Hatutan.com, (10 Juñu 2023), Dili—Kazu insidente ne’ebé deskonfia oknum hosi Policia Ciêntífica e de Investigação Criminal (PCIC) ho insial JK baku membru ida hosi Polisia Nasionál Timor-Leste (PNTL) ho inisiál JL, iha Kinta (08/06/2023) tuku 05:00 dadeer madrugada ne’e, tenke prosesa tuir Lei.

Segundu Komandante Jerál PNTL, Komisáriu Polísa Pedro da Costa Belo (loos), ho Adjuntu Diretór Policia Ciêntífica e de Investigação Criminal (PCIC), Adino Nunes Cabral (karuk), ko’alia hela bá jornalista sira, kona-bá solusaun bá kazu insidente ne’ebé mosu entre membru instituisaun rua nian, iha Kuartél Jerál PNTL Caicoli Díli, Sesta (09/06/2023). Foto/Elio dos Santos da Costa.

Adjuntu Diretór PCIC, Adino Nunes Cabrál hasoru-malu ona ho Segundu Komandante Jerál PNTL, Komisáriu Polísia Pedro da Costa Belo iha Kuartél Jerál, Caicoli hodi diskute oinsá buka no fó solusaun bá dezentendimentu ne’e, iha Sesta 09 Juñu 2023.

Lee Mós: Deskonfia Oknum PCIC Baku Membru PNTL Ida To’o Grave

Adino Nunes Cabral informa, kooperasaun institusionál iha nível superiór tenke funsiona, maski mosu problema saida de’it entre membru sira.

“Dezentendimentu ne’ebé mak mosu, ne’e iha ninia tramite rasik. Sé iha indikasaun bá krime, prosedimentu kriminál, la’o, vítima ne’ebé sente ofendidu, iha prosedimentu kriminál, la’o tuir ida-ne’e,” Adino Nunes Cabral hateten.

Kazu insidenta ida ne’e, iha ligasaun ho membru sira, nune’e iha prosesu sira internal PCIC nian sei haree ninia sirkunstánsia ne’e oinsá, atu bele iha aprosimasaun, averiguasaun polisiál, atu bele hatene nia verasidade.

“Mais, ha’u labele hateten ida ne’e bá ita-boot sira, husik prosedimentu la’o no ha’u enkoraza vítima, iha direitu tomak, tuir norma prossesuál, penál, atu bele halo keixa iha departamentu investigasaun kriminál, PNTL ka iha Ministériu Públiku hodi bele la’o tuir ninia dalan,” Adino Cabral enkoraza.

Maski kazu sira ne’e mosu entre membru sira institusaun rua nian, maibé ida ne’e la kahur ho interesse instituisaun nian, tanba kazu ida-ne’e konsidera hanesan problema partikulár.

Adjuntu Diretór PCIC ne’e fó hanoin katak, labele kahur interesse partikulár nian ho interesse Estadu  nian. Estadu funsiona tuir nia regra, banhira iha individu ruma, oknum balun ne’ebé mak keta iha dezentendimentu, hafoin rezolve tuir prosedimentu Lei ne’ebé iha.

Hatán kona-bá karik superior sira PCIC ninian, bolu no investiga ona mós ninia membru ka oknum ne’ebé deskonfia sai ‘autór’ bá kazu ne’e, Adino Cabral dehan, sira seidauk hanoin to’o iha ne’ebá, tanba medida sira ne’e, atu aplika bá ema ida, iha ninia prosesu, no ninia prosedimentu rasik.

Nia husu bá membru sira PCIC nian atu hala’o nafatin ida-idak ninia kna’ar tuir Lei ne’ebé eziste. Dezentendimentu ne’e sempre akontese iha ne’ebé de’it. Laiha ema ida laiha dezentendimentu, dala-ruma iha diferensia opiniaun, mais, sira sempre foti ninia konkluzaun ida di’ak atu labele iha multi-interpretasaun ne’ebé mak dala-ruma bá fali iha interesse seluk.

Nune’e mós Segundu Komandante Jerál PNTL, Komisáriu Polisa Pedro da Costa Belo, lori Komandu Jerál PNTL nia naran agradese tebes, tanba bele hasoru malu ho Adjuntu Diretór PCIC, ho asesór jurídiku nian, ne’ebé maka bá ona iha sira-ninia fatin.

Komandante Pedro da Costa Belo dehan, hasoru malu entre ulun-boot instituisaun rua ne’e, foin bá akontese dala-uluk, durante sira na’in-rua nia mandatu. Tuir nia, sira-nia hasoru malu ida ne’e bele iha relasaun ho servisu ne’ebé maka bele di’ak liután iha futuru.

Banhira hateke fila bá kotuk, mosu ona mós kazu balun entre membru instituisaun rua ne’e, dala-ruma dezentendimentu entre membru PCIC ho PNTL hanesan, iha kinta madrugada, ikus mai, públiku foti kestaun ida ne’e, sai boot no hamosu preokupasaun ema hotu bá ligadu ho situasaun ida ne’e.

Tanba ne’e maka, ohin sira hasoru malu, ko’alia mós ho situasaun ida ne’e maibé, Komandante Pedro Belo ko’alia loloos katak, sira-nia hasoru malu ne’e atu halo kontinuasaun servisu entre instituisaun rua, hodi nune’e bá oin  bele iha kooperasaun di’ak liután.

“Kazu ne’ebé mak akontese foin dadaun, horseik madrugada ne’e la’o tuir nafatin nia dalan. La’o tuir prosedimentu kriminál no mós oras ida, iha mós parte hosi PCIC nian, iha parte internál mós sei haree mós iha kestaun parte dixiplina ninian. Ne’ebé, labele kahur ho sasán sira ne’e hamutuk,” Pedro Belo hateten.

Pedro Belo konsidera PNTL ho PCIC hanesan instituisaun Estadu nian ne’ebé maka presiza duni atu iha kooperasaun ka servisu hamutuk. Tanba sira hothotu hala’o kna’ar haree bá interesse povu Timor-Leste tomak nian.

Kazu insidente Oknum PCIC baku membru PNTL ne’e, tanba de’it Oknum PCIC ho inisiál JK diskute malu ho joven mane ida ho inisiál F, deskonfia F hadau fali JK ninia doben ka namorada.

Durante haksesuk malu ne’e, iha mós membru PNTL ida ho inisial JL, ne’ebé hala’o hela mós kna’ar intelijénsia no vizilánsia nian iha área ne’ebá.

JL haree katak, diskusaun ne’e atu sai manas ona, nune’e nia tenta halo aprosimasaun bá parte rua, atu oinsá bele ko’alia didi’ak de’it bá malu.

Infelizmente, oin seluk, tanba JK sente katak liafuan sira mak hato’o hosi JL ne’e hanesan ofendidu bá ninia aan. Nune’e, JK fila-fali hodi tuku ‘dala-barak’ iha JL nia hasan sorin karuk, rezulta bubu to’o gráve.

Kazu ne’e rasik, akontese iha Otel Hongkong, Hudi-Laran, Suku Bairru Pité, Postu Administrativu Dom Aleixo, Dili. 

Jornalista: Rogério Pereira Cárceres