Hatutan.com, (20 Juñu 2023), Díli—Comissão Anti-Corrupção (CAC) fó atensaun sériu bá kompañia atu aselera projetu  kontrusaun edifísiu foun Rádiu Televizaun Timor Leste, Empreza Públika (RTTL,E.P) ne’ebé ninia durasaun tempu ba estensaun besik ona, maibé prosesu fíziku foin atinje 54%.

Lee Mós : Konstrusaun Edifísiu RTTL,E.P Atrazu

Antensaun hosi CAC  ne’e liu hosi servisu Рrevensaun Kriminál ninia enjiñeiru hala’o inspesaun direta ba terrenu projetu ne’e iha Caicoli, Segunda (19/06/2023).

Progresu fiziku atual Projetu Konstrusaun Edífisiu foun RTTL,EP. Foto/Elio dos Santos da Costa

“CAC hahú tau-matan ba projetu Konstrusaun Edifísiu Foun RTTL,EР neʼe relasiona ho keixa públiku mai iha CAC kona­bá edifísiu neʼe nia progressu konstrusaun fíziku. Hafoin simu tiha keixa hosi públiku, ohin ekipa tékniku hahú tun ba fatin konstrusaun hodi hasoru-malu ho donu projetu no kompañia kontratór sira hodi buka hatene loloos progressu konstrusaun fíziku, observa direta konstrusaun projetu ida-neʼe no buka hatene razaun sira neʼebe kauza projetu ida neʼe nia progressu fíziku,” Hatutan.com sita komunikadu hosi CAC.

Ekipa tékniku sira nia prezensa iha terrenu neʼe hodi rekolla mós dokumentu prinsipál sira hanesan, dezeñu no Bill Of Quantity (BoQ) konstrusaun edifisiu nian, inklui buka tuir dokumentu kontratu sira hodi halo análiza kona­ba risku no indísiu sira krime korrupsaun nian.

“Maski ekipa hasoru malu ona ho kompañia kontratór ho nia project manajer, inklui tékniku enjeñeiru sira hodi hetan klarifikasaun balun, maibé ekipa tékniku sira sei nafatin fó atensaun bá  sira hodi implementa projetu ho responsável, garante kualidade projetu Estadu nian, liu­liu evita monu ba tentasaun sira krime korrupsaun,” CAC fó atensaun iha komunikadu ne’e.

Ekipa mós sei kontinua analiza dokumentu sira, karik iha indikasaun balun hamosu krime no halo Estadu hetan prezuizu, sei trata tuir Lei neʼebe iha. 

Lee Mós : Konstrusaun Edifísiu RTTL, E.P, Empreza BANIR LEMA Husu Extende Tan Kontratu bá Fulan-Neen

Tuir observasaun ekipa tékniku enjeñeiru sira CAC nian, projetu konstrusaun ida-neʼe hahú kontratu iha loron 29 juñu 2022 toʼo termina kontratu iha loron 29 fulan outubru 2022. Halo ona estensaun kontratu dala ida besik termina fali ona, foin atinje pursentu 50 resin, no tuir kontratu, orsamentu ba projetu ida neʼe ho montante $1,196,095.54.

Ekipa akonsella mós kompañia kontratór kona­bá estensaun kontratu tenke tetu ho efikáz no efisiente hodi labele gastu tempu estensaun kontratu beibeik no implika servisu Estadu nian.

Ekipa tékniku sira CAC nian, daudaun ne’e iha komitmentu forte sei kontrola beibeik no másimu projetu sira neʼebe Estadu halo atu evita hahalok sira krime korrupsaun nian, liuliu evita krime fraude iha konstrusaun.

Kompañia Promete Finaliza iha Marsu 2024

Projetu konstrusaun edífisiu foun RTTL,E.P. Foto/Elio dos Santos da Costa

Hatutan.com konfirma ho Tékniku empreza BANIR LEMA UNIP.LDA, Francisco dos Reis Hornai  ne’ebé responsabiliza hela konstrusaun edifísiu foun Rádiu Televizaun Timor-Leste, Empreza Públika (RTTL,E.P) relata katak, kontrusaun fíziku oras ne’e daudaun atinje ona 54% no empreza garante sei finaliza projetu refere iha Marsu 2024.

“Ita nia tarjetu loloos ne’e konstrusaun ne’e bele finishing no kompleta ho IT work inklui buat sira seluk  iha Marsu tinan oin. Maibé, ba konstrusaun fíziku de’it ami garante Dezembru tinan ne’e remata,” Francisco dos Reis Hornai hateten ba Hatutan.com iha edifísiu RTTL.E.P, Caicoli, Tersa (20/06/2023).

Tuir nia, Empreza sei hato’o hikas pedidu estensaun kontratu ba iha owner ka projetu nia na’in hanesan Ministériu Asuntu Parlamentár no Komunikasaun Sosiál (MAPKOMS) no parte relevante sira, empreza mós sei relata ho informasaun balun relasiona ho loron feriadu no klima balun ne’ebé halo empreza labele servisu, nune’e empreza bele halo fali time schedule foun ba to’o Marsu 2024, hatama ba projetu na’in sira atu bele hetan estensaun tempu ba projetu konstrusaun edifísiu foun ba RTTL,E.P.

Empreza Halo Ona Levantamentu Osan 40% Hosi MAPKOMS 

Diretór empreza BANIR LEMA UNIP.LDA, Domingos Sequeira

Diretór empreza BANIR LEMA UNIP.LDA, Domingos Sequeira hateten, Empreza halo ona pedidu pagamentu ba governu no hetan ona pagamentu 40%. Empreza mós iha garantia katak ho orsamentu ne’ebé iha, sei bele finaliza projetu ne’e maski tenke husu tan estensaun ba governu hodi kompleta servisu sira hotu.

“Iha semana kotuk governu selu ami 40% ona. Ami garante ho osan ne’ebé iha ami bele atinje to’o 80%,” Domingos Sequeira hateten.

Diretór empreza BANIR LEMA UNIP.LDA hatutan, iha ekipa ida hosi CAC mai duni haree progressu servisu ne’e tanba iha keixa hosi ema balun kona-bá konstrusaun edifísiu foun RTTL,E.P no ekipa CAC nian mai dunik no servisu la’o hela hanesan públiku akompaña.

Kona-bá estensão bá kontratu ne’e entre empreza ho projetu na’in maka governu no Estadu tanba ne’e CAC la halo intervensaun to’o iha ne’ebá tanba ne’e kompeténsia governu nian liu hosi Ministériu Obras Públiku (MOP), MAPKOMS no CNA.

Projetu konstrusaun edifísiu foun ba RTTL,E.P la’ós buat ki’ik no projetu ne’e rasik boot no sistema la’o mak presiza tempu atu garante kualidade.

Durante ne’e empreza hasoru problema iha tempu tanba bainhira cor kolom ida presiza tempu loron 14 mak bele book atu bele kontinua ba servisu seluk.

Tanba ne’e empreza laiha difikuldade ho materiál ka buat seluk maibé tempu tanba tenke halo tuir dezeñu no BOQ ne’ebé iha, durasaun loron hira mak cor no bainhira mak bele sobu atu halo fali servisu seluk, empreza tuir saida mak tékniku sira hakarak no hakerek iha kontratu atu garante kualidade.

“Ami empreza garante projetu konstrusaun edifísiu foun ba RTTL.,E.P tenke hotu atu entrega ba Estadu. Ita bo’ot sira haree servisu la’o hela, bada’en sira hosi estranjeiru no Timoroan sira halo hela servisu, sistema mak halo ami atraza atu halo servisu ida tenke hein, labele halo arbiru tanba ita hakarak garante kualidade tuir dezenu no BOQ ne’ebé iha,” nia subliña.

Kona-bá estensaun tempu ba projetu konstrusaun edifísiu foun ba RTTL,E.P, diretór ne’e konsidera normál tanba atu garante kualidade no tuir rekijitu ne’ebé mak iha, hodi garante kualidade.

Jornalista: Vito Salvadór