Hatutan.com, (24 Jullu 2023), Díli—Komandu FALINTIL Forsa Defeza Timor-Leste (F-FDTL) hili ona Saudozu Venâncio Ferraz nu’udár mahein ka protetór bá Unidade Polísia Militár (PM).

Saudozu Venâncio Ferraz nu’udár mahein ka protetór bá Unidade Polísia Militár (PM). Foto/F-FDTL.

Saudozu nu’udár Komandante FALINTIL ida ne’ebé destaka iha parte fronteira ho nia aten brani hodi funu hasoru okupasaun Indonézia, nu’udár ema ne’ebé iha prinsípiu, dedikasaun forte, aten brani  hodi fó nia aan  tomak ba prosesu luta libertasaun nasionál.

Lee Mós: Papél Polísia Militár atu Kontrola Membru Forsa Armada Ne’ebé Halo Krime

Xefe Estadu Maiór Jenerál F-FDTL, Tenente Jenerál Domingos Raul ‘Falur Rate Laek’ hateten, Komandu F-sei harii estátua Saudozu Venâncio Ferraz iha Unidade Polísia Militár nu’udár insiativa Komandu nian rasik atu fó valór no dignifika saudozu nia kontribuisaun iha luta libertasaun nasionál.

Ho razaun hirak ne’e maka, iha kedan mandatu eis-Xefe Estadu Maiór Jenerál F-FDTL, Tenente Jenerál Lere Anan Timur, hola insiativa hodi hili saudozu  hanesan patronu bá membru F-FDTL iha Unidade Polísia Militár.

“Ita hamutuk ho família saudozu Venâncio Ferraz halo lansamentu fatuk dahuluk ba konstrusaun estátua iha Unidade Polísia Militár, tanba-ne’e konstrusaun estatua ne’e nu’udár inisiativa rasik hosi Tenente Jenerál reformadu Lere Anan Timur,” Hatutan.com sita komunikadu, Segunda (24/07/2023).

Serimónia lansamentu fatuk dahuluk ba konstrusaun estátua Saudozu Venâncio Ferraz, nu’udár mahein ka protetór bá Unidade Polísia Militár (PM). Foto/F-FDTL.

Estátua  ida-ne’e nu’udár jestu hosi Komandu F-FDTL atu dignifika no valoriza saudozu Venáncio Ferraz nia luta bá prosesu libertasaun nasionál.

Biar ohin loron la hamutuk ona ho lider FALINTIL sira ne’ebé oras-ne’e sei moris, maibé Estadu la haluha  saudozu Venâncio Ferraz ninia kontribuisaun sira, tanba ne’e sei kontinua dignifika no  fó valórizasaun bá saudozu.

Xefe Estadu Maiór Jenerál F-FDTL ne’e husu membru F-FDTL espesiál bá membru Unidade Polísia Militár atu banati tyir Saudozu Venâncio Ferraz, hatudu aten brani, matein prinsípiu hodi  hala’o servisu ba Estadu ida-ne’e.

Nune’e mós Xefe Estadu Maiór Jenerál F-FDTL reformadu, Tenente Jenerál Lere Anan Timur, rekoñese konstrusaun  estátua  saudozu Venâncio Ferraz ne’e mai hosi nia inisiativa bainhira sei assume kargu nu’udár Xefe Estadu Maiór iha Forsa Armada.

“Ha’u deside konstrui saudozu nia estátua iha Polísia Militár hodi sai nu’udár patrónu no protetór ba Polísia Militár ho razaun rua.  Ida, saudozu nia karáter, no ida seluk haree bá ninia prinsípiu luta libertasaun nasionál,” Lere Anan Timur deskreve.

Reprezentante família Saudozu Venâncio Ferraz,  Mariano Malik dehan, hanesan família sente kontente no onradu tebes, tanba Estadu liuhosi Komandu F-FDTL kontinua fó onra no dignifika saudozu Ferraz hodi tau nia estátua iha Unidade Polísia Militár nu’udár patrónu no protetór.

Jornalista: Rogério Pereira Cárceres