele haree, atu rezolve situasaun ida ne’e nune’e labele akontese iha futuru no oinsá mak KRAM nia kompeténsia atu komunika sira-nia líderes ka koordenadór atu bele haree oinsá atu haree liubá iha sansaun administrativa.

Kona-bá sanasaun sira administrativa nian, ida ne’e nia la ko’alia tanba ne’e kompeténsia KRAM sira nian, maibé krime nia prosedimentu ne’e, hateten klaru.

Bainhira iha aktu sira krime ruma akontese, sempre iha ninia autór, sempre iha ninia vítima, sempre iha sasin, no sempre iha evidénsia bainhira halibur ona sei aprezenta bá Ministériu Públiku depois hein desizaun.

Jornalista: Rogério Pereira Cárceres