Hatutan.com, (12 Juñu 2023), Díli-Durante fulan-lima, hosi Janeiru to’o Maiu, tinan ne’e, Polísia Nasionál Timor-Leste (PNTL), Departamentu Tránzitu Nasionál (DTN) rejista timoroan na’in-28 lakon sira-nia vida tanba hetan asidente tráfegu ho motór no karreta.

Lee Mós : Oknum PCIC Baku Membru PNTL, Prossesa Tuir Lei

Membru Polisia Nasionál Timor Leste (PNTL, Munisipiu Dili asegura hela sidadaun ne’ebé kanek tanba asidente tráfegu iha área Comoro, Fevereiru 2022. Foto/Dok.Hatutan.com

Xefe Departamentu Polísia Komunitária no Tránzitu Seguransa Rodoviáriu internu, Superintendente Polísia António da Luz hateten, asidente ne’e akontese iha Munisípiu 13 inklui Rejiaun Administrativu Espesiál Oé-Cusse Ambeno (RAEOA).

“Iha kazu hamutuk 788, hosi kazu 788 ne’e, fahe bá kategória tolu. Ida, kanek kamán, hamutuk  1016, kanek todan 161, mate na’in-28, hosi fulan-Janeiru mai to’o iha loron 31 fulan-Maiu 2023,” António da Luz informa bá jornalista sira liuhosi konferénsia imprénsa iha Kuartel Jerál PNTL iha Caicoli, Díli, Segunda (12/06/2023).

Advertisement

António da Luz dehan, infrasaun sira ne’e mosu, tanba ema hirak ne’ebé kondús karreta ho motór, laiha asesóres. Hanesan xapa matrikula laiha, espellu laiha, la uza kapasete. Biar sira hatene hela regra, maibé, vióla nafatin.

Portavós komandu jerál PNTL ne’e informa, kazu asidente tráfegu sira ne’e mosu kauza hosi fatór haat. Ida, fatór ema ne’e rasik hamutuk 90%. Katak, nia la kontrola, depois dala-ruma lanu, dala-ruma seidauk hatene lori motór, maibé hakarak lori. Ida fali maka, fatór Veíkulu, motór ka karreta, hamutuk 5%. Ida ne’e tanba sira sai, la kontrola sira-nia kondisaun karreta no motór, entaun, ida ne’e mós kauza bá asidente. Fatór ida mak, dalan (estrada) ne’e rasik, hamutuk 5%. Katak kondisaun estrada iha Timor laran tomak ne’ebé mak sei aat, sai mós hanesan fatór ida ne’ebé kauza bá asidente. Ikus liu maka, fatór natureza. Ida ne’e mós fó kauza mós bá iha asidente.

Hosi númeru kazu hirak ne’e, PNTL prosesa ona kazu hamutuk 23 bá Tribunál, kazu 361 mak sei iha prosesu nia laran, no kazu 366 mak infratór sira deside rezolve tuir dalan família.

Hatán kona-bá saida mak PNTL sei halo, hodi evita asidente no redús ema lakon vida tanba asidente ho sira-ninia transporte, Portavós PNTL ne’e dehan, durante ne’e, depratmentu Tránzitu, hahú hosi nasionál bá to’o iha munisípiu  sempre halo aviza no halo sosializasaun hodi fó hanoin bebeik bá motorista sira, tantu sira ne’ebé kondús motór, kondús karreta, atu sira bele kuidadu sira-nia aan.

Fó hanoin mós bá kondutór sira, tanba sira tula ema, nune’e sira mós tenke kuidadu ho pasajeiru sira-nia saúde. Tanba ne’e mak, kondutór sira labele fuma iha kerrata laran.

Advertisement

“Ne’e fó perigu bá ita-nia pasajeiru sira, tanba iha lei rasik bandu, atu fuma iha fatin públiku. Entaun, husu bá motorista sira atu bele kuidadu,” António da Luz hateten.

PNTL husu mós bá motorista sira atu lebele hemu tua bainhira kondús motór ka karreta, tanba bele fó perigu bá sira-nia aan, no mós fó perigu bá passajeiru sira.

Rekolla  Reseita $312.133

Komandante António da Luz informa, durante fulan-Jeneiru to’o Maiu 2023, Departamentu Tránzitu no Seguransa Rodoviáriu iha kada komandu munisípiu sira, rekolla ona mós koima hosi infratór sira hamutuk $312.133.

“Hosi munisípiu sira-ne’e, ida ne’ebé maka rekolla koima barak liu maka hosi Díli, hamutuk $176.922. Ida ne’e maka, koima ne’ebé maka hatama bá iha kaixa jerál do estadu,” informa António da Luz.

Advertisement

Koima hosi Postu Fronteira sira

Koima ne’ebé rekolla hosi postu kolokasaun sira mak iha Postu Fronteira sira hanesan Batugade, Salele, ho Sakato, PNTL hatama tiha ona bá kaixa jerál estaduho montante $60.427.

“Hosi Batugade, janeiru to’o maiu, hamutuk $41.59. Postu Salele $14,823. Postu Sakato $4,545. Totál, $60,427. Ida ne’e mak koima ne’ebé rekolla hosi postu tolu iha postu fronteira,” nia tenik.

Jornalista: Rogério Pereira Cárceres

Advertisement