Hatutan.com, (01 Juñu 2023), Díli-Komandu Polísia Nasionál Timor-Leste (PNTL) Munisípiu Díli sei intensifika operasaun iha tempu kalan hodi asegura pás no estábilidade to’o formasaun Governu foun.

Lee Mós : PNTL Díli Servisu iha Edifísiu Ne’ebé Mínimu Kondisaun

Komandante PNTL Munisípiu Díli, Superintendente Xefe Polísia Natércia Eufrásia Martins Soares. Foto/Elio dos Santos da Costa

Baze bá operasaun ida-ne’e, Kinta (01/06/2023), Komandante PNTL Munisípiu Dili, Superintendente Xefe Polísia Natércia Eufrásia Soares Martins, organiza sorumutuk ida ho estrutura komandu nian, kompostu hosi komandante eskuadra sira, xefe seksaun sira, hodi hahú fó orientasaun ligadu ho seguransa bá sidade kapitál nasaun.

“Polísia la para ho ida ne’e sei kontinua hala’o servisu ne’ebé parténsia bá iha atividade operasionál, ne’ebé ita planu tiha ona, ita trasa tiha ona, atu kontínua intensifika patrullamentu liu-liu iha tempu kalan,” Superintendente Xefe Polísia Natércia Eufrásia Soares Martins hateten bá jornalista sira.

Natercia Eufrásia Soares  dehan, Polísia nia operasaun bá iha fatin risku sira bá konflitu nian, sei halo aproximasaun ho ema sira ne’ebé maka baibain sempre fó aan hola parte iha konflitu sira ne’e atu kontrola nafatin sira-ninia movimentu, nune’e, bele hasees sira hosi aktu kriminál ne’ebé maka sira komete iha tempu sira liubá.

Iha loron ikus fulan-Maiu ne’e, mosu duni akontesimentu balu krime balu, maibé, la’ós konflitu boot. Iha duni konfrontu sira entre individuu balu, ne’ebé ema temi dehan hosi organizasaun. Maibé, bainhira polísia bá no halo aproximasaun, kazu sira ne’e mosu tanba hahalok individuu, la’ós envolve hosi organizasaun ruma.

Iha sorumutu ne’e, komandu Dili halo mós avaliasaun bá situasaun sira liu-liu iha Kapitál Díli, nota katak, durante ne’e, situasaun la’o hakmatek tebes, iha kríme balu ne’ebé akontese, maibé, ne’e kríme públiku, no ninia prosesu sira la’o normál.

Jornalista: Rogério Pereira Cárceres