Hatutan.com, (16 Juñu 2023), Díli—Polísia Nasionál Timor-Leste (PNTL) liuhosi Komandu Pessoál no Formasaun, iha ona plnau no preparadu atu harii Institutu Superiór Siénsia Polisia (ISSP) ho objetivu atu kapasita membru sira liu-liu iha nível superiór.

Komandante Departamentu Pessoál no Formasaun, Superintendente Xefe Polísia Arquimíno Ramos.

Komandante Departamentu Pessoál no Formasaun, Superintendente Xefe Polísia Arquimíno Ramos hateten, oras-ne’e dadaun Curso Promoção Oficial Superior (CPOS) nian hala’o de’it iha nasaun Portugál, nomós iha Institutu Defeza Nasionál (IDN).

Lee Mós: Membru PNTL Na’in-158 Reforma, Governu Konsidera Hanesan Tranzisaun Jerasionál

Tanba ne’e, komandu PNTL prepara ona dokumentu sira atu aprezenta bá Ministériu Ensinu Superiór Siénsia no Kultura (MESSK), atu bele hetan tiha akreditasaun, nune’e bele hahú kursu iha nível lisensiatura, nomós bá kursu sira seluk.

“Institutu Superiór Siénsia Polisia sei eziste. Lei iha ona, agora ita hein prepara dokumentu sira ne’e bá hatama iha Ministériu Ensinu Superior, atu bele hetan akreditasaun, depois mak ita hahú,” Arquimíno Ramos hateten hafoin partisipa serimónia despedida bá membru na’in-158 ne’ebé atu tama ba reforma, iha CFP, Comoro, Sesta (16/06/2023). 

Iha 2011 to’o 2016, PNTL liuhosi Centro de Formação Policia (CFP) Comoro, loke ona mós kursu ida kona-bá Jestaun Ezekutivu Polisia, ho nível Diploma de’it.

Maibé, kursu ne’e rasik ninia lisensa inválidu ona, tanba ne’e labele kontinua tán diploma ida-ne’e. Oras ne’e daudaun komandu PNTL hakarak hasa’e diploma ne’e bá nível lisensiatura, liu-liu iha ISSP ne’ebé atu harii iha tempu besik.

“Agora dadauk, iha faze preparasaun, ita konsulta ona ho Ministériu Ensinu Superior, sira fó tán tempu bá ita, atu priénxe kritéria sira ne’e hotu. Ita  servisu hamutuk ho sira, dokumentus hotu ona, ita bá submete, hodi hetan akreditasaun,” nia esplika.

Kona-bá rekursu umanu oras-ne’e komandu PNTL rasik prepara ona, bainhira instala ISSP maka ninia korpu dosente nomós instrutór sira  preparadu hela.

“Agora iha ona grau doutoramentu, mestradu, lisensiatura, ne’ebé preparadu. Haree bá rekursus umanus, ita bele, ita kompara ho seluk, ita natoon,” Arquimino afirma.

Tuir dadus hosi Departamentu Pessoál no Formasaun, membru PNTL sira oras ne’e ho tátál 4.178, la sura ho sira ne’ebé mate ona.

Sira ne’ebé ho kondisaun saúde moras hela, iha na’in-20 resin. Infelizmente, membru hamutuk na’in-158 mak oras ne’e bá ona reforma, hodi fila bá vida sivil. Nune’e, totál efetivu oras-ne’e, hela de’it ona membru rihun-haat, rua-nulu (4.020).   

Jornalista: Rogério Pereira Cárceres