Hatutan.com, (27 Jullu 2023), Díli—Forsa konjunta kompostu hosi Polísia Nasionál Timor-Leste (PNTL), Komandu Munisípiu Díli, Unidade Espesiál Polísia (UEP), Servisu Informasaun Polísia (SIP), FALINTIL Forsa Defeza Timor-Leste (F-FDTL), Servisu Informasaun Militár (J2 ho N2), inklui Servisu Nasionál Intelijénsia nian (SNI), kaer ona joven mane na’in-9, tanba deskonfia durante ne’e sempre na’ok ema nia sasán iha kapitál Díli.

Polisia kaer ona joven mane na’in-9, tanba deskonfia durante ne’e sempre na’ok ema nia sasán iha kapitál Díli, Kuarta (26/07/2023). Foto/Elio dos Santos da Costa.

Komandante PNTL Munisípiu Díli, Superintendente Xefe Polísia Orlando Gomes esplika, joven na’in-9 ne’e kaer iha Kuarta (26/07/2023) kalan otl iha fatin ne’ebé la hanesan, iha área juridisaun Díli nian.

Lee Mós: Sai Hosi Prizaun, Joven FdF Na’ok Tán Motór 14 Iha Díli Laran

Suspeitu na’in-9, Polisia kaptura sees (fora) hosi Flagrante delito ho inisiál SMG, VBDG, FCMX, DSCS, YGKS, ZMdSX, DFAdR.

Tanba ne’e, investigadór sira hala’o prossesu normál, maibé suspeitu na’in-rua seluk mak tama iha Flagrante delito, tanba ne’e detein sira iha sela detensaun durante oras 72, hafoin aprezenta bá Ministériu Públiku (MP).

Komandante Orlando hateten, hahú kedan iha loron 1 to’o 25 jullu tinan ne’e, sempre mosu kazu na’ok sasán iha fatin-fatin, liu-liu iha Díli ne’ebé mak sai hanesan kapitál nasaun nian.

Fatin sira ne’ebé PNTL identifika baibain sidadaun sira ne’e na’ok sasán iha Dili mak hanesan, Tuana-Laran, Pantai Kelapa, Audian, Largo Lecidere, Semitéiru Xina Rate nian, inklui iha fatin sira seluk tán ne’ebé ema na’ok mós telemóvel.

Polisia kaer ona joven mane na’in-9, tanba deskonfia durante ne’e sempre na’ok ema nia sasán iha kapitál Díli. Komandante PNTL Munisípiu Díli, Superintendente Xefe Polísia Orlando Gomes ho estrutura hala’o hela konferénsia imprensa iha Komandu Munisipiu Dili, Kinta (27/07/2023). Foto/Elio dos Santos da Costa.

“Tanba ne’e Komandu munisípiu Díli halo jestaun bá operasaun konjunta, depois ita halo identifikasaun bá suspeitu sira, agora ita kaptura na’in-hitu mak oras ne’e daudaun hamutuk ho na’in-rua seluk ne’ebé mak foin daudaun akontese. Sira hamutuk na’in-sia (9) mak ita halo kapturasaun, detein ona iha sela komandu munisípiu Díli,” Komandante Orlando Gomes hateten iha Komandu Munisipiu Dili, Kinta (27/07/2023).

Polisia mós suspeita ona sidadaun sira ne’e tanba durante ne’e sira mak involve an iha grupu ne’ebé organizadu atu asalta ema iha Dili laran. Sira ne’e, la’ós konsentra de’it iha fatin ida, maibé sira asalta iha fatin barak.

“Akontesimentu sira ne’e ho ema hanesan. Sira nia grupu ne’e hanesan hotu mak halo asalta bá ita-nia vítima sira. Ida-ne’e mak durante ne’e sira halo sira-nia servisu na’ok iha Díli laran,” Komandante Orlando Gomes informa. 

Prende Evidénsia 10

Iha prosesu kapturasaun bá suspeitu sira ne’e, Polisia mós halo apreensaun ka prende evidénsia ka sasán balun mak suspeitu sira kaer hela nu’udár meiu ne’ebé fasilita sira atu buka na’ok ema ninia sasán sira mak hanesan, motorizada lima (5) marka Scoopy 1, ho Beat 4, inklui telemóvel lima (5).

Vítima Sira Hato’o Keixa

Ho hahalok ne’ebé sidadaun na’in-9 ne’e halo hodi hadau ka na’ok ema ninia sasán iha Dili, iha vítima hamutuk na’in-8 mak hato’o ona keixa bá Polisia, tanba sente katak sira-ninia telemóvel mós lakon, tanba grupu deskoñesidu sira hadau de’it iha dalan.

“Vítima sira agora iha na’in-8 ne’ebé mak agora aprezenta ona keixa. Ita halo prosesu no sira ninia modus na’ok, sira uza meius, kuandu sira besik ona iha vítima sira-nia motorizada, tanba telemóvel sira ne’e tau iha motór nia bolsu, entaun, sira besik, sira balun tenta bá iha vítima sira depois balun foti telemóvel, depois sira halai liu,” Komandante Orlando konta tuir.

Ho situasaun ne’e, Polísia sei la nonook, sei kontinua hala’o operasun iha tempu kalan no loron ho objetivu atu buka-tuir sidadaun sira, sé de’it no iha ne’ebé mak komete hahalok ne’ebé rezulta vítima, sei halo kedan kapturasaun hodi prossesa tuir Lei.

Komandu PNTL Munisípiu Díli, sei servisu hamutuk mós ho ekipa servisu intelijénsia hosi Nasionál, J2, N2, ho Intelijénsia hosi UEP, SIP Munisipiu sira, kontinua monitoriza na’ok-teen sira-nia movimentu tomak, hafoin fornese informasaun, nune’e Polisia bele tun bá halo kapturasaun iha sira-nian hela fatin.

Jornalista: Rogério Pereira Cárceres