Hatutan.com, (13 Juñu 2023), Díli—Organizasaun sosiedade sivíl Fundasaun Mahein (FM), ne’ebé durante ne’e tau-matan bá asuntu seguransa no defeza, husu bá superiór sira Policia Ciêntífica e de Investigação Criminal (PCIC), atu aplika sansaun dixiplinár ne’ebé todan bá membru JK no husu PNTL liu-liu Departamentu Investigasaun Kriminál (DIK), atu aselera prosesu investigasaun kriminál hasoru oknum PCIC ne’e.
Diretór ezekutivu FM, Abel Amaral.
Diretór ezekutivu FM, Abel Amaral lamenta tebes tanba tuir loloos akontesimentu sira hanesan ne’e labele akontese tanba tuir monitorizasaun ne’ebé FM iha, pessoál membru PCIC ho inisiál JK involve iha kazu kríme ne’e, bá dala-tolu ona.
Lee Mós: Deskonfia Oknum PCIC Baku Membru PNTL Ida To’o Grave
“Foin lalais iha mós ema ne’ebé mak hanesan, halo agresaun fíziku bá ema seluk. Tanba ne’e maka, ita husu bá diretór nasionál PCIC, atu toma atensaun ho sériu, atu halo investigasaun ne’ebé mak didi’ak, nune’e tenke fó sasaun dixiplinár ne’ebé mak todan bá nia tanba pessoál ne’e la’ós foin mak involve, halo agresaun fíziku ne’e hasoru ema seluk. Maibé, ne’e dala-rua ka dala-tolu ona,” Abel Amaral hateten iha kna’ar fatin, Tersa (13/06/2023).
Nia husu mós bá komandu PNTL atu loke investigasaun ida ne’ebé rigór liután, hasoru membru PCIC, ne’ebé mak halo agresaun fíziku bá ema seluk tanba laiha ema ida mak iha Lei nia leten.
“Bá sé de’it mak komete krime, halo agresaun fízika hasoru ema seluk, tenke loke investigasaun no prossesa nia, tuir Lei Penál ne’ebé mak iha,” nia esplika.
Kona-bá sansaun dixiplinár, entrega kompeténsia bá iha diretór nasionál PCIC, Vicento Brito. Maibé, bá sansaun kriminál, tenke kontinua prosesu, haruka bá Ministériu Públiku tanba halo agresaun fíziku hasoru ema seluk ne’e, krime.
Fundasaun Mahein sente lamentável ho superior sira iha PCIC, tanba membru JK sempre involve iha kazu kríme to’o dala-tolu ona, maibé to’o ohin loron seidauk iha sansaun ruma ne’ebé mak todan atu aplika bá iha oknum ne’e.
Fundasaun Mahein konsidera autoridade polisiál sira liu-liu PCIC no PNTL ninia prezensa iha terrenu ne’e, atu fó seguransa bá sidadaun tomak. La’ós sai fali autór, halo fali konflitu ka halo fali kríme iha sosiedade nia leet.
Antes ne’e Adjuntu Diretór PCIC, Adino Nunes Cabrál hasoru-malu ona ho Segundu Komandante Jerál PNTL, Komisáriu Polísia Pedro da Costa Belo iha Kuartél Jerál, Caicoli hodi diskute oinsá buka no fó solusaun bá dezentendimentu ne’e.
Kazu insidente ida ne’e, iha ligasaun ho membru sira, nune’e iha prosesu sira internal PCIC nian sei haree ninia sirkunstánsia ne’e oinsá, atu bele iha aprosimasaun, averiguasaun polisiál, atu bele hatene nia verasidade.
Iha Kinta (08/06/2023), hale’u tuku-lima (05:00) dadeer madrugada, Otl, mosu kazu insidente “baku-malu” entre membru na’in-rua hosi PNTL no PCIC, iha arredór otél HK ne’ebe lokaliza iha área Hudi Laran, Suku Bairru-Pité, Postu-Administrativu Dom Aleixo, Munisipiu Dili.
Kazu ne’e, membru PCIC ho insiál JK tuku membru Polísia Nasionál Timor-Leste (PNTL) ida ho inisial JL, iha hasan sorin karuk, to’o bubu no grave.
Jornalista: Rogério Pereira Cárceres