Hatutan.com, (15 Juñu 2023), Díli—Membru Polisia Nasionál Timor-Leste (PNTL) na’in-158 ho idade 60 bá leten no tama ona reforma, kontinua  simu pensaun mensál ho mínimu $228 hosi Institutu Nasionál bá Seguransa Sosiál (INSS) iha Ministériu Solidariedade Sosiál no Inkluzaun (MSSI).

Membru Polísia Nasionál Timor Leste (PNTL), iha Eskuarda Ai-mutin Postu Administrativu Dom Aleixo, Munisípiu Dili, dudu karreta Estadu ne’ebé sira utiliza hodi halo patrullamentu, iha área Edifísiu Eskuadra Ai-Mutin, Novembru 2021. Foto/Facebook.

Komandante Departamentu Pessoál no Formasaun PNTL, Superintendente Xefe Polísia, Arquimino Ramos esplika, prossesu bá lista membru PNTL ne’ebé tama bá aprezentasaun, oras-ne’e daudaun iha ona editál hosi INSS no tuir planu, ohin Komandante Jerál PNTL, Komissáriu Polísia Jerál, Henrique da Costa halo asinatura bá rezultadu editál ne’e, nune’e publika membru reformadu sira.

Lee Mós: Koñese Deviza PNTL no Formasaun atu Lidera Eskuadra to’o Komisáriu

Komandante Arquimino Ramos dehan, editál ida-ne’e inklui ona direitu ne’ebé membru reformadu ida-idak sei hetan kada fulan, bainhira Komandu PNTL hapara sira nia saláriu, hahú iha loron 01 Jullu 2023.

“Hosi na’in 158 ne’e, konta pensaun ne’ebé sira hetan ho kustu ne’ebé ki’ik liu maka, sira kada fulan hetan $228. Bainhira sira-nia deviza, sarjentu, Ofissiál, Ofissiál Superiór maiória $500 bá leten. Tanba realidade Timor nian ho númeru hanesan ne’e ita bele moris. $228 ne’e mínimu ona bá postu ajente sira mak hetan ida-ne’e,” Superintendente Xefe Polísia, Arquimino Ramos hateten iha knaar fatin Kompañia Batalhão Ordem Pública (BOP), Caicoli, Kinta (15/06/2023).

Pensaun ne’ebé membru reformadu sira sei simu iha kada fulan bazeia mós bá sira-nia nível deviza, hosi ajente to’o iha superintendente xefe.

Membru sira ne’ebé ho nível deviza ajente de’it sei simu mínimu ho montante osan pensaun $228, maibé, ajente balun mós simu to’o $235, tanba haree mós bá data ne’ebé sira tama polísia ne’e la hanesan.

La’ós ne’e de’it, haree mós kona-bá data ne’ebé sira hetan promosaun hosi Deviza ajente, ajente prinsipál la hanesan, data promosaun bá ajente xefe la hanesan, tanba ne’e, ajente sira mós simu totál osan pensaun iha diferente.

Iha mós membru sira balun ne’ebé molok ne’e asume kargu, komandu sei sura hotu. Bainhira sarjentu sira, ofissiál sub-alternu, ofissiál superiór, ne’ebé sira assume kargu, sira-nia rendimentu ne’e boot liu. Sasukat hirak ne’e maka hosi INSS halo kontájen no sira hotu-hotu iha direitu bá pensaun ida-ne’e.

“Sira ne’ebé ho superiór simu pensaun kada fulan $500 bá leten. Balun $532, balun $565. Deviza bele promosaun hanesan, mais tanba balun assume kargu, balun la asume kargu, la hanesan. Balun assume kargu nível diresaun supervizaun ne’e la hanesan ho superintendente sira ne’ebé assume kargu iha komandu seluk,” Arquimino Ramos hateten.

Komandu halo kontájen iha parte rua, ida Rejíme Tranzitóriu Seguransa Sosiál, ida seluk maka Rejíme Kontributivu.

Rejíme Tranzitóriu Seguransa Sosiál ne’e hahú hosi tinan 2000, bainhira sira hahú tama polísia mai to’o 2017. Iha Rejíme Kontributivu ne’e, kontájen hahú fali hosi tinan 2017 mai to’o 2023.

“Rua ne’e konta hamutuk mak sira hetan ida-ne’e. Editál ne’e mai ona hosi INSS, iha ne’ebá sira prepara, bainhira PNTL hapara ona saláriu, sira-nia direitu ne’e prosesa iha INSS. Komunikadu de desizaun ne’e entrega bá sira iha serimónia despedida nian, iha Sentru Formasaun Polísia,” Arquimino Ramos esplika.

Mate, Oan Mak Simu

Pensaun ne’ebé kada fulan membru reformadu sira simu ne’e, bainhira sira mate, sira-nia oan ikus liu  mak iha direitu atu simu. Maibé, sira-ninia oan ne’ebé atu simu pensaun ne’e mós, ida ne’ebé mak idade seidauk atinje tinan 17.

Sé sira-nia oan ne’e maka ho idade to’o ona tinan 17 no liu tán ona, sei labele simu tán ona, tanba Lei mak hateten. Nune’e, Governu liuhosi MSSI, diresaun INSS, sei halo verifikasaun bá ida-ne’e no sei hapara kedan pagamentu bá pensaun.

“Lista ne’ebé sira aprezenta ne’e, bainhira sira mate, sira-nia oan ne’ebe ki’ik liu, ikus ona, lori bá aprezenta iha Ministériu Solidariedade Sosiál atu sira-nia oan ne’ebé menus hosi tinan 17 ne’e, sira bele hetan direitu ida-ne’e, kontinua. Maibé, sira ne’ebé mak oan boot hotu ona, liu tiha ona tinan 17, bainhira sira mate, hotu ona. La simu tán ona,” nia esplika.

Entrega Farda

Bainhira membru sira ne’e ofisialmente komandu re-integra sira fila bá vida sivíl, sira tenke entrega mós farda instituisaun nian ne’ebé antes ne’e Estadu atribui mak hanesan, uniforma sira, stick, alzema (borgol), pistóla (kilat) bá hotu instituisaun PNTL.

Motorizada-Labtop

Iha mandatu eis Komissáriu Polísia Júlio Hornai, distribui mós motorizada ho labtop bá membru sira mak destakadu nu’udár Ofissiál Polisia Suku (OPS) iha kada suku iha territóriu nasionál.

Iha altura distribuisaun fasilidade hirak ne’e, Eis Komissáriu PNTL ne’e deklara katak, fasilidade motorizada ho labtop hirak ne’e, bainhira membru sira utiliza to’o ona tinan 5 bá leten, bele privatiza ona ka sai ona sira-nian.

Hatán bá ida ne’e, komandante Arquimínio Ramos dehan, assuntu ida-ne’e komandu administrasaun jerál PNTL mak iha liu kompeténsia atu deside kona-bá fasilidade sira ne’e.

Komandu PNTL Sente Lakon

Iha biban ne’e, komandante Arquemíno Ramos dehan, hanesan komandu Pesoal no Formasaun, nomós kolega ne’ebé servisu hamutuk durante ne’e, sira sente lakon, liu-liu lakon kolega di’ak sira ne’ebé sira servisu hamutuk, susar no di’ak mós sira hamutuk.

Maibé, hanesan instituisaun Estadu nian, liu-liu instituisaun polísia, sira tenke kumpri bá Lei. Tanba Lei hateten ona, membru ne’ebé ninia idade to’o ona tinan 60, obrigatóriu bá reforma. PNTL ninia estatutu, diferente ho sira ne’ebé iha Funsaun Públika nian, tenke halo pedidu, sé mak hakarak bá.

“PNTL nia estatutu profissionál ne’e la hateten ida-ne’e. PNTL nia estatutu, uniku na’in husu ne’e, bainhira, nia servisu durante tinan 20, atinje ona idade 55, hakarak husu, sira bele bá reforma. Kona-bá  sira ne’ebé idade 57 ne’e sira bele husu pré-aprezentasaun. Sira hetan saláriu sei kompletu, kondisaun polisiál sei kompletu,” Arquimino Ramos informa.

Tuir ajenda, iha Sesta (16/06/2023), komandu PNTL sei realiza serimónia despedida ikus bá membru sira na’in-158 ne’e iha Sentru Fomasaun Polisia  iha Akademia Comoro, Dili.

Iha seremónia ikus nian ne’e, komandu PNTL sei entrega mós sertifikadu nu’udár aktu agradesimentu no apresiasaun bá membru reformadu sira.

Komandu PNTL mós planeia ona katak, iha serimónia komemorasaun aniversáriu ezisténsia instituisaun PNTL nian iha 27 Marsu 2023 ne’e sei tula ka hasa’e tán deviza bá membru reformadu sira ne’e, inklui entrga totalmente uniforme sira mak durante utiliza bá instituisaun seguransa ne’e.

Jornalista: Rogério Pereira Cárceres