Hatutan.com, (22 Agostu 2022), Dili-Komandu Polísia Nasional Timor Leste (PNTL) Munisípiu Dili intensiva operasaun iha tempu kalan hafoin konfronta entre grupu juventude sira, kalan hirak liubá iha Dili laran.

Komandante PNTL Munisípiu Dili, Superintendente Xefe Henrique da Costa, konfirma helarezultadu investigasaun bá investigadór ida. Foto/Hatutan.com

Iha operasaun ne’e envolve mós Unidade Espesiál Polísia (UEP) ho Unidade Polísia Marítima (UPM) atu evita konfronta entre grupu juventude ne’ebé deskonfia mai husi arte-marsiál ho arte-rituál alastra bá bairru seluk.

Konflitu ki’ik sira durante kalan hirak tuituir malu akontese iha Dili efeitu hosi kazu asalta membru arte-marsiál Persaudaraan Setia Hati Terate (PSHT) iha área Vila-verde, Postu Administrativu Vera Cruz, bainhira membru sira PSHT nian fila hosi sira-nia serimónia graduasaun (sa’e sintu) iha Jináziu Dili, Kinta  kalan (18/08/2022).

Hosi identifikasaun no operasaun bá insidente ne’e, Komandu Munisípiu Dili detein no kaptura autór na’in-sia (9) hosi grupu arte-rituál Sete-Sete (77). Sira ho inisiál ADZ, TMGA, A, PCDZ, SO, FDC, JSV, JDV no NZ.     

Advertisement

“Suspeitu na’in-sia ne’e aprezenta ona bá Ministériu Públiku, mais seidauk bele foti desizaun,” Komandante PNTL Munisípiu Dili, Superintendente Xefe Henrique da Costa, hateten bá jornalista sira, iha kna’ar fatin, Caicoli, Segunda (22/08/2022).

Iha antesipasaun seguransa ida-ne’e, parte komandu sei orienta nafatin membru sira halo patrulla no pasa revista. Maske ikus-ikus ne’e, membru polisia mak sai fila-fali alvu

Superintendente Xefe Henrique da Costa, relata mós kona-bá membru PNTL na’in-rua; Ajente Leonito C. Goncalves no Ajente prinsipál Nicolao dos Santos, hosi eskuadra Dom Aleixo, hetan atake tuda ho bomba Molotov hosi membru arte-marsiál PSHT bainhira halo hela seguransa iha serimónia graduasaun PSHT nian iha área Timor Lodge, Comoro.

Rezultadu hosi insidente ne’e, rezulta membru sira hetan kanek iha ulun no ain rezulta suku pontu-lima, tanba hetan tuda ho bomba molotov hosi autór RBH (tinan 24), ho ninia kolega suspeitu ida seluk ne’ebé to’o oras ne’e PNTL sei buka tuir.

“Kazu iha Timor Lodge ne’e, ne’ebé mak ita nian, hosi GAM iha ne’ebé maka halo graduasaun iha ne’ebá, suspeitu ida ita kaptura ne’e mós, nia mós envolve iha GAM ida ne’ebé hanesan,” Superintendente Xefe Polísia, Henrique da Costa, hateten.

Advertisement

Komandante Henrique, kazu ida ne’e mosu, dala-ruma tanba membru ka autór sira ne’ebé la gosta malu, envolve mós iha serimónia graduasaun PHST nian ne’e.

“Mais ba ita, ita nafatin, garante seguransa bá sé de’it, bainhira fó ninia pedidu mai parte seguransa, para atu nune’e hodi proteje ba sira nia atividade. Ida ne’e hanesan konsekuénsia ne’ebé mak membru PNTL simu,” Henrique da Costa hateten.

PNTL Rejeita

Komandante Henrique da Costa mós rejeita ho informasaun balu ne’ebé espalla no publika iha mídia balun katak, membru PNTL nain-2 ne’ebé hetan kanek ne’e, la’ós tuda  ho bomba Molotov, maibé gás lakorimojéniu mak nakfera.

“Informasaun ida ne’ebé espalla, dala-ruma, tuir de’it ema ida-idak ninia interpretasaun. Ema balu dala-ruma la gosta polísia, sire bele hatete tuda ho jás lakrimojéniu, hodi tau fila-fali katak, gás ka bomba ida hosi parte polísia ninian. Maibé, parte polísia nia investigasaun, aprezenta hotu evidénsia hirak ne’e bá ona iha Ministériu públiku, tantu restu hosi Bomba Molotov nia rahun sira ne’e mós aprezenta hotu ona. Ne’ebé, oras ida sei hetan desizaun hosi Ministériu Públiku,” Henrique da Costa, hateten.

Advertisement

Jornalista: Rogério Pereira Cárceres

Advertisement