Hatutan.com, (26 Juñu 2023), Díli—Polísia Nasionál Timor-Leste (PNTL), liuhosi Eskuadra Dom Aleixo, asegura joven mane ida ho inisiál ENPB, tanba deskonfia involve iha kazu burla agravadu (bosok no lohi), iha aldeia Avansa, Suku Bairru-Pité, Postu-Administrativu Dom Aleixo, Munisípiu Díli.

Ekipa investigasaun kriminál PNTL, liuhosi Eskuadra Dom Aleixo, rekolla informasaun hosi vitima Claudino no halo hela mós identifikasaun ba suspeitu ENPB, tanba deskonfia involve iha kazu krime Burla Agravadu. Foto/PNTL.

“Ekipa Konjunta liuhosi Eskuadra PNTL Dom-Aleixo no Servisu Informasaun Polisia Makikit konsege lori suspeitu ENPB hamutuk ho vítima ida ne’ebé halo keixa ba kedan halo identifikasaun tanba deskonfia suspeitu involve kazu burla agravadu ka bosok vitima Claudino Baptista tinan 32 hodi hetan lukru,” Hatutan.com sita komunikadu, Segunda (26/06/2023).

Lee Mós: Investigasaun Bá Membru PCIC Ne’ebé Deskonfia Baku Ajente PNTL Avansa Ho Prosesu Rua

Tuir kronolójia, iha Sábadu (03/06/2023) haleu tuku 16:00 lorokraik Otl, vítima ida ho naran Claudino Baptista (tinan 32), suspeitu ENPB bá iha vitima ninia rezidénsia iha aldeia Avansa, Suku Bairo Pite, Dili.

Advertisement

Suspeitu ENPB bá ho objetivu atu sosa vítima Claudino ninia kareta ne’ebé atu fa’an duni ho totál présu rihun $17.

Maibé, iha altura ne’ebá, suspeitu hateten bá vítima katak, nia uza halai koko tiha uluk lai kareta ne’e, hodi haree no hatene karreta ne’e ninia kondisaun sira, karik di’ak, maka foin nia bele sosa.

Tanba ne’e maka, vítima Claudino mós fiar bá ida ne’e, nia deside hodi fó kareta bá suspeitu atu koko. Infelizmente, suspeitu lori karreta ne’e, bá peñor fali ho sidadaun mane ida naran Abel, hela iha área Bidau.

“Bainhira nia bá gadai, Abel presiza kartaun eleitoral atu apar ho karreta, entaun nia mai husu tutan ha’u nia eleitorál atu lori bá nia patraun maibé nia lori bá fó fali Abel,”  Claudino hateten iha komunikadu ne’e.

Durante semana ida laran, vítima Claudino halo kontakta bebeik bá suspeitu liuhosi telefóne, maibé, suspeitu la atende.

Advertisement

Ho razaun hirak ne’e hotu maka, vítima hakbesik aan bá Eskuadra Polísia, hodi hato’o keixa oinsá mak polisia bele ajuda nia, hodi buka tuir suspeitu ENPB ninia paradeiru.

“Iha dia 3 juñu, lorokraik tuku-haat, nia mai foti kareta atu sosa no nia husu atu koko uluk lai sé di’ak mak fó osan. Maibé, nia bá gadai fali bá maun ida naran Abel iha Bidau. Ha’u telefone nia semana ida tomak la foti. Entaun, ha’u telfone fali bá PNTL ami bá nia uma de’it hodi husu tuir no nia dehan gadai ona bá ema, iha maun ida naran Abel,” vítima Claudino haktuir tan iha komunikadu.

Maski nune’e, polisia akompaña vitima hodi kontakta fali ho Abel nu’udár ema ne’ebé halo aluga bá kareta ne’e. Maibé, Abel hateten katak, sé atu fila karreta, tenke lori ho osan ho montante $5.000.

Tuir vitima, ninia karreta ho xapa matrikula A. 27657 ne’e, hetan lelaun hosi Timor Lodge ho montate osan  $16.000.

Maibé, karreta ninia kondisaun sira barak mak aat ona, nune’e presiza gasta tán osan lubun ida, hodi kondisiona hikas kareta ninia kondisaun.

Advertisement

Iha Investigadór sira PNTL ninian oin, suspeitu ENPB rekoñese ninia aktu sira, no komrometidu atu devolve fali osan hirak ne’e hodi bele foti fali kareta ne’ebé oras ne’e sei peñor bá Abel, iha Bidau.

“Buat ne’ebé nia ko’alia ne’e loos hotu, nia telefone la para rai ne’e mak ha’u la simu. Maibé, ha’u prontu selu fali osan sira ne’e molok to’o dia 3 Jullu. Agora daudaun ha’u fó uluk ona osan $1.000 bá nia. Entaun nia tenke fó fali mai atu nune’e falta tán $4.000 ne’e ha’u buka hodi selu bá Abel hodi foti fali karreta ne’e,” suspeitu ENPB rekoñese.

Jornalista: Rogério Pereira Cárceres

Advertisement