Hatutan.com, (24 Jullu 2023), Díli—Governu Singapura hakarak tebes atu tulun Timoroan sira liuhosi fó kapasitasaun rekursu umanu iha área oioin, to’o Timor-Leste adere ka sai membru permanente bá organizasaun rejionál Association of South East Asean Nation (ASEAN).

Vise Primeiru Ministru no Ministru Koordenadór bá Asuntu Ekonómiku no Ministru Turizmu no Ambiente, Francisco Kalbuadi Lay hala’o sorumutu kooperasaun ho Ministru Negósiu Estranjeiru no Kooperasaun (MNEK) Singapura, Vivian Balakrishnan, iha edifísiu Ministériu Turizmu, Faról, Segunda (24/07/2023). Foto/Média MT.

Vise Primeiru Ministru no Ministru Koordenadór bá Asuntu Ekonómiku no Ministru Turizmu no Ambiente, Francisco Kalbuadi Lay informa asuntu ne’e hafoin sorumutu kooperasaun ho Ministru Negósiu Estranjeiru no Kooperasaun (MNEK) Singapura,  Vivian Balakrishnan, iha edifísiu Ministériu Turizmu, Faról, Segunda (24/07/2023).

Lee Mós: Bankada FRETILIN Konsidera Programa IX Governu bá Interese Povu

Francisco Kalbuadi Lay informa, durante sorumutu ne’e parte rua ko’alia kona-bá dezenvolvimentu seitór Turizmu nian iha rai-laran, inklui seitór sira seluk tán, to’o TL sai membru loloos bá ASEAN.

“Sira hakarak ajuda liu-liu bá kapasitasaun  no treinamentu rekursu umanu iha área hotu-hotu, hanesan aviasaun nian, otelaria, ospitabilidade, bá parte ekonomia, telekomunikasaun nian to’o ita tama bá ASEAN hanesan full member,” Francisco Kalbuadi Lay hateten iha kna’ar fatin Faról, Díli, Segunda, (24/07/2023).

Ministru Vivian Balakrishnan foin bá dala-uluk hala’o vizita mai TL, hafoin hetan fiar hodi assume responsábilidade nu’udár Ministru Negósiu Estranjeiru no Kooperasaun Singapura nian.

“Ohin dadeer nia hasoru ona Prezidente Repúblika, depois bá hasoru Primeiru Ministru no ohin lorokraik hamutuk ho ami ne’ebé mak hamutuk iha asuntu ekonomia nian. Ami ami na’in-hira hasoru Ministru hodi ko’alia asuntu barak. Primeiru maka ko’alia posibilidade, preparasaun Timor-Leste bá adezaun ASEAN. Buat barak mak tenke prepara. Entaun, hosi ami na’in-hira ne’ebé toma konta assuntu ekonomia nian, ami diskute ho Ministru ne’e,” Kalbuadi esplika.

La’ós ne’e de’it, durante sorumutu ne’e diskute mós asuntu aviasaun ninian, liu-liu Singapura hakarak tebtebes katak iha tempu oin mai, Singapura hakarak atu lorloron iha Fly bá mai Dili bá Singapura.

Kona-b’a komérsiu no indústria, Ministru Vivian promete katak, bainhira produtu TL nian pronto hanesan ai-fuan, modo, buat oioin hosi agrikultór sira ne’ebé mak produs hosi Timor-Leste, Singapura prontu atu hola.

Sorumutu ne’e akompaña mós hosi Ministru Komérsiu no Indústria, Filipus Nino Pereira, Ministru Transportes no Komunikasaun (MTK), Miguel Marques Gonçalves Manetelo no Vise Ministra bá Asuntu ASEAN, Milena Maria da Costa Rangel.

Jornalista: Rogério Pereira Cárceres