Hatutan.com, (27 Jullu 2023), Díli—Polísia Nasionál Timor-Leste (PNTL), Komandu Munisípiu Díli, Eskuadra Na’in-Feto, kaer ona estudante na’in-rua hosi Eskola Sekundária Nobel da Paz, tanba halo passa revista ilegál hasoru estudante seluk.

Polísia Nasionál Timor-Leste (PNTL), Komandu Munisípiu Díli, Eskuadra Na’in-Feto, kaer estudante na’in-rua hosi Eskola Sekundária Nobel da Paz, tanba halo passa revista ilegál hasoru estudante seluk iha Kuarta (26/07/2023) besik área Balide, Postu Administrativu Na’in-Feto, Munisipiu Dili. Foto/PNTL.

Aktu passa revista ilegál ne’e akontese iha Kuarta (26/07/2023) meiudia otl, besik área Balide, Postu Administrativu Na’in-Feto, Munisipiu Dili.

Lee Mós: Autoridade Detein Joven Na’in-9 Deskonfia Na’ok Sasán Iha Díli

Tuir informasaun hosi autoridade polísia katak, estudante na’in-rua ne’e, hein hela estudante sira seluk hosi Eskola Sekundária 04 Setembro UNAMET Díli, objetivu atu asalta no halo agresaun fízika.

Komandante PNTL Munisípiu Díli, Superintendente Xefe Polísia, Orlando Gomes simu duni informasaun hosi Servisu Informasaun Polísia (SIP) no orienta kedan ekipa patrullamentu tun bá halo atuasaun no konsege foti kedan estudante na’in-rua ne’e, lori bá halo identifikasaun iha Eskuadra Na’in-Feto. 

“Ita mós hetan ona informasaun katak, sira halo iha área Na’in-Feto ninian bá estudante sira. Informasaun ida-ne’e ha’u orienta ona bá iha parte investigasaun, tránzitu, atu bele buka hodi identifika sira ne’ebé mak halo check point ilegál. Estudante na’in-rua ne’e hosi eskola Nobel da Paz. Sira ho sira mak check point fila-fali karreta sira ne’e. Ne’e mak ita kaer,” Komandante Orlando Gomes hateten iha Komandu Munisípiu Díli, Kinta (27/07/2023). 

Tuir Komandante Orlando Gomes, PNTL mak iha liu kompeténsia atu hala’o atividade check point ka operasaun hodi garante seguransa no hametin estabilidade iha rai-laran no la’ós sidadaun baibain ida mak hola inisiativa hodi bá hein malu fali iha dala sira.

“Laiha sidadaun ida mak halo tuir ninia gostu iha fatin públiku sa tan halo check point no laiha grupu ida mós atu halo check point iha dalan bá transporte, saida de’it,” Superindente Xefe Polisia Orlando Gomes hateten.

Kona-bá identidade insiál hosi estudante na’in-rua no motivu saida mak sira halo fali operasaun ilegál ne’e, Komandante Orlando dehan, Investigadór sira iha Eskuadra Na’in-Feto halo hela identifikasaun bá autór sira.

Hahú aban (28/07/2023) bá oin, Komandu Munisipiu Dili sei kontinua halo operasaun tama no sai eskola, hodi kontrola estudante malandru sira ne’ebé mak hakarak kria instabilidade iha eskola. Bainhira polísia hetan, laiha liafuan toleránsia bá sira.  

Prende Motorizada 218 no Karreta 82

Iha biban ne’e, Komandante Orlando Gomes informa, iha fulan jullu ne’e Departamentu Tránzitu Munisipiu Díli liuhosi atividade pasa revista (auto stop) konsege halo apreensaun bá evidénsia motór hamutuk 218 no karreta hamutuk 82.

Evidénsia hirak ne’e PNTL prende tanba laiha assesória motor ho karreta nian, laiha dokumentu, infratór balun ninia transporte liu ona prazu inspesaun (kir mate) no infratór balun viola Lei Kódigu estrada nian.

“Ne’e karreta privada, karreta balun mai hosi Governu, ida ne’e mak ita prende. Ita mós prega multa bá sira ne’ebé mak halo infrasaun,” Komandante Orlando informa.

Pasa revista ne’e ho baze bá orientasaun hosi Komandu Jerál PNTL, tanba sidadaun sira kontinua komete infrasaun oioin, la respeita sinais tránzitu, ikus mai mosu asidente tráfegu barak to’o rezulta fatál (mate).

Jornalista: Rogério Pereira Cárceres